როგორ გავარჩიოთ "კარგი" და "ცუდი" ვაკანსიები?

 თუ სამსახურს აქტიურად ეძებთ, ან ამის გამოცდილება წარსულში ერთხელ მაინც გქონიათ, თავადაც შენიშნავდით, რომ ონლაინ პლატფორმებზე განთავსებული ვაკანსიები ერთმანეთისგან რადიკალურად განსხვავდება. ზოგ ვაკანსიაში დეტალურად არის აღწერილი, თუ რა ვალდებულებები გექნებათ დასაქმების შემთხვევაში, ზოგან კი ისიც გაუგებარია, კადრს რა პოზიციისთვის ეძებენ. სამომავლოდ, შედარებით საეჭვო და გაუმართავი ვაკანსიების თვალიერებაში დრო და ენერგია რომ არ დაკარგოთ, აი, რაზე უნდა გაამახვილოთ ყურადღება:

1. სახელფასო დიაპაზონი
 ხშირია შემთხვევები, როცა მთელ ვაკანსიას გულდასმით წავიკითხავთ, თუმცა ხელფასის შესახებ სიტყვაც კი არ არის ნახსენები ან მითითებულია, რომ გამოცდილების შესაბამისად განისაზღვრება. ასეთ შემთხვევაში, CV-ს გაგზავნამდე კომპანიას თავად შეგიძლიათ დაუკავშირდეთ და გაიგოთ, დაახლოებით რა მოლოდინები უნდა გქონდეთ. თუ პასუხს მაინც ვერ მიიღებთ, გასაუბრების ლოდინში დროის დაკარგვა ნამდვილად აღარ ღირს. შესაძლებელია, ვაკანსიაში კონკრეტული ხელფასი არ ეწეროს, თუმცა სახელფასო დიაპაზონი მითითებული იყოს, რაც დასაქმების მსურველს წინასწარ წარმოდგენას უქმნის. ხელფასის შესახებ ინფორმაციის დაზუსტება გასაუბრების დროსაც შეგიძლიათ, რაც გადაწყვეტილების მიღებაში თქვენც და რეკრუტერსაც დაგეხმარებათ.

2. ინფორმაცია დამსაქმებლის შესახებ
 სამუშაო ვალდებულებებისა და ბენეფიტების გარდა, ახალი სამსახურის დაწყებისას გარემოც მნიშვნელოვან როლს ასრულებს. სრულყოფილ ვაკანსიაში კომპანიის საქმიანობა მოკლედ უნდა იყოს აღწერილი. დაინტერესების შემთხვევაში კი, ინტერნეტის მეშვეობით კომპანიის შესახებ თავად ნახავთ დამატებით ინფორმაციას, მაგალითად, ადგილმდებარეობას, სოციალურ ქსელებში აქტივობებს და ასე შემდეგ. თუ ვაკანსიაში დამსაქმებელი კომპანიის სახელწოდება მითითებული არ არის, ან აღნიშნული დასახელების მქონე კომპანიაზე ინფორმაციის მოძიება ვერ შეძელით, ეს უკვე გარკვეულ პრობლემაზე მიუთითებს. ამის შემდეგ, თუ მათთან დაკონტაქტებაც ვერ შეძლებთ, სჯობს, სხვა ვაკანსიაზე გადაერთოთ.

3. მოვალეობების აღწერა
 ერთ-ერთი მთავარი ფაქტორი, რომლის მიხედვითაც ვწყვეტთ, გავგზავნოთ თუ არა ვაკანსიაზე CV, სწორედ ჩვენი სამომავლო მოვალეობებია. ვალდებულებების გაცნობისას შემდეგ ფაქტორებს უნდა დააკვირდეთ: რამდენად შეესაბამება მოვალეობები იმ კადრის საქმიანობას, რომელსაც კომპანია ეძებს და რამდენად შესაძლებელია, რომ ყველა ვალდებულებას თავი მხოლოდ ერთმა ადამიანმა გაართვას. თუ ვაკანსიაშივე ჩანს, რომ ერთ ადამიანს 3 სხვადასხვა პოზიციაზე მყოფის ვალდებულებების შეთავსება მოუწევს, ალბათ, პასუხი უკვე თქვენთვისაც გასაგებია. ხშირია შემთხვევები, როცა კომპანიები მიუთითებენ, რომ ჩამოთვლილის გარდა "კიდევ სხვა" დავალებების შესრულებაც იქნება საჭირო, რაც СV-ის გაგზავნამდე სჯობს გადაამოწმოთ, რათა გასაუბრებაზე დრო ტყუილად არ დაკარგოთ.

4. ბენეფიტები
 იმ დამსაქმებლების უმეტესობა, რომლებსაც თანამშრომლებისთვის კომფორტული გარემოს შექმნას სურთ, მათ ფიზიკურ თუ მენტალურ ჯანმრთელობაზეც ზრუნავენ. ამიტომ, ბენეფიტების სახით, ბევრი კომპანია დასაქმებულებს სამედიცინო დაზღვევას, FitPass-ს, კომპანიის შიდა ფასდაკლებებს თუ სხვა უპირატესობებს სთავაზობს. თუ ვაკანსიაში მსგავსი ინფორმაცია მითითებულია, მაშინ პირველი შთაბეჭდილებით, მშვენიერი კომპანია შეგირჩევიათ. იმ შემთხვევაში, როცა ასეთ ბენეტიფებზე ვაკანსიაში არაფერია ნათქვამი, შეგიძლიათ, ინფორმაცია დამსაქმებელ კომპანიასთან თავად გადაამოწმოთ, პასუხის შემდეგ კი, CV-ის გაგზავნის გადაწყვეტილებაც უფრო გაგიმარტივდებათ.