5 წიგნი, რომელიც პიროვნულ და პროფესიულ განვითარებაში დაგეხმარება

"ცხოვრების 12 წესი: ქაოსის ანტიდოტი" — ავტორი: ჯორდან პიტერსონი

როგორც სათაური გვეუბნება, ჯორდან პიტერსონის ეს ბესტსელერი ქაოსურ სამყაროში სტაბილურობის პოვნის პრინციპებს გვიზიარებს. ყოველდღიური ქაოსისა და გამოწვევების ფონზე მენტალური მდგრადობის შენარჩუნება აუცილებელია, რათა წინსვლა და განვითარება შევძლოთ. წიგნის მიზანიც სწორედ ისაა, რომ ქაოსსა და წესრიგს შორის ბალანსი გაპოვნინოს როგორც სამყაროში, ისე საკუთარ თავში. "შეადარე საკუთარი თავი იმას, ვინც გუშინ თავად იყავი და არა იმას, თუ როგორია სხვა ადამიანი დღეს" — ეს პიტერსონის 12 წესიდან ერთ-ერთია, რომელიც პიროვნულ ზრდაზე ამახვილებს ყურადღებას. რაც მთავარია, წიგნში გაერთიანებულია თეორიული ცოდნა, პრაქტიკული რჩევები და რეალური ცხოვრებისეული მაგალითები.

"შეჭამე ბაყაყი" — ავტორი: ბრაიან თრეისი

ადრე თუ გვიან, ყველა ვაწყდებით ისეთ რთულ დავალებას, რომლის შესრულებაც თავიდანვე უსიამოვნოდ გვეჩვენება და თავს მაქსიმალურად ვარიდებთ. ასეთ მომენტებში კი ნაკლებად ვფიქრობთ იმაზე, გადაუჭრელი ამოცანა რამდენად უარყოფით გავლენას ახდენს ჩვენს ზოგად უნარ-ჩვევებზე. ბრაიან თრეისი წიგნში სწორედ იმაზე გვესაუბრება, თუ რატომ უნდა მიანიჭო პრიორიტეტი ასეთი რთული დავალების შესრულებას ანუ რატომ უნდა "შეჭამო ბაყაყი". ბაყაყი იმ უსიამოვნო და რთული ამოცანების მეტაფორაა, რომელთა გადადებაც გვსურს, თუმცა მათი შესრულება ჩვენს წარმატებაზე განსაკუთრებულ გავლენას ახდენს. თუ ასეთი სიტუაციები შენთვის ნაცნობია, "შეჭამე ბაყაყი" დაგეხმარება უფრო პროდუქტიული გახდე და დასახულ მიზნებს მინიმალურ დროში მიაღწიო.

"ბიზნესეტიკეტი" — ავტორი: ტიმ რეიბორნი

საქმიან ურთიერთობებს სხვადასხვა დეტალი და ნიუანსი ახლავს, რომელთა გათვალისწინებაც წარმატების მისაღწევად აუცილებელია. თუმცა თავდაპირველად, როცა ასეთ გარემოში პირველი ნაბიჯების გადადგმა გვიწევს, გამოუცდელობის გამო შეცდომებს ვუშვებთ. ტიმ რეიბორნის "ბიზნესეტიკეტი" კი საქმიან ურთიერთობებში შენი გზამკვლევი გახდება, რომელიც პროფესიონალური ქცევის ნორმებს დეტალურად აგიხსნის. წიგნი დაგეხმარება გაიგო, როგორ უნდა მოიქცე საქმიან გარემოში, გაამყარო ურთიერთობები, ხაზი გაუსვა შენს პროფესიონალიზმს და პოზიტიური შთაბეჭდილება დატოვო. საქმიანი გარემო მხოლოდ შეხვედრებს არ მოიაზრებს და რეიბორნის გზამკვლევი პრაქტიკულ რჩევებს გაგიზიარებს სხვა საკითხების შესახებაც, მაგალითად: როგორ უნდა გახდე კარგი ლიდერი, როგორ უნდა შეიქმნა შენი პროფესიის შესაფერისი იმიჯი და ა.შ.

"მიზნები" — ავტორი: ბრაიან თრეისი

ხშირად ზოგიერთი მიზანი იმდენად მიუღწეველი და შორეული ჩანს, სასურველის მისაღებად თითქმის არაფერს ვაკეთებთ. ბრაიან თრეისი კი წიგნში "მიზნები" გვასწავლის, რომ თუ მიზნამდე მისასვლელ გზას რაციონალურად და სტრატეგიულად დავგეგმავთ, შედეგის მიღწევა შეუძლებლად აღარ მოგვეჩვენება. ავტორი წიგნში მიზნის დასახვის და მიღწევის პროცესს დეტალურად განიხილავს. ნაბიჯ-ნაბიჯ გაწერილი გეგმა კი გამოწვევებისთვის წინასწარ გვამზადებს და პროგრესის შეფასების შესაძლებლობასაც გვაძლევს. თუ ამბიციური ადამიანი ხარ და ფიქრობ, რომ პროფესიულ და პიროვნულ ცხოვრებაში მაქსიმალური შედეგებისთვის ჯერ არ მიგიღწევია, ბრაიან თრეისის "მიზნები" შენს სამაგიდო წიგნად აუცილებლად იქცევა. რაც მთავარია, წიგნი ასევე დიდ ყურადღებას უთმობს მოტივაციას და გვთავაზობს სხვადასხვა მეთოდსა და ტექნიკებს, რათა მიზნისკენ მიმავალი გზა სასიამოვნოც იყოს.

"პირველად იყო რატომ" — ავტორი: საიმონ სინეკი

მკაფიოდ ჩამოყალიბებული მიზნები და მათკენ მიმავალი გზის დაგეგმვა, რა თქმა უნდა, წარმატების გარანტია, თუმცა კითხვაზე "რატომ" პასუხის პოვნა კიდევ უფრო მნიშვნელოვანია. რატომ ვაკეთებთ იმას, რასაც ვაკეთებთ? რატომ გვაქვს კონკრეტული მიზანი? რატომ ვიღებთ ასეთ გადაწყვეტილებებს? — სწორედ ამ და მსგავსი კითხვების დასმით საიმონ სინეკი გვაჩვენებს, რომ ლიდერები და კომპანიები, რომლებიც ქმედებების უკან მდგარ მიზეზებზე ფიქრობენ, უფრო წარმატებულები არიან. როგორ და რას ვაკეთებთ, ეს მხოლოდ სტრატეგიები და ტაქტიკებია, ხოლო იმაზე პასუხის პოვნა "რატომ" ვაკეთებთ, მოტივაციას აძლიერებს. ავტორს წიგნში იმ ცნობილი კომპანიებისა და ადამიანების მაგალითებიც მოჰყავს, რომლებიც სწორედ კითხვაზე "რატომ" ფოკუსირდნენ და კონკურენტებზე დიდ წარმატებას მიაღწიეს. ასე რომ, თუ საქმიანობაში ახალ მიდგომებს ეძებ, "პირველად იყო რატომ" აუცილებლად უნდა წაიკითხო.