რა ხდება უძრავის ქონების ბაზარზე ახლა - 2023 წლის პირველი კვარტლის მონაცემები

მიმდინარე წლის პირველ სამ თვეში უცხოელების მიერ შეძენილი მიწის ნაკვეთების თითქმის 62% რუსეთის მოქალაქეებზე მოდის. საქართველოში უცხოელებმა არასასოფლო-სამეურნეო დანიშნულების 2 038 მიწის ნაკვეთი დაირეგისტრირეს. ხოლო, აქედან 1 256 მიწის ნაკვეთი რუსეთის 447 მოქალაქის საკუთრება გახდა. სხვა სახელმწიფოების მოქალაქეებს შორის რუსეთის შემდეგ სომხეთია დომინანტური - 164 მიწის ნაკვეთი, რომელიც 47-მა მესაკუთრემ შეიძინა. ასევე, საბერძნეთი - 154 მიწის ნაკვეთი, 58 მესაკუთრე. უკრაინა - 70 მიწის ნაკვეთი, 26 მესაკუთრე და გერმანია - 54 მიწის ნაკვეთი, 21 მესაკუთრე. 

რუსეთის მოქალაქეების ინვესტიციის წილი შესამჩნევია ასევე კომერციული ფართების სეგმენტში. 2023 წელს უცხოელებზე გაყიდული 41 კომერციული ფართიდან 14 მათგანი რუსეთის მოქალაქეებმა შეიძინეს. ხოლო, 417 არაკომერციული ფართიდან წელს 3 თვეში რუსეთის მოქალაქის საკუთრების სახით 152 ფართი დარეგისტრირდა.

რუსეთის თუ საზღვარგარეთის სხვა ქვეყნების მოქალაქეების გაცხოველებული ინტერესის მიუხედავად, მიმდინარე წელს თბილისში ეკონომ სეგმენტის ბინების გაყიდვები უმნიშვნელოდ შემცირდა, თუმცა ეს არ ეხება პრემიუმ და მედიუმ სეგმენტის ბინებს, სადაც მნიშვნელოვანი ზრდა ფიქსირდება. აღნიშნულის შესახებ, ინფორმაციას BM.GE ავრცელებს. ბაზრის მიმოხილვის მიხედვით, ბინების გაყიდვები უმნიშვნელოდ, 1%-ით შემცირდა და დედაქალაქში იანვარ-მარტის განმავლობაში ჯამში 9 633 ბინა გაიყიდა. ამასთან, recov.ge-ს მონაცემებზე დაყრდნობით BM.GE იუწყება რომ, თბილისში ახალაშენებულ პრემიუმ სეგმენტის ბინებზე მოთხოვნა 77%-ით გაიზარდა, ხოლო მედიუმ სეგმენტში მაჩვენებლის 37%-იანი ზრდა დაფიქსირდა. რაც შეეხება ეკონომ სეგმენტს, ტრანზაქციების რაოდენობა 17%-ით, 3 800 ერთეულამდე შემცირდა.

თბილისში, გარეუბნებში ახალაშენებული ბინების საშუალო შეწონილი გასაყიდი ფასი 13%-ით გაიზარდა, ფართო ცენტრში - 14%-ით, ქალაქის ცენტრში კი 10%-იანი ზრდა დაფიქსირდა. რაც შეეხება ძველი ბინების ღირებულების ცვლილებას, გარეუბანში საშუალო შეწონილი გასაყიდი ფასი 8%-ით გაიზარდა, ფართო ცენტრში 4%-ით, ქალაქის ცენტრში კი 7%-იანი ზრდა დაფიქსირდა.

უცხოეთის, კონკრეტულად კი რუსეთის მოქალაქეების წილი საგრძნობლად დიდია თბილისში ბინების შეძენის თვალსაზრისით. სადაც, 2023 წლის პირველ 3 თვეში საქართველოში უცხოელების მიერ შეძენილი ბინების 42% რუსეთის მოქალაქეებზე მოდის. აღნიშნულის შესახებ ინფორმაციის BPN.GE აქვეყნებს, დეპუტატ ხათუნა სამნიძის მიერ იუსტიციის სამინისტროდან გამოთხოვილი ინფორმაციის საფუძველზე. მონაცემების თანახმად, 2023 წლის 3 თვეში საქართველოში უცხოელებმა 5 159 ბინა შეიძინეს, აქედან რუსეთის მოქალაქეებმა 2 187 ბინა იყიდეს, რაც 42,3%-ია.

ამავე მონაცემების მიხედვით, ასევე აქტიურობენ ისრაელის, უკრაინის, ბელარუსის, თურქეთისა და ირანის მოქალაქეები. სადაც, სტატისტიკა ასე ნაწილდება: ისრაელი - 671 ბინა, მყიდველთა რაოდენობა 472 ადამიანი; უკრაინა - 520 ბინა, მყიდველთა რაოდენობა 344 ადამიანი; ბელარუსი - 164 ბინა, მყიდველთა რაოდენობა 135 ადამიანი; თურქეთი - 143 ბინა, მყიდველთა რაოდენობა 102 ადამიანი; ირანი - 129 ბინა, მყიდველთა რაოდენობა 102 ადამიანი.

აღნიშნულზე დაყრდნობით, შეგვიძლია ვივარაუდოთ რომ მოვლენების ქვეყნის გარეთ თუ შიგნით თუ მდგომარეობა არ შეიცვლება, კვლავ გაიზრდება უცხოეთის, განსაკუთრებით კი რუსეთის მოქალაქეების ინტერესი. ასევე, მზარდი იქნება როგორც უძრავი ქონების ფასი და უცხოური - რუსეთის მოქალაქეების ინვესტიციის წილი საქართველოს უძრავი ქონების ბაზარზე, რომელიც ეხება როგორც ბინებს, ასევე კომერციულ თუ არაკომერციულ ფართებს და მიწის ნაკვეთებს საქართველოში.