ხელოვნური ინტელექტის მქონე 5 პლატფორმა, რომელიც სწავლას გაგიმარტივებს

640

04.07.2024 16:05:22

ბოლო რამდენიმე წელია, ხელოვნური ინტელექტი ჩვენი ცხოვრების განუყოფელი ნაწილი გახდა. ხელოვნური ინტელექტის დახმარებით, ნებისმიერ მსურველს შეუძლია ყოველდღიური რუტინა გაიმარტივოს და უფრო მეტიც, კომპლექსურ საკითხებზე ამომწურავი პასუხებიც მიიღოს. ამისთვის კი საჭიროა, ხელოვნური ინტელექტის მქონე პლატფორმებს კარგად იცნობდე და მათი ფუნქციონალების სწორად გამოყენება შეგეძლოს. ხოლო მათ, ვისაც ხელოვნური ინტელექტის დახმარებით სწავლის ხარისხის გაუმჯობესება სურს, შემდეგ 5 პლატფორმას შეუძლია ეწვიოს:

ChatGPT

ChatGPT დღეს ერთ-ერთი ყველაზე პოპულარული და მრავალფუნქციური ხელოვნური ინტელექტის მოდელია, რომელთან კომუნიკაციაც ძალიან მარტივია. სწავლის მიზნებიდან გამომდინარე, ChatGPT-ს შეგიძლია თეორია აახსნევინო, ტერმინის განმარტება სთხოვო, კონკრეტულ საკითხზე მაგალითები მოაფიქრებინო და ა.შ., პასუხს კი წამებში დაგიბრუნებს. მოკლედ, ChatGPT შენი მასწავლებელი მალე გახდება, რომელიც ნებისმიერი სფეროდან შეკითხვაზე პასუხის გაცემაში დროსა და ენთუზიაზმს არ დაიშურებს.

ChatPDF

თუ დიდი მასალის წაკითხვა დაგავალეს და გამოცდამდე ცოტა დრო გაქვს დარჩენილი, ამ შემთხვევაში ChatPDF-ს შეგიძლია მიმართო. ეს პლატფორმა საშუალებას გაძლევს, შენთვის სასურველი PDF ფაილი ატვირთო, შემდეგ კი ხელოვნურ ინტელექტს წიგნში განხილული საკითხების შეჯამება და კონკრეტულ კითხვებზე პასუხი სთხოვო. ChatPDF დეტალების მოძიების დროს დაგიზოგავს და დაგეხმარება კონკრეტული მიმართულებით ცოდნა გაიფართოო, შედეგად კი უკვე ნაცნობ საკითხებს ახლებურად გაიაზრებ.

მცდარბეჭდილმძებნი

თუ დავალება, შუალედური ან სხვა სახის ტექსტი მაღალ დონეზე გსურს დაწერო, გრამატიკული შეცდომები მინიმალურ დონეზე უნდა დაიყვანო. ამაში კი მცდარბეჭდილმძებნი დაგეხმარება, რომელიც მართლწერის შეცდომებსაც აღმოგაჩენინებს და გრამატიკულად მცდარ სიტყვებსაც გაგისწორებს. ამისთვის კი შენ მიერ დაწერილი ტექსტი spellchecker.ge-ის ვებგვერდზე უნდა ჩასვა და შეცდომების შემოწმების ღილაკს დააჭირო.

Otter.ai

ონლაინ ლექციები დღეს ცოდნის მიღების ერთ-ერთი მნიშვნელოვანი წყაროა. Otter.ai დაგეხმარება, რომ ლექციის მოსმენისას მაქსიმალურად ყურადღებით იყო და ჩანიშვნების გასაკეთებლად დრო აღარ დახარჯო. Otter.ai აუდიო მასალას ტექსტად აქცევს, რომელსაც შეგიძლია მოკლე დროში გადაავლო თვალი და მნიშვნელოვანი პუნქტები უკეთ დაიმახსოვრო. ამასთანავე, Otter.ai მიმდინარე დიალოგსაც ტექსტის სახით აგიკრეფს, თუ მსგავსი ფუნქციის გამოყენება დაგჭირდება.

Canva

აუდიტორიაზე კარგი შთაბეჭდილების მოსახდენად ორატორულ უნარებთან ერთად, ვიზუალურად დახვეწილი პრეზენტაციაც საჭიროა. თუ ერთფეროვანი სლაიდები შენთვისაც მოსაწყენია, Canva-ს დახმარებით ვიზუალურად გამართულ პრეზენტაციას მარტივად ააწყობ. Canva-ს მრავალფეროვანი ხელსაწყოების მეშვეობით, აუდიტორიას საკითხის აღქმაც შეგიძლია გაუმარტივო და შენი იდეები უფრო მიმზიდველად გაუზიარო. ასე რომ, თუ პრეზენტაციების კეთება ხშირად გიწევს, Canva შენი შეუცვლელი დამხმარე გახდება.

ტექნოლოგიების საუკუნე ხელოვნური ინტელექტის სახით უნიკალურ ხელსაწყოს გვთავაზობს, რომელთან ადაპტაციაც ცოდნის გაღრმავების შესაძლებლობას მრავალი მიმართულებით იძლევა. თუ ცხოვრების ამ ეტაპზე შენთვის სწორედ სწავლაა პრიორიტეტული, ეს პლატფორმები და SS.ge-ის განათლების კატეგორია დაგეხმარება მაქსიმალურად მოკლე დროში მეტი ინფორმაცია მიიღო, სწავლის პროცესში პროდუქტიულობა გაზარდო და შრომის ბაზარზე მეტად კონკურენტუნარიანი გახდე.