რა ამოცანები და მოვალეობები ეკისრებათ უძრავი ქონების აგენტებს?

უძრავი ქონების გაყიდვის, შესყიდვის თუ იჯარის სახით გაცემის/მიღების თაობაზე   ხელშეკრულების დადება, მაღალი ფინანსური რისკიდან გამომდინარე, ფრთხილ და გეგმაზომიერ მიდგომას საჭიროებს. ნებისმიერი პირის ინტერესია ისეთი ხელშეკრულების გაფორმება,რომელიც  დროის მოკლე მონაკვეთში მაქსიმალური შემოსავლის გენერირებას  შეუწყობს ხელს.  გარიგების ორ მხარეს შორის წარმოშობილი მცირე მისკომუნიკაციაც კი შეიძლება ძალიან დიდ ფინანსურ ზარალში გადაითარგმნოს. სწორედ ამ სირთულეებისა და რისკების შესამცირებლად არსებობენ უძრავი ქონების აგენტები.

უძრავი ქონების აგენტებ კლიენტებს ეხმარებიან შეიძინონ, იქირავონ ან გაყიდონ ქონება. ისინი განუმარტავენ კლიენტებს დროის კონკრენტულ მონაკვეთში არსებულ საბაზრო პირობებს, ატარებენ ინსტრუქციებს, უწევენ ხელმძღვანელობას ხელშეკრულების დადების პროცესთან დაკავშირებულ მოლაპარაკებებს.

უძრავი ქონების აგენტებს ბაზრის კვლევისა და მოლაპარაკებების წარმოების განსაკუთრებული უნარ-ჩვევები უნდა გააჩნდეთ. როგორც წესი, ნებისმიერი კლიენტი მზად არის გადაიხადოს მაღალი ჰონორარი უძრავი ქონების აგენტისთვის, თუკი უძრავი ქონების რეალიზაცია/შესყიდვა ოპტიმალურ დროში ოპტიმალურ ფასად მოხდება.

უძრავი ქონების აგენტის უპირველესი ამოცანაა, გონივრულად განსაზღვროს ქონების საბაზრო ღირებულება,რაც მუდმივ კვლევა-ძიებას და ცვლილებებთან ინფორმაციულ ადაპტირებას,ასევე გარკვეული ფინანსური პროგნოზების გაკეთებას გულისხმობს. პირობითად, უძრავი ქონების აგენტს გამომუშავებული უნდა ჰქონდეს უნარები, რომელთა მეშვეობითაც იგი შეძლებს იმ ფაქტორების იდენტიფიცირებას (მაგალითად ტურისტების რიცხვის ზრდა რეგიონში) რაც მოკლევადიან პერიოდში გავლენას ახდენს ქონების ღირებულების ცვლილებაზე.

გარდა ამისა,  წარმატებული ოპერაციების განსახორციელებლად, უძრავი ქონების აგენტები თავიანთ კლიენტებთან ნდობის მაღალი ხარისხით უნდა სარგებლობდნენ. ამისთვის კი მნიშვნელოვანია, რომ ნებისმიერი ფორმით კომუნიკაცია გულწრფელობასა კეთილსინდისიერების პრინციპებს ეფუძნებოდეს

უძრავი ქონების აგენტის ამოცანები და მოვალეობები მოიცავს:



კონსულტაციას-  აგენტმა კლიენტს უნდა შეუქმნას ადეკვატური წარმოდგენა ბაზარზე არსებული ვითარების შესახებ და განსაზღვროს კონკურენტუნარიანი ფასი უძრავი ქონებისთვის. თუკი კლიენტს წარმოადგენს პირი, რომელსაც უძრავი ქონების რეალიზაცია/იჯარით გადაცემა სურს,მაშინ მას უძრავი ქონების აგენტმა უნდა შეუქმნას ადეკვატური წარმოდგენები ქონების ძლიერ და სუსტ მხარეებთან, ასევე მოსალოდნელ პროგნოზებთან დაკავშირებით. პირობითად,  ქონების ღირებულებაზე შესაძლოა გავლენას ახდენდეს მეზობლად არსებულ უბანში დაწყებული ბიზნეს პროექტი ან მიმდინარე მშენებლობა. უძრავი ქონების აგენტმა უნდა მოიძიოს ყველა რელევანტური ინფორმაცია ამ პროექტების შესახებ და განჭვრიტოს მისი გავლენა საფასო პოლიტიკის ფორმირების პროცესზე. კონსულტაციის ეტაპზე მნიშვნელოვანია რომ კლიენტს ადეკვატური წარმოდგენები შეექმნას შესაძლო ფინანსური ხეირის მოცულობასთან დაკავშირებით.

ბაზრის კვლევა და ფასის შემუშავება -  უძრავი ქონების აგენტმა კარგად უნდა შეისწავლოს სარეალიზაციოდ გამზადებული ქონება, მისი კონკურენტული უპირატესობა თუ ის ფაქტორები რაც შესაძლოა ნეგატიურ გავლენას ახდენდეს ქონების ღირებულებაზე ან აჭიანურებდეს მოლაპარაკებებს. ასევე მას გარკვეული წარმოდგენა უნდა ჰქონდეს დროის კონკრეტულ მონაკვეთში და ახლო მომავალში უძრავი ქონების ბაზარზე მიწოდების და მოთხოვნის მრუდების თანაფარდობაზე. ბაზრის კვლევის შემდეგ კი კლიენტთან შეთანხმებით შეიმუშავოს ქონების რეალიზაციის/იჯარის წესით გაცემის ოპტიმალური ფასი.

ლიდების გენერირება - აგენტმა უნდა აითვისოს ყველა ციფრული პლატფორმა, რომელიც პირებს დააინტერესებს უძრავი ქონებით. ამისთვის მნიშვნელოვანია, რომ ზუსტად შეირჩეს პოზიციონირების ფორმა. ყურადღება უნდა მიექცეს ისეთ დეტალებს, როგორებიცაა, განცხადების აღწერისას გამოყენებული ტერმინოლოგია, ფოტო-ვიდეო მასალა, რომლითაც წარმოჩენილია ქონება. განცხადებაში ნახსნები უნდა იყოს ყველა ის პუნქტი ,რომელიც ციფრული პლატფორმის მომხმარებელს გაუმარტივებს გადაწყვეტილების მიღებას. გარდა ციფრული პლატოფმრების ათვისებისა, აგენტის მხრიდან  ეფექტიანი ნაბიჯების გადადგმა გულისხმობს პოტენციური კლიენტების ბაზის ფორმირებასა და მათთან უშუალო კონტაქტის დამყარებას (პირისპირი შეხვედრებისა თუ ტელეფონით კომუნიკაციის მეშვეობით)

სამართლებრივი უსაფრთხოების უზრუნველყოფა- უძრავი ქონების აგენტის ვალდებულებაა, რომ  გააჩნდეს სრულყოფილი ცოდნა კანონმდებლობის მოთხოვნების შესახებ და უზრუნველყოს გარიგების ორივე მხარის სათანადო ინფორმირება, მისკომუნიკაციიდან მომდინარე შესაძლო გაუგებრობის პრევენციისთვის. სამართლებრივი უსაფრთხოება ორი კომპონენტისგან შედგება:1.წინასახელშეკრულებო ურთიერთობა 2. სახელშეკრულებო ურთიერთობა. წინასახელშეკრულებო ურთიერთობის მიზანია პირთა შეთანხმება- დაიდოს ხელშეკრულება. ეს გულისხმობს აგენტის მიერ მყიდველისთვის ყველა საჭირო ინფორმაციის მიწოდებას, ქონების აღწერილობისა და მისი რეალური მდგომარეობის შესაბამისობის დამოწმებას. სახელშეკრულებო ურთიერთობის ფარგლებში კი უძრავი ქონების აგენტმა უნდა უზრუნველყოს კანონმდებლობასთან შესაბამისობაში არსებული სახელშეკრულებო ფორმის შედგენა და მასში ყველა რელევანტური პუნქტის გათვალისწინება. საჭიროების შემთხვევაში კი დამაყაროს კომუნიკაცია ნოტარიუსთან ან საჯარო რეესტრის ეროვნულ სააგენტოსთან.