5 რჩევა, რომელიც პირველკურსელებს უნივერსიტეტთან ადაპტაციაში დაეხმარება

მალე უნივერსიტეტი ის ადგილი გახდება, სადაც დღის დიდ ნაწილს გაატარებ. ამიტომ, წინასწარ შეგიძლია დაათვალიერო უნივერსიტეტის შენობა, გაიგო სად არის ბიბლიოთეკა, კაფეტერია, მოსასვენებელი სივრცეები და ასე შემდეგ, რათა პირველ დღეს უფრო მომზადებული შეხვდე. ასევე, კარგად დააკვირდი თუ რომელ აუდიტორიებში ჩაგიტარდება ლექციები, რადგან უნივერსიტეტების უმეტესობას რამდენიმე კორპუსი აქვს, რომლებიც შეიძლება სხვადასხვა ლოკაციაზე მდებარეობდეს. სხვა სტუდენტებისთვის კი მიმართულების კითხვა არ მოგერიდოს, რადგან პირველკურსელობა ყველას გამოვლილი აქვს. 

ისწავლე დროის მართვა

უნივერსიტეტში ჩაბარებიდან მალევე შუალედური, ქვიზი, პრეზენტაცია თუ ფინალური შენი ყოველდღიურობის ნაწილი იქნება. იმისათვის, რომ დიდი თუ პატარა გამოცდები წარმატებულად ჩააბარო, მეცადინეობისთვის დროის განაწილებას ყურადღება თავიდანვე უნდა მიაქციო. შეგიძლია, ყოველ კვირის დასაწყისში ჩამოწერო კონკრეტულ დღეს რომელ საგანს რამდენ დროს დაუთმობ, რაც დედლაინების დაცვაში დაგეხმარება. რაც მთავარია, მეცადინეობა დედლაინამდე რამდენიმე საათით ადრე არ უნდა დაიწყო, რადგან დიდი შანსია, რომ დროის სიმცირე ხარისხზე აისახოს და შენი რეალური ცოდნის გამოვლენა ვერ შეძლო.

იყავი აქტიური სტუდენტი

კურსების მაღალ ქულებზე დახურვა საუნივერსიტეტო განათლების მხოლოდ ერთი ნაწილია. მეორე ნაწილი კი იმას უკავშირდება, აუდიტორიის გარეთ რამდენად აქტიური სტუდენტი იქნები. უნივერსიტეტის ვებგვერდზე მარტივად შეძლებ იპოვო ინფორმაცია საჯარო ლექციების, ვორქშოპების თუ სხვადასხვა ღონისძიების შესახებ, რომლებიც შენს უნივერსიტეტში იმართება. შენი პროფესიისა და ინტერესების მიხედვით შეგიძლია სასურველ ღონისძიებას დაესწრო და პრაქტიკული უნარები შეიძინო. ამასთანავე, შეგიძლია რომელიმე კლუბშიც გაწევრიანდე, სადაც თანამოაზრეებსაც იპოვი და საინტერესო აქტივობებს თავადაც დაგეგმავ. 

გამოიმუშავე აკადემიური უნარები

გახსოვდეს, რომ უნივერსიტეტი ის ადგილია, სადაც მომავალ პროფესიას უნდა დაეუფლო და რაც უფრო ყურადღებით მოეკიდები სასწავლო პროცესს, მით უფრო კარგი პროფესიონალი გახდები. კონკრეტული თემის თუ საკითხის განხილვის შემდეგ ახალ-ახალი აზრები და შეკითხვები გვიჩნდება, ამიტომ ყოველთვის შეგიძლია დამატებითი ლიტერატურა მოითხოვო. ამასთანავე, არასდროს მოგერიდოს ლექციაზე კითხვის დასმა, რადგან ლექტორის სურვილი და მოვალეობაცაა, რომ ცოდნის გაღრმავებაში დაგეხმაროს. პატარ-პატარა მიღწევები კი შეგიძლია აღნიშნო ხოლმე, რაც სამომავლოდ მოტივაციას კიდევ უფრო გაგიზრდის. არ დაგავიწყდეს პროეფიული ტრენიგები და სხვადასხვა სახის კურსები, რომლის მოძიებაც აქ შეგიძლიათ. 

არ დაივიწყო სოციალიზაცია

უნივერსიტეტში ბევრ ახალ ადამიანს გაიცნობ, რომლებთანაც იმაზე მეტი გაქვს საერთო, ვიდრე ეს ერთი შეხედვით ჩანს. თანაკურსელებთან დამეგობრება უნივერსიტეტთან ადაპტაციაშიც დაგეხმარება და შენს ყოველდღიურობას უფრო საინტერესოდაც აქცევს. რთული დავალებების შესრულება ხშირად ჯგუფურად უფრო მარტივია, რადგან ერთმანეთს ცოდნას გაუზიარებთ და საკითხების გაგებაშიც დაეხმარებით. სწავლის პარალელურად დასვენებაც მნიშვნელოვანია, თანაკურსელებთან ერთად აქტივობების დაგეგმვა კი მათ გაცნობასა და ბევრი ახალი ინტერესის პოვნაშიც დაგეხმარება.

ასე რომ, ცხოვრების ახალი ეტაპისთვის, რომელსაც პირველკურსელობა ჰქვია, ამ რჩევების გათვალისწინებით მეტი შემართებით შეგიძლია მოემზადო და გახსოვდეს, რომ წინ საუკეთესო დღეები გელოდება!