ინვესტიცია უძრავ ქონებაში: რისკები და პერსპექტივები

უძრავი ქონება კაპიტალია, რომელსაც მესაკუთრისთვის  ყოველთვის მოგება მოაქვს, თუკი მას სწორად გამოიყენებს. ინვესტიციის ჩადება ბინასა თუ მიწის ნაკვეთში ყოველთვის სწორი გადაწყვეტილებაა, მაგრამ გონივრულად სჭირდება შეფასება ყველა რისკსაც. ადამიანების ნაწილი უძრავ ქონებას ყიდულობს შემდგომი რეალიზაციის მიზნით, ვინაიდან უმეტესწილად მისი ფასი მზარდია და მოგებაში ტოვებს მესაკუთრეს, ზოგიც კი კომერციული მიზნისთვის იძენს ქონებას.

ნებისმიერ შემთხვევაში უძრავი ქონება რჩება კაპიტალად, რომლის საკუთრებაში ქონა ერთგვარ საიმედოობის განცდასაც აძლევს მესაკუთრეს და დროებითი საცხოვრებლის მუდმივი ძებნისგან ათავისუფლებს. როგორც აღვნიშნეთ, ხშირია შემთხვევები, როდესაც კომერციული მიზნებისთვის აქვთ უძრავი ქონება, ამ შემთხვევაში მას პერსპექტიულად უყურებენ და შემოსავლის წყაროდ იყენებენ. უნდა აღინიშნოს, რომ ყველა პერსპექტივას ახლავს თან გარკვეული რისკი, უბრალოდ ზოგჯერ ის იმდენად მცირეა, რომ ღირს გარისკვა და „შამპანურის დალევა.“ თვიურად გასაქირავებელი ბინების ფასი შედარებით სტაბილური შემოსავალია მესაკუთრისთვის და შესაბამისად, მისი ბინის დამქირავებლებიც გრძელვადიან ურთიერთობაში არიან მესაკუთრესთან. ბოლო პერიოდში საკმაოდ პოპულარული გახდა ბინებისა თუ კერძო სახლების გაქირავება დღიურად, წვეულებებისთვისა თუ მეგობრების შეკრებისთვის. ასეთი გარიგებებით შესაძლოა 3-5 დღის ვადაში მიიღოს მესაკუთრემ იმდენი შემოსავალი, რასაც სტაბილურ კლიენტზე თვიურად გაქირავების შემთხვევაში 1 თვის ჭრილში მიიღებდა. წინადადება ნამდვილად მომხიბვლელად ჟღერს, თუმცა მესაკუთრემ ინდივიდუალურად უნდა გადაწყვიტოს რისკი უფრო დიდია თუ სარგებელი.

რა პერსპექტივები აქვს უძრავ ქონებაში ინვესტიციას?

აუცილებლად გასათვალისწინებელია, რომ უძრავ ქონებაში გაქირავებისას ჩადებული ინვესტიცია მესაკუთრეს მნიშვნელოვანი მოგების სახით უნდა დაუბრუნდეს. იმისთვის, რომ ქონება პერსპექტივის წყაროდ იქცეს, თავდაპირველად საკმაოდ დიდი ფინანსური და დროის რესურსისა თუ შრომის გაღება მოგიწევთ. ბაზარზე კონკურენციის პირობებში კარგად უნდა შეისწავლოთ თქვენი სამიზნე აუდიტორიის მოთხოვნები, თქვენი უძრავი ქონების შესაძლებლობების მაქსიმუმიც კარგად უნდა გათვალოთ და შესაბამისად შეფუთოთ თქვენი შეთავაზება, რათა მეტი მომხმარებელი მოიზიდოთ.

მაგალითად, თუკი კერძო სახლი გაქვთ ქალაქში ან ქალაქთან ახლოს, შეგიძლიათ სხვადასხვა წვეულებებისთვის გააქირაოთ. დაბადების დღეები, ხელის თხოვნა, სქესის გაგების ცერემონიალი თუ მეგობრების უბრალო შეკრებები საკმაოდ გავრცელებული მიზეზებია მყუდრო, კეთილმოწყობილი და კომფორტული სახლის ქირაობისთვის. მით უფრო,  თუ ლამაზი ეზო და აუზიც გაქვთ.

პერსპექტიულია ასევე მზარდი ფასის პირობებში ქონების გადაყიდვის იდეაც. შეგიძლიათ ბინა შეიძინოთ ახალაშენებულ კორპუსში, გაარემონტოთ, აღჭურვოთ თანამედროვე ჩაშენებული ტექნიკით და შემდეგ გაყიდოთ ისეთ ფასად, რომ დაიბრუნოთ რემონტის ხარჯები და მოგებაც დაგრჩეთ. ბინას კი ნამდვილად შეიძენს ისეთი ადამიანი, რომელსაც სარემონტო სამუშაოების დისკომფორტის ატანა არ სურს და გამზადებული და გამოვნებიანი ბინა სჭირდება, ამისთვის კი მზად არის ცოტა მეტი გადაიხადოს, ვიდრე დისკომფორტში ყოფნა მოუწიოს.

შესაძლებელია ინვესტიცია მიწის ნაკვეთშიც. ამ შემთხვევაში სარფიანი წინადადება იქნება შედარებით დიდი ტერიტორიის შესყიდვა და მას შემდეგ რაც კვადრატულის ფასი მოიმატებს, ნაწილის გაყიდვა. ამ ვარიანტით თავადაც დაგრჩებათ ნაკვეთი, რომელზეც თუნდაც სახლს ააშენებთ ან სხვადასხვა მცენარეებს დარგავთ და ასევე მიიღებთ შემოსავალსაც, რომელმაც შესაძლოა სწორედ აღნიშნული სახლის აშენება დაგიფინანსოთ. ასევე, მოიმატებს ნაკვეთის ფასი იმ შემთხვევაშიც, თუკი თქვენ შეიყვანთ კომუნიკაციებს და მომავალ მფლობელს აღარ მოუწევს ამაზე ზრუნვა.

რა რისკები გავითვალისწინოთ?

როგორც აღვნიშნეთ, პერსპექტივა რისკის გარეშე არ არსებობს. შესაბამისად, თქვენ უნდა აწონ-დაწონოთ რამდენად მნიშვნელოვანი რისკის წინაშე შეიძლება აღმოჩნდეთ.

მაგალითად, თუკი დღიურად გაქირავების იდეას გაყვებით, აუცილებლად გაითვალისწინეთ, რომ განსაკუთრებით წვეულებების დროს, აუცილებლად დაგხვდებათ სახლში რაიმე სახის დაზიანება. შესაძლოა ეს იყოს გატეხილი ჭურჭელი, ღვინის ან ცხიმიანი საკვების ლაქები რბილ ავეჯზე და სხვა. ყოველი ახალი გაქირავებისას ბინა/სახლი მწყობრში უნდა მოიყვანოთ, შეავსოთ დაკლებული ნივთები (მაგ. ჭურჭელი), დაასუფთაოთ სახლი, რაშიც შესაძლოა დამხმარეც დაგჭირდეთ. უმჯობესი იქნება, თუ ერთსა და იმავე დამხმარეს შეუთანხმდებით რეგულარულ დალაგებაზე, ამით ფინანსებსაც დაზოგავთ და სტაბილურად ითანამშრომლებთ კონკრეტულ ადამიანთან.

ფინანსური რისკების კუთხით, გირჩევთ, რომ კანონის ფარგლებში ქირავნობის ხელშეკრულება გამოიყენოთ და ყველა პროცესი ლეგალურად წარმართოთ. ხელშეკრულებაშივე შეგიძლიათ გაითვალისწინოთ შესაბამისი პუნქტები ქონების დაზიანების შემთხვევაში მისაღები ზომების შესახებ.