ზამთრის ბაღის დიზაინი – საუკეთესო მცენარეები საქართველოში

მცენარეთა მრავალი სახეობა ადაპტირდება ცივ ტემპერატურასთან, ხოლო ზოგი სიცივეში ყვავის. ამ სტატიაში მოცემულია ყველაფერი, რაც უნდა იცოდეთ, რათა სრულყოფილი ბაღი შექმნათ, რომელიც ესთეტიკურ სიამოვნებას მოგანიჭებთ და სიმწვანით აავსებს თქვენს გარემოს, ამინდის მიუხედავად.

ზამთრის სეზონზე ბაღის მოწყობის თავისებურებები

იმისთვის, რომ ბაღი ზამთრის სეზონზეც შესანიშნავად გამოიყურებოდეს,  კარგად დაგეგმილი გამწვანება სასურველია მოიცავდეს სხვადასხვა ბუჩქოვანი, ფართოფოთლოვანი და წიწვოვანი მცენარის კომბინაციას. და ლანდშაფტის ელემენტების მდიდარ კომპოზიციას. 

მცენარეები შეგიძლია სიმაღლის მიხედვით, ტექსტურებით, ფერებით და აყვავების დროით განათავსოთ ბაღში, რომლებიც სასიამოვნო ლანდშაფტს შექმნიან მთელი წლის განმავლობაში. ასევე, შესაფერის მცენარეებთან კომბინაციაში, ბუნებრივი ქვებისა და ხისგან დამზადებული დიზაინის ელემენტები განსაკუთრებულ შტრიხებს შემატებს ბაღს.

რომელი მცენარეები იქნება შესაფერისი ზამთრის ბაღისთვის

ბევრი მცენარე, ზამთარში ავლენს თავის საუკეთესო მახასიათებლებს და ზამთრის ბაღისთვის საუკეთესო დეკორაცია შეიძლება გახდეს. მარადმწვანე მცენარეების უმეტესობა, როგორიცაა ფიჭვი, ნაძვი და კედარი ზამთარში, თოვლში ბრწყინვალედ გამოიყურებიან. 

მიუხედავად იმისა, რომ წიწვოვანი მცენარეები ზამთარში უფრო ნელა იზრდებიან, ისინი სათანადო მოვლის, მორწყვით და საჭირო სასუქების გამოყენებით, შეგიძლიათ შესანიშნავ დამატებით ელემენტად აქციოთ. ხოლო, რამდენიმე წელიწადში ისინი დომინანტურ როლს დაიკავებენ.

კოლხური ბზა კიდევ ერთი მცენარეა, რომელიც შეგიძლიათ თქვენს ზამთრის ბაღში განათავსოთ. ამასთანავე, ამით თქვენ ხელს შეუწყობთ უიშვიათესი ქართული ენდემური სახეობის გადარჩენას. კოლხური ბზა (Buxus colchica) მარადმწვანე, დეკორატიული მცენარეა. ბზის მოპოვება შესაძლებელია მხოლოდ კერძო საკუთრებაში არსებული სანერგეებიდან და ხელოვნურად გაშენებული პლანტაციებიდან.

ბზას ასევე, ხშირად „კავკასიურ პალმასაც“ უწოდებენ. დედამიწაზე ბზის 70-მდე სახეობა. აქედან კავკასიაში ბუნებრივად ხარობს 2 სახეობა - კოლხური ბზა და ჰირკანული ბზა. 

აღსანიშნავია, რომ ბზა ერთდროულად სითბოსა და ჩრდილის მოყვარული მცენარეა. ის რელიქტურია, დედამიწაზე 30 მილიონი წლის წინ უკვე ხარობდა და სასტიკ კატაკლიზმებს გადაურჩა, მათ შორის გამყინვარებასაც. კოლხური ბზა, რომელიც დასავლეთ საქართველოს ენდემია, სხვა, უფრო მაღალი ხეების ჩრდილში ხარობს. მისი გავრცელების არეალია: იმერეთი, სამეგრელო, ზემო სვანეთი და რაჭა.

იაპონური ნეკერჩხალი, ასევე შესანიშნავი გადაწყვეტილება იქნება ზამთრის ბაღისთვის. იაპონური, ანუ წითელი ნეკერჩხლის მუქი ბორდოსფერი ფოთოლი შემოდგომაზე ალისფერ-აგურისფერი ხდება. აზიიდან ეს მცენარე ევროპაში მეჩვიდმეტე საუკუნეში მოხვდა.

ადვილად იტანს ჩრდილს, თუმცა უყვარს განათებული ადგილი და სწრაფად იზრდება თუ ნაყოფიერ ნიადაგში ჩარგავთ. ნიადაგი უნდა იყოს ფხვიერი, ქვიშიანი თიხნარი, ტორფის ნიადაგი ან ღია თიხნარი. არ უყვარს ქარი. იზრდება 3-დან 5 მეტრამდე.

როგორ დავაპროექტოთ ზამთრის ბაღი

მარადმწვანე მცენარეებისა და დელიკატურად შერჩეული კენკრის კომბინაცია კარგი გადაწყვეტილება იქნება ზამთრის ბაღისთვის. ფერების განაწილება მნიშვნელოვანია, მათ შორის მწვანეს სხვადასხვა ელფერი. ამასთანავე, გაითვალისწინეთ რომ ბაღი, ერთდროულად სასიამოვნოც უნდა იყოს აღსაქმელად და ფუნქციონალურიც.

ყურადღება მიაქციეთ ხედის სიღრმეებს, პროპორციებსა და სხვა მახასიათებლებს, რომლებიც შეიძლება ჩანდეს სხვადასხვა წერტილიდან. ლანდშაფტის დაგეგმარებისას ასევე გაითვალისწინეთ წელიწადის თბილი თვეები. ასევე, დიდი ყურადღებით უნდა მეკიდოთ იმ ნაწილს, რომელიც ფანჯრიდან გამოჩნდება. ნუ შეგეშინდებათ დიზაინის ისეთი ელემენტების დამატება, როგორებიცაა სკამები, ქანდაკებები, მცირე შადრევანი, ლამპიონები თუ სხვა.