რა უნარები სჭირდება უცხო ენების მასწავლებელს?

უცხო ენების მასწავლებელს სხვა ნებისმიერი მასწავლებლის მსგავსად, პროფესიონალიზმი და საკუთარი საქმის სიყვარული მოეთხოვება. უცხო ენის შესწავლა სხვადასხვა ასაკობრივი კატეგორიის ადამიანებს ცხოვრების სხვადასხვა ეტაპზე სჭირდებათ ხოლმე. ამიტომ, აუცილებელია, მასწავლებელმა სრულყოფილად იცოდეს ენა, რათა შეძლოს როგორც დაწყებითი კლასების ბავშვების მომზადება საბაზისო დონეზე, ასევე ზრდასრული ადამიანებისთვის სწავლება სხვადასხვა მოთხოვნების შესაბამისად.

უცხო ენას მუდმივად სჭირდება დახვეწა და ლექსიკონის გამდიდრება, რადგან ენა ცოცხალი ორგანიზმია და მუდმივად განიცდის ცვლილებებს. თავად მასწავლებლებსაც მუდმივად სჭირდებათ პრაქტიკა, ლექსიკონის განახლება, ახალი სიტყვების შესწავლა. იმ პედაგოგებს, რომლებიც პატარებთან მუშაობენ, გარდა უცხო ენის ცოდნისა, ასევე სჭირდებათ ბავშვებთან მიდგომის მეთოდების ცოდნა. ზოგიერთი ბავშვი შესაძლოა უცხო ენას საკუთარი ნების საწინააღმდეგოდ სწავლობდეს, არ მოსწონდეს კონკრეტული უცხო ენა და მშობლის ახირების გამო დადიოდეს მასწავლებელთან, ან არ აღმოაჩნდეს ენების მიმართ მიდრეკილება და თანატოლებისგან განსხვავებით რთულად შეეძლოს ათვისება. ასეთ დროს მნიშვნელოვანია ფსიქოლოგიური მიდგომაც, სწავლა თამაშის დახმარებით, მულტფილმებისა თუ საბავშვო ფილმების ყურება, ყურის გავარჯიშება მოსმენისათვის. მოსიყვარულე მასწავლებელი შეძლებს რომ ბავშვს უხაროდეს გაკვეთილზე მისვლა.

შედარებით მოზრდილი ასაკის მოსწავლეებთან სწავლის მეთოდები შეიძლება გამდიდრებული იყოს სხვადასხვა ტიპის ტესტებით, ვიქტორინების სახით, ასევე მოზარდებისთვის განკუთვნილი ფილმების ყურებითა და დისკუსიებით უცხო ენაზე, თანატოლების თანდასწრებით.

მოზრდილი მოსწავლეებისთვის ძირითადად კონკრეტული მიმართულების სწავლებაა ხოლმე საინტერესო. ინგლისური ენის შემთხვევაში, ხშირად ითხოვენ ბიზნეს-ინგლისურს, ამიტომ სპეციფიკური ლექსიკონი და ფრაზები აუცილებლად უნდა იცოდეს მასწავლებელმა და შესაბამისი პროგრამის შედგენა შეეძლოს მოსწავლეებისთვის. ასევე მოზრდილი და მოზარდი მოსწავლეები ხშირად, სასერტიფიკატო, დონის ასამაღლებელი გამოცდებისთვის ემზადებიან მასწავლებლებთან, ამიტომ მნიშვნელოვანია, რომ თითოეული მათგანის მოთხოვნის საპასუხოდ შესაბამისი პროგრამები ჰქონდეს შედგენილი თავისი სახელმძღვანელოებით, ტესტებითა და წინასწარ განსაზღვრული დროის მიხედვით, კონკრეტული დონის დასახურად.

უცხო ენის სწავლა ზოგჯერ სასაუბრო დონეზე სჭირდებათ ტურისტული მიზნებისთვის, ზოგჯერ სამსახურეობრივი დავალებების შესასრულებლად და უცხოელ პარტნიორებთან თუ კოლეგებთან საქმიანი კომუნიკაციისთვის, ზოგჯერ კი საზღვარგარეთ სწავლის გასაგრძელებლად და შესაბამისი დონის სერტიფიცირებისთვის. სერტიფიკატებიც არსებობს სხვადასხვა დონისა და სახეობის, შესაბამისად მასწავლებელი უნდა იყოს ორგანიზებული და შეეძლოს დროის სწორი მენეჯმენტი ჯგუფების შესადგენად და ერთნაირი დონისა და ინტერესების მქონე მოსწავლეების ადეკვატური რაოდენობის მქონე ჯგუფებში გასაერთიანებლად.

უცხო ენებში მომზადების მსურველებმა შესაბამისი განცხადებები შეგიძლიათ ss.ge-ს განათლების კატეგორიაში მოიძიოთ.