რა უპირატესობები აქვს სახლის ყიდვას ზაფხულში?

ზაფხულის ცხელ სეზონზე უძრავი ქონების ბაზარზე აქტიურდება გაქირავების სერვისი, რადგან ადამიანები დასასვენებლად მიდიან და ხშირ შემთხვევაში მთელი სეზონითაც კი ქირაობენ ხოლმე აგარაკებს ქალაქგარეთ. საკურორტო სეზონზე გაქირავების სერვისი აქტუალურია განსაკუთრებით ზღვისპირეთში ან მაღალმთიან რეგიონებში, სადაც მარტივად არის შესაძლებელი სიცხისგან თავის დაღწევა. თუმცა აუცილებლად უნდა გვახსოვდეს, რომ ამ სეზონზე ახალი ბინის ყიდვა მყიდველისთვის შესაძლოა საკმაოდ ხელსაყრელი პირობებით იყოს შემოთავაზებული.

ზაფხულის სეზონზე გაყიდვები მცირდება, რაც უძრავი ქონების ფასებზეც აისახება და დეველოპერული კომპანიებიც არ იშურებენ სეზონურ აქციებს. გამყიდველები მოტივირებული არიან, რომ გარიგებები სეზონის ბოლომდე დახურონ და შესაბამისად, მეტი უძრავი ქონება გაყიდონ. რატომ უნდა იყიდოთ ბინა ზაფხულში? პირველ რიგში შეღავათიანი ფასების გამო, მეორეც, თუკი ახალ ბინაში რემონტს აპირებთ, რემონტის გასაკეთებლად ზაფხულის სეზონზე არ გაჭიანურდება გაშრობის პროცესი, ასევე ზამთრისგან განსხვავებით, როდესაც კარ-ფანჯარის შეცვლას გადაწვეტთ, სახლში ტემპერატურა არ დაეცემა, რაც გამორიცხავს იატაკის საფარისა და შპალერის დაზიანებასაც. ასევე თითქმის შეუზღუდავად გამოიყენებთ სარემონტო მასალების უმეტესობას.

თუკი თავად გაქვთ უძრავი ქონების გაყიდვა გადაწყვეტილი, სახლები ხშირად, ყველაზე უკეთ სწორედ ზაფხულის პერიოდში გამოიყურება - აყვავებული ბაღებით და კარგად მოვლილი ეზოებით, რაც გააადვილებს ქონების სრული პოტენციალის ვიზუალიზაციას. ზაფხულის გრძელი დღეები ასევე მოგცემთ საშუალებას თქვენი გასაყიდი უძრავი ქონების სანახავად ვიზიტი უფრო მოქნილად დაგეგმოთ კლიენტებთან, ასევე ბინის მაძიებლებიც უფრო დიდი დროის მონაკვეთში შეძლებთ სახლის დღის შუქზე დათვალიერებას. გარდა სახლის ვიზუალური მხარის უკეთ შეფასებისა, ზაფხულის პერიოდში ადამიანები უფრო გვიანობამდე რჩებიან გარეთ, რაც საშუალებას მოგცემთ თქვენთვის სასურველი უძრავი ქონების სამეზობლო და გარემოცვაც მარტივად შეაფასოთ, შეხვდეთ პოტენციურ მეზობლებს, გაიცნოთ ისინი და წარმოდგენა შეგექმნათ იმ გარემოზე, სადაც თქვენი მომავალი სახლი მდებარეობს.

კიდევ ერთი ბენეფიტი, რის გამოც შესაძლოა ხელსაყრელი იყოს ზაფხულში ბინის შეცვლა, შვებულებებისა და არდადეგების პერიოდია. გადაბარგების ეტაპზე არ გექნებათ დისკომფორტი ბავშვების მიმართ პასუხისმგებლობებზე, სკოლაში წაყვანის და წამოყვანის ფაქტორები არ შეგიშლით ხელს დღის დაგეგმვაში და თქვენს დროით რესურსს მთლიანად გადაანაწილებთ ამ ცვლილებაზე. აღსანიშნავია, რომ თუკი ძველი საცხოვრებლიდან შორ მანძილზე გადაადგილდებით, ბავშვებს არ მოუწევთ სკოლის შუა სასწავლო წელს შეცვლა და ახალი სასწავლო წლიდან უფრო თანმიმდევრულად დაფიქრდებით ამ საკითხის გადაწყვეტაზეც.