საქართველოში საშუალო ხელფასი 2 004.9 ლარი გახდა — 2024 წლის II კვარტლის მონაცემები

საშუალო თვიური ნომინალური ხელფასი

საქსტატის მონაცემების მიხედვით, 2024 წლის II კვარტალში საქართველოში საშუალო ნომინალურმა ხელფასმა 2004.9 ლარი შეადგინა. წინა წლის შესაბამის პერიოდთან მიმართებით, საქართველოში საშუალო ხელფასი 11.1%-ით, ანუ 200.4 ლარით არის გაზრდილი. ხოლო წინა კვარტალთან შედარებით, საქართველოში საშუალო ხელფასი 61,5 ლარით (3%-ით) გაიზარდა.

საშუალო თვიური ნომინალური ხელფასი საქმიანობის სახეების მიხედვით

2024 წლის II კვარტლის მონაცემების მიხედვით, ყველაზე მაღალი საშუალო ხელფასი ინფორმაციისა და კომუნიკაციების დარგში დაფიქსირდა და 3963 ლარი შეადგინა. აღსანიშნავია, რომ 2024 წლის I კვარტლის მონაცემებით, ყველაზე მაღალანაზღაურებადი დარგი საფინანსო და სადაზღვევო საქმიანობები იყო, რომელმაც მეორე ადგილზე გადაინაცვლა. საქსტატის ინფორმაციით, ყველაზე მაღალანაზღაურებადი დარგების საშუალო თვიური ხელფასი ასეთია:

• ინფორმაცია და კომუნიკაცია — 3 963 ლარი (წინა წლის შესაბამის პერიოდთან შედარებით გაიზარდა 4.3%-ით); 

• საფინანსო და სადაზღვევო საქმიანობები — 3 642.3 ლარი (გაიზარდა 14.5%-ით);

• მშენებლობა — 2 946.1 ლარი (გაიზარდა 13.7%-ით); 

•  პროფესიული, სამეცნიერო და ტექნიკური საქმიანობები — 2 872.8 ლარი (გაიზარდა 13.8%-ით).

 საშუალო თვიური ხელფასი სქესის მიხედვით

2024 წლის II კვარტალშიც კაცების საშუალო ხელფასი ქალების საშუალო ხელფასს კვლავ აღემატება. როგორც დიაგრამაზე ვხედავთ, 2024 წლის II კვარტალში ქალების საშუალო ხელფასი 1 590.2 ლარით განისაზღვრა, ხოლო კაცების საშუალო ხელფასმა 2 413.5 ლარი შეადგინა. ბოლო ერთი წლის განმავლობაში ქალების საშუალო ხელფასი 153.1 ლარით (10.7%-ით) გაიზარდა, ხოლო კაცების — 251.8 ლარით (11.7%-ით).

საშუალო თვიური ნომინალური ხელფასი რეგიონების მიხედვით

საშუალო ხელფასის სიდიდის მიხედვით, წინა კვარტლის მსგავსად, კვლავ თბილისი და მცხეთა-მთიანეთი ლიდერობს. 2024 წლის II კვარტალში თბილისში საშუალო ხელფასმა 2354, 8 ლარი შეადგინა, რაც წინა კვარტალთან შედარებით მცირედით არის გაზრდილი. მცხეთა-მთიანეთში კი საშუალო თვიური ნომინალური ხელფასი 1803,1 ლარი გახდა, რაც წინა კვარტლის მონაცემზე 122,9 ლარით მეტია.