რა ხდება უძრავი ქონების ბაზარზე - ბინების ფასი კვლავ გაიზრდება

თუმცა, აქტივობის შემცირების მიუხედავად, უძრავი ქონების ფასის კლება არ შეინიშნება. ამავე კვლევის მიხედვით, საშუალო გასაყიდმა ფასმა ზრდა განაგრძო და 1,177 $/კვ.მ-ს გაუტოლდა, რაც წინა წლის მაჩვენებელს 32%-ით აღემატება. თიბისი კაპიტალის კვლევაში აღნიშნულია, რომ იმავე პერიოდში გასაქირავებელი ფასი წლიურად 52%-ით გაიზარდა, თუმცა წინა თვესთან შედარებით 1.6%-იანი კლება დაფიქსირდა და 12.8 $/კვ.მ შეადგინა.

უცხოურ კაპიტალზე ამახვილებს ყურადღებას ასევე ინფორმაციის თავისუფლების განვითარების ინსტიტუტის (IDFI) კვლევაც, სახელწოდებით, - „რუსული კაპიტალი და რუსული კავშირები ქართულ ბიზნესში“. IDFI-ის კვლევაში აღნიშნულია რომ  2022 წლის იანვრიდან-ნოემბრამდე რუსეთის მოქალაქეების წილი, თბილისში ბინის შესყიდვების ტრანზაქციებში 0.9%-დან 5%-მდე, ხოლო ბათუმში 5%-დან 17.6%-მდე გაიზარდა. 

2022 წლის 1 იანვრიდან 9 სექტემბრამდე რუსეთის მოქალაქეებმა საქართველოში 15 164 შენობა/ნაგებობა (მათ შორის, 13 262 ბინა) და 13 850 მიწის ნაკვეთი იყიდეს. ამის შესახებ IDFI საჯარო რეესტრის ეროვნული სააგენტოს მიერ გასაჯაროებულ მონაცემებზე დაყრდნობით წერს.

უძრავი ქონების გაძვირების ტენდენციაზე საუბრობენ ასევე დეველოპერები. კომპანია m²-ის გენერალური დირექტორის ნიკოლოზ მეძმარიაშვილის განცხადებით, მიმდინარე წელს უძრავ ქონებაზე ფასი 10-15%-ით კიდევ გაიზრდება. ამის შესახებ m²-ის გენერალურმა დირექტორმა გადაცემა „უძრავი ქონების პროსპექტში“ განაცხადა. მისივე თქმით, მოთხოვნის კლება არ ფიქსირდება და ამასთან, მზარდია თვითღირებულებაც.

ნიკოლოზ მეძმარიაშვილის თქმით, ბუმი 2022 წლის დასაწყისში, პირველ და მეორე კვარტალში, როდესაც უპრეცედენტოდ რაოდენობის უცხო ქვეყნის მოქალაქე შემოვიდა საქართველოში. რამაც პირველ რიგში ქირის ფასის ზრდა გამოიწვია, ხოლო შემდეგ როდესაც ისინი უძრავი ქონების ბაზარს გაეცნენ, მათ გასაყიდი უძრავი ქონების ათვისება დაიწყეს, რამაც გაზარდა ბინის ფასი. ის m²-ის სტატისტიკაზე დაყრდნობით აცხადებს რომ 2022 წლის იანვრიდან დღემდე საშუალო ფასის ზრდა 45%-ია. თუმცა, მომავალში ასეთ მკვეთრ ნახტომს აღარ ვარაუდობს და მიიჩნევს რომ ფასი ეტაპობრივად გაიზრდება.

ის ასევე გაძვირების სხვა ფაქტორებზეც საუბრობს, სადაც ერთ-ერთი მნიშვნელოვანი ადგილი თვითღირებულების გაზრდას უჭირავს. მისი თქმით, - ფასების ზრდას მშენებლობის თვითღირებულების ზრდაც იწვევს. „2019-დან დღემდე დაახლოებით 2-ჯერ არის ბეტონის და არმატურის ღირებულება გაზრდილი, ასევე 50%-ით მასალების ღირებულება, 30-40%-ით მუშახელის და კლების ტენდენცია არ ჩანს“ - აცხადებს ნიკოლოზ მეძმარიაშვილი. ის ასევე აღნიშნავს, რომ გაძვირებას ხელს ლარის კურსის გამყარებაც უწყობს, რამდენადაც დეველოპერებს სამშენებლო მასალებისთვის ანგარიშსწორება უცხოურ ვალუტაში უწევთ. რაც შესაბამისად ბინის ფასზეც აისახება. 

აღნიშნული ყველა მონაცემის საფუძველზე, შეგვიძლია ვივარაუდოთ რომ ბინის ფასების კლება აღნიშნულ წელს არ დაფიქსირდება, მიუხედავად იმისა, რომ შესაძლოა გაყიდვების მაჩვენებლის მიხედვით ბაზარი სულ უფრო დასტაბილურდეს. თუმცა, შესაძლებელია ნავარაუდევზე უფრო მეტი ნიშნულით მატება, რაც საგარეო ფაქტორებზე და ქვეყნის შიგნით მიმდინარე პროცესებზეა დამოკიდებული.