5 პლატფორმა, რომელიც სამუშაო პროცესს გაგიმარტივებს

1. Slack

Slack თანამშრომლებთან საკომუნიკაციო პლატფორმაა, რომელსაც ყოველდღიურად 35 მილიონი ადამიანი იყენებს. Slack საშუალებას გაძლევს, ეკონტაქტო როგორც მთლიან გუნდს, ისე ცალკეულ თანამშრომელს, ან პროექტებისა თუ თემების მიხედვით არხები შექმნა და მხოლოდ მცირე ჯგუფთან გქონდეს კომუნიკაცია. გარდა ამისა, Slack-ში ფაილების გაზიარებაც შეგიძლია, ხოლო ინდივიდუალური ჩატი მეილების სათითაოდ გზავნაზე მეტად კომფორტული და სწრაფია. შეგიძლია, Slack-ის უფასო ვერსიით ისარგებლო ან ყოველთვიურად $7.25 გადაიხადო და განსხვავებულ ფუნქციონალებზე გქონდეს წვდომა.

2. ClickUp

ClickUp დიდი თუ მცირე პროექტების ორგანიზებაში დაგეხმარება. პლატფორმა საშუალებას გაძლევს, სხვადასხვა სამუშაო სივრცე შექმნა, დავალებები თანამშრომლებს გადაუნაწილო და პროცესები ისე მართო. პლატფორმის კიდევ ერთი უპირატესობა მარტივი ინტერფეისია: შეგიძლია გამოიყენო ე.წ. დაფები, რომლებიც ვიზუალურ მონიტორინგსა და პროცესების ორგანიზებას აადვილებს. ამასთანავე, თითოეული დავალების შესრულების დრო შეგიძლია განსაზღვრო და პროგრესს დააკვირდე. ClickUp-ის მობილური ვერსიის მეშვეობით კი, პროექტები და დავალებები ნებისმიერი ადგილიდან შეგიძლია მართო. ClickUp-ის $7-იანი ვერსია ულიმიტო მეხსიერებას, დავალებების ულიმიტოდ შექმნასა და სხვა უპირატესობებს გთავაზობს.

3. Google Workspace

Google Workspace მულტიფუნქციურ სივრცეს გთავაზობს, რომელიც პროდუქტიულობის გაზრდაში დაგეხმარება. კერძოდ, Gmail-ის მეშვეობით მეილების გაგზავნა შეგიძლია როგორც თანამშრომლებთან, ისე პარტნიორებთან. Google Drive მნიშვნელოვანი ფაილებისა და ინფორმაციის შენახვის საშუალებას გაძლევს, Google Docs-ში ვრცელი ტექსტების რედაქტირება შეგიძლია, Google Sheets-ში მონაცემებს დაამუშავებ, Google Meet-ით ზარებს განახორციელებ და ა.შ. მოკლედ, Google Workspace ყველა იმ ფუნქციონალს აერთიანებს, რომლებსაც მცირე თუ დიდი კომპანიების ყოველდღიურობის გამარტივება შეუძლია. Google Workspace-ის უფასო ვერსიით 14 დღე შეგიძლია ისარგებლო, შემდეგ კი საჭიროებებიდან გამომდინარე, სხვადასხვა ვერსიის შეძენა შეგიძლია, რომელთა ფასებიც $6-დან იწყება.

4. Canva

თუ სტანდარტული რეპორტები შენთვისაც დამღლელია, Canva გაძლევს საშუალებას, რომ ვიზუალურად მრავალფეროვანი პრეზენტაციებით აუდიტორია დააინტერესო და ინფორმაცია ისე მიაწოდო. გარდა ამისა, Canva-ს ინსტრუმენტების დახმარებით, გრაფიკული დიზაინები თავად შეგიძლია შექმნა. შექმნილი დიზაინი Canva-ში თანამშრომლებსაც შეგიძლია გაუზიარო და რედაქტირების უფლებაც მისცე. ამასთანავე, ყველა დიზაინი ერთ სივრცეში შეგიძლია მართო და ფაილების ცალ-ცალკე ძებნაც აღარ დაგჭირდება. ამ ყველაფრის გაკეთება Canva-ს უფასო ვერსიაშიც შეგიძლია, ხოლო $120-იანი ვერსია დამატებით მეხსიერებას, შაბლონებს, AI ინსტრუმენტებსა და სხვა უპირატესობებს გთავაზობს.

5. Survey monkey

SurveyMonkey ონლაინ გამოკითხვის ჩასატარებლად მსოფლიოში ერთ-ერთი ყველაზე პოპულარული პლატფორმაა. SurveyMonkey საშუალებას გაძლევს, ჩაატარო გამოკითხვა კომპანიის მომხმარებლების აზრის გასაგებად, პოტენციური მომხმარებლების დასაინტერესებლად თუ თანამშრომლებისგან უკუკავშირის მისაღებად. გამოკითხვების შესაქმნელად SurveyMonkey-ის მზა შაბლონები შეგიძლია გამოიყენო ან საკუთარი შექმნა. SurveyMonkey-ის უფასო ვერსიაში შეზღუდულია როგორც კითხვების, ისე გამოკითხვაში მონაწილეთა რაოდენობაც. ხოლო SurveyMonkey-ის ფასიან ვერსიებში, რომლებიც თვეში $25-დან იწყება, შეგიძლია სასურველი რაოდენობის კითხვები დასვა, გამოკითხვა ჩაატარო ფართო აუდიტორიაზე, შექმნა განსხვავებული დიზაინი და ა.შ.