როგორ ვებრძოლოთ სამსახურში გადაწვას — რჩევები

1. ისწავლე დროის მენეჯმენტი

როცა მთელი თვის ან კვირის დავალებებთან გამკლავებას ერთბაშად ცდილობ, სამუშაო პროცესი იმაზე რთულად გამოიყურება, ვიდრე რეალურად არის. ამიტომ, პირველ რიგში, პრიორიტეტები უნდა განსაზღვრო: რის შესრულებას სჭირდება მეტი ძალისხმევა ან რომელი დავალებაა ყველაზე საჩქარო. ამის შემდეგ კი, დავალებებზე დროის გადანაწილებას უფრო მარტივად შეძლებ და არც დედლაინებს ჩამორჩები. ასევე, მნიშვნელოვანია, რომ რეალური გეგმები და მიზნები დაისახო. თუ წინასწარ ხვდები, რომ გადატვირთული ხარ და გეგმის ბოლომდე შესრულება არ გამოგივა, ოვერთაიმზე მუშაობის ნაცვლად, დამატებითი დრო უნდა მოითხოვო.

2. შეინარჩუნე ჯანსაღი ცხოვრების წესი

ჩვენი განწყობა და პროდუქტიულობის ხარისხი დიდწილად ძილის რეჟიმზე არის დამოკიდებული. ამიტომ, ყოველთვის ეცადე, რომ საკმარისად და ხარისხიანად გეძინოს, რაც სტრესსაც შეამცირებს და გრძელვადიან პერსპექტივაშიც თავს უფრო ენერგიულად იგრძნობ. სტრესის დაძლევას და მოტივაციის ამაღლებას ფიზიკური აქტივობაც ხელს უწყობს. თუ სამუშაო დღის გატარება ოფისში გიწევს, საღამოობით გასეირნება და დაძინებამდე მარტივი ვარჯიშების შესრულება ფიზიკურ და მენტალურ ჯანმრთელობას გაგიუმჯობესებს. გადატვირთული გრაფიკი კვებაზეც ხშირად ახდენს გავლენას, ამიტომ, კარგი იქნება, თუ სამსახურში კვირის განმავლობაში რამდენჯერმე სახლში მომზადებულ ლანჩს წაიღებ.

3. გაავლე საზღვრები პირად და სამუშაო ცხოვრებას შორის

სამსახურში გადაწვის მთავარი მიზეზი ხშირად ის არის, რომ არასდროს ვისვენებთ. მაშინაც კი, როცა შესვენების დრო გვაქვს ან სამუშაო საათები უკვე დასრულებულია, ზოგი ჩვენგანი მეილებს ან თანამშრომლების შეტყობინებებს პასუხობს. შეიძლება ფიქრობდე, რომ დამატებითი 15-20 წუთი დიდ დროს არ გართმევს, თუმცა რეალურად დასვენების საათებს იკლებ. უმჯობესია, სამუშაო საათების შემდეგ ყველა ის აპლიკაცია გამორთო, რომელსაც სამსახურში იყენებ, შესვენების დროს კი თანამშრომლებს სტატუსით მიანიშნო, რომ ამ მომენტში ხაზზე არ ხარ. პირადი დრო იმ აქტივობებს შეგიძლია დაუთმო, რომლებიც სიამოვნებას განიჭებს.

4. აღნიშნე პატარა მიღწევები

როცა გრძელვადიანი მიზნები გაქვს დასახული, სამუშაო რუტინა დამღლელად მალევე შეიძლება იქცეს. ამიტომ, მნიშვნელოვანია, რომ უყურადღებოდ არც მცირე მიღწევები დაგრჩეს და საკუთარი წარმატება თავადვე დააფასო. მოტივაციის ამაღლებასა და თავდაჯერებულობის შენარჩუნებაში მცირე გამარჯვებები რეალურად დიდ როლს თამაშობს. ასე უფრო ცხადად ხედავ, თუ როგორ ვითარდები კარიერულად და პროგრესსაც თვალნათლივ აფასებ. ამასთანავე, პატარა მიღწევების აღნიშვნა იმის გაცნობიერებაში გეხმარება, რომ მხოლოდ მიზნის მიღწევაზე კი არ უნდა იყო ორიენტირებული, არამედ პროცესითაც უნდა ისიამოვნო.

5. გამოიყენე დასვენების დღეები და შვებულება

ზოგი ფიქრობს, რომ სამსახურში მეტი დროის გატარება მეტ პროდუქტიულობას ნიშნავს, თუმცა გადატვირთული დღეები ფიზიკურ და გონებრივ ძალებს მნიშვნელოვნად ამცირებს. სამსახურში გადაწვის მიზეზი ხშირად ის შეიძლება იყოს, რომ დეიოფების აღებაზე უარს ამბობ ან ფიქრობ, რომ შვებულებაში გასვლა არ გჭირდება. გრძელვადიან პერსპექტივაში რომ პროდუქტიული იყო, რუტინისგან ცოტა ხნით დასვენება და ენერგიის აღდგენა აუცილებელია. დასვენება იმაშიც გეხმარება, რომ პრობლემებს ახლებურად შეხედო და სამუშაო გარემოს უფრო კრეატიული იდეებით დაუბრუნდე. ამასთანავე, მენტალური ჯანმრთელობის კუთხითაც მნიშვნელოვანია, რომ სამსახური შენი ცხოვრების ერთადერთ პრიორიტეტად არ აქციო.