რა ხდება ახლა ბათუმის უძრავი ქონების ბაზარზე

ბათუმი წლების განმავლობაში აქტიურად ვითარდებოდა. აღმშენებლობის დიდი ნაკადი ჯერ კიდევ 2004 წელს, აჭარის ა/რ-ის ადგილობრივი ხელისუფლების ცვლილების შემდეგ დაიწყო და მას შემდეგ არ შეჩერებულა. გაჩნდა პირველი ცათამბჯენები და თვალისმომჭრელი ატრაქციონები, გაიხსნა ტურისტებისთვის მიმზიდველი დიდი გასართობი ცენტრები, რაც ვიზიტორებს იზიდავს როგორც ევროპის, ასევე აზიის ქვეყნებიდან. აქ ყველა იპოვის თავისთვის შესაფერის გართობას. თუმცა, ბათუმის უძრავი ქონების ბაზარმა ყველაზე დიდი ცვლილებები გასული წლის გაზაფხულის შემდეგ განიცადა, რაც რუსეთის უკრაინაში შეჭრით იყო განპირობებული. ბათუმი, მანამდე უკვე იყო ცნობილი ლოკაცია ციფრული მოგზაურებისთვის (Digital Nomad), რომლებიც დისტანციურად მუშაობენ და შეუძლიათ ნებისმიერ ქვეყანაში გაატარონ დრო. მაგრამ, აღსანიშნავია რომ, თუ მანამდე, ასეთი სტუმრები მცირე ნაკადებად ჩამოდიოდნენ აჭარაში, 2022 წლიდან ბათუმს ცუნამივით დაატყდა თავს მოგზაურების ტალღა და უძრავი ქონების ბაზარზე კრიზისი შექმნა. არ დააყოვნეს სხვებმაც, მალევე ბათუმს დაემატა ვიზიტორები, რომლებმაც რუსეთის წინააღმდეგ დაწესებულ ეკონომიკურ სანქციებს აარიდა თავი, ხოლო ზაფხულის მეორე ნახევრიდან, ისევ რუსეთში გამოცხადებული, „ნაწილობრივი“ სამხედრო მობილიზაციის მიზეზით ათასობით უცხო ქვეყნის მოქალაქე შემოვიდა საქართველოში, რომელთა დიდმა ნაწილმაც, დროებით საცხოვრებლად ზღვისპირა ქალაქი აირჩია. ასევე, ბევრმა გამოხატა დაინტერესება უძრავი ქონების შეძენასთან დაკავშირებით.

2022 წლის 1-ელი იანვრიდან 9 სექტემბრის ჩათვლით, 15 164 შენობა-ნაგებობაზე, რუსეთის ფედერაციის 12 335 მოქალაქის საკუთრების უფლება დარეგისტრირდა, საიდანაც 13 262 საცხოვრებელ ბინას წარმოადგენს. აღნიშნულის შესახებ „ინტერპრესნიუსი“ იტყობინება, მის მიერ იუსტიციის სამინისტროდან გამოთხოვილი შესაბამის საჯარო ინფორმაციაზე დაყრდნობით. წყარო არ მიუთითებს, აქედან რა წილი მოდის დედაქალაქზე, ხოლო რა ნაწილი ბათუმზე და სხვა ქალაქებზე, თუმცა ყველასთვის ცნობილია, რომ ბათუმი რუსეთის და ბელარუსის მოქალაქეებს შორის განსაკუთრებული პოპულარობით სარგებლობს.

არსებობდა მოლოდინი, რომ როგორც რუსეთის, ასევე ბელარუსის მოქალაქეები საქართველოს მხოლოდ დროებით თავშესაფრად გამოიყენებდნენ, იქამდე სანამ დასავლეთის ეკონომიკურად უფრო განვითარებულ ქვეყნებში მოძებნიდნენ გრძელვადიან საცხოვრებელს. ეს განტვირთავდა ქალაქს და უძრავი ქონების ბაზარზე ფასების სტაბილიზაციას შეუწყობდა ხელს, თუმცა, აღნიშნული მოლოდინები ჭეშმარიტებისგან შორს აღმოჩნდა.

საქართველოს ეკონომიკაში მიგრაციის მნიშვნელობაზე მეტყველებს თიბისი კაპიტალის კვლევაც, - „კერძოდ, თიბისი კაპიტალის მიერ გაანალიზებული რიცხვების მიხედვით, 2022-ის ზრდამ 9.8% შეადგინა, მიგრანტების ეფექტის გარეშე კი ეს მაჩვენებელი 8.3% იქნებოდა. ამგვარად, რუსეთის მიერ უკრაინაში დაწყებული ომის გამო, მიგრანტების დიდი ნაკადი რომ არ შემოსულიყო, საქართველოს ეკონომიკა უფრო ნაკლებად გაიზრდებოდა, მთელი წლის განმავლობაში მიგრანტების რაოდენობამ 115 000, მათგან მიღებულმა შემოსავალმა კი 1 მილიონ 144 ათასი აშშ დოლარი შეადგინა“.

ამავე კვლევის თანახმად, 2022 წლის 11 თვეში თბილისში, მიგრანტების მიერ შეძენილი ბინების წილი მთლიან გაყიდვებში 5%, გაქირავებულ ბინებში კი 32%-ია.

მიგრანტების წილი ხარჯვაში განსაკუთრებით ისეთ სექტორებშია შესამჩნევი, რომლებიც დაბინავებასთანაა დაკავშირებული: ტექნიკა, ავეჯი, სარემონტო მასალები. მაგალითად, სარემონტო მასალების მთლიან მოხმარებაში, რომლის ბრუნვამ 1.46 მლრდ ლარი შეადგინა, მიგრანტების წილი 5%-ია. ამას თავად ბიზნესიც ადასტურებს, - აღნიშნულია თიბისი კაპიტალის კვლევაში.

ეჭვგარეშეა, რომ როგორც თბილისში, ასევე ბათუმში უძრავ ქონებაზე გაზრდილი ფასი დიდი ხნის განმავლობაში შენარჩუნდება. განსაკუთრებით, მტკიცე მოლოდინები არსებობს გასაქირავებელ უძრავ ქონებასთან დაკავშირებით.