რა უნდა გავითვალისწინოთ ზამთრის ბაღის მოვლისას

როდესაც სახლის შემოგარენს მცენარეები გვიმშვენებს, აუცილებელია ვიცოდეთ, თუ როგორ მოვუაროთ მათ წელიწადის ნებისმიერ სეზონზე, განსაკუთრებით კი - ზამთარში, რომ არ გაიყინონ. უპრიანია, თუკი გვეცოდინება, თუ რომელი მათგანი ჯობს, რომ შევარჩიოთ კლიმატური პირობებიდან გამომდინარე. რჩევებისთვის ss.ge ბაღების დიზაინერ, გეოლოგ თემურ გურეშიძეს ესაუბრა, რომელსაც ლანდშაფტური დიზანის, პროექტირების, ბაღის გაშენებისა და მოვლის მრავალწლიანი გამოცდილება აქვს.

- რა უნდა გავითვალისწინოთ ბაღის, ან - დეკორატიული ბაღის მოვლისას ზამთარში, თბილისის კლიმატურ პირობებში?

- მცენარეები ზამთრის დასაწყისისთვის უნდა გავანთავისულოთ ხმელი და არასწორად მიმართული ტოტებისაგან, უნდა შევჭრათ ისინი. ასევე, უნდა შემოვაცალოთ ხმელი ქერქი დიდ ხეებსა და ხეხილს. შევამოწმოთ შტამბიანი მცენარეების გამაგრება, ხომ არ დაზიანდა ისინი და დზიანების შემთხვევაში ხელახლა გავამაგროთ. ასევე, შევამოწმოთ ახალდარგული მცენარეების გამაგრება.

თემურ გურეშიძის რჩევით, აუცილებელია ხე-ბუჩქების ძირების მულჩირება მათი შემობარვის შემდეგ.  მულჩირება ნიშნავს ნიადაგის მოშიშვლებული ნაწილის გადაფარვას სხვადასხვა საშუალებებით. ეს საშუალებები შეიძლება იყოს გადამწვარი ნაკელი, ნახერხი, ხის ქერქის მულჩი ან სხვა მასალა (გააჩნია რომელ მცენარეს უტარდება სამუშაოები).

- რომელი მცენარეებია მარადმწვანე, რომელიც ეზოს ზამთარშიც დაგვიმშვენებს?

- მარადმწვანე მცენარეებიდან შეიძლება ავირჩიოთ - წიწვოვნებიდან - სხვადასხვა სახის ტუიები, ღვიები, ჯუჯა ფიჭვები და ნაძვები, უთხოვარი.ფოთლოვნებიდან -ბზა,  ზეთისხილი, ფშატი, ძახველი, წვრილფოთოლა კვიდო, ჭყორი, ფოტინია დასხვა.

 - თბილისის შემოგარენში რომელი ხე-მცენარეებია რეკომენდებული დეკორატიული ეზოს მოსაწყობად?

- თბილისის შემოგარენში, სადაც ტემპერატურა ეცემა -15 -20 გრადუსამდე, შეიძლება დაირგოს - ნაძვები, ტუიები, ღვიები, ფიჭვები, კვიპაროსები, უთხოვრები, ჩიტაკომშები, ჭყორი, კოწახური, ბზა, ფშატი და სხვ.

-რა დამატებითი პროცედურები სჭირდებათ მცენარეებს ზამთარში, სხვა სეზონებისგან განსხვავებით?

- ზამთარში სხვა სეზონებისგან განსხვავებით განსახორციელებელი ძირითადი პროცედურებია - ქარისაგან და თოვლისაგან დაცვა. ესაა- მცენარეთა გამაგრება, თოვლის შემთხვევაში  მისი ჩამოფერთხვა, რომ ტოტები არ დაუზიანოს. ასევე ზამთრის პერიოდში მცენარეების ირგვლივ და კომპოზიციებში აუცილებელია მიწის ჩაბარვა და გაფხვიერება.

გარდა უშუალოდ მცენარეების მოვლისა, თემურ გურეშიძე ბაღების მფლობელებს კიდევ ერთ მნიშვნელოვან რჩევას აძლევს - „კარგი იქნება თუ ჩიტებისთვის მოაწყობთ მათ დასაპურებელ კუთხეებს. ეს უნდა გაკეთდეს ბაღის  მყუდრო ადგილას, ისე რომ წვიმამ და თოვლმა არ დააზიანოს. ჩიტებს უყვართ მზესუმზირა, ფეტვი, პურის ნაფშვენი. თუ თქვენ ჩიტებს ასე დაიმეგობრებთ, ისინი გაზაფხულიდან შემოდგომამდე თქვენს ეზოს არ მოშორდებიან და მავნებლების განადგურებაში დიდ როლს შეასრულებენ.“