როგორ მოვახდინოთ სწორი შთაბეჭდილება პოტენციურ დამსაქმებელზე — ინტერვიუ სალომე სულაბერიძესთან

იმის შესახებ, თუ როგორ უნდა მოვახდინოთ სწორი შთაბეჭდილება პოტენციურ დამსაქმებელზე, კარიერული მენტორი, სალომე სულაბერიძე, ვრცლად გვესაუბრა. დიდი ხანია, რაც სალომე სულაბერიძე სამუშაოს მაძიებლებს გამორჩეული რეზიუმეების შექმნაში, LinkedIn-ის პროფილის ოპტიმიზაციაში, გასაუბრების ტექნიკის დაუფლებასა და სხვა მიმართულებში ეხმარება. სალომე სულაბერიძის პროფესიონალიზმს შედეგებიც მოწმობს: კარიერული მენტორი საოცნებო სამსახურის დაწყებაში უკვე 500-ზე მეტ ადამიანს დაეხმარა. ჩვენთან ინტერვიუში სალომემ გასაუბრების ეტაპის შესახებ ყველაზე მნიშვნელოვანი საკითხები განიხილა და რჩევებიც გაგვიზიარა:

როგორ იქმნის პირველ შთაბეჭდილებას დამსაქმებელი

"პირველი შთაბეჭდილება ხშირად გავლენას ახდენს ინტერვიუს მთელ პროცესზე. ამაში მთავარ როლს ასრულებს პროფესიონალური ჩაცმულობა, დროულად მისვლა და გასაუბრებისთვის წინასწარ მომზადება. ამასთანავე, თავის გაცნობისას მნიშვნელოვანია, რომ კანდიდატმა მოკლედ და მკაფიოდ ისაუბროს მის ძირითად გამოცდილებასა და კომპეტენციებზე. ასევე, ყურადღება უნდა გაამახვილოს იმ უნარებსა და შედეგებზე, რომლებიც უშუალოდ ვაკანსიას უკავშირდება".

როგორია სტანდარტული ინტერვიუ

"სტანდარტული ინტერვიუ ხშირად მოიცავს კითხვებს კანდიდატის გამოცდილების, მოტივაციისა და პროფესიული მიზნების შესახებ. კითხვები შეიძლება დაეფუძნოს კონკრეტულ პროექტებსა თუ სიტუაციებს, რომლებიც აჩვენებს, როგორ მოიქცა კანდიდატი წარსულში. ამასთანავე, ინტერვიუს დროს გასათვალისწინებელია დაუწერელი წესები, რაც მოიცავს, მაგალითად, კანდიდატის კომუნიკაციის სტილს და სხეულის ენას. მნიშვნელოვანია თავაზიანობა, ყურადღების მიქცევა დეტალებზე და ინტერვიუს პროცესში აქტიური მონაწილეობა".

რას ექცევა ყურადღება კომუნიკაციის დროს

"გასაუბრების დროს კომუნიკაციის მართვა გულისხმობს თანასწორი, გულწრფელი და პირდაპირი საუბრის წარმოებას. კანდიდატი უნდა დარჩეს თავაზიანი და ფოკუსირებული, უპასუხოს კითხვებს კონკრეტულად და გასაგებად. ასევე მნიშვნელოვანია, არ ვისაუბროთ ნეგატიურ კონტექსტში წინა სამსახურებზე. ერთ-ერთი ყველაზე გავრცელებული შეცდომაა არასაკმარისი მომზადება და ზედმეტი თვითშეფასება. ასევე, უარყოფითი შთაბეჭდილება შეიძლება მოახდინოს კანდიდატის უყურადღებო და არაპროფესიონალურმა დამოკიდებულებამ".

რატომ არის კანდიდატის მხრიდან კითხვების დასმა მნიშვნელოვანი

"კანდიდატისთვის მნიშვნელოვანია, რომ თავადაც დასვას კითხვები. ეს აჩვენებს მის დაინტერესებას და მოტივაციას. მიზანშეწონილია, რომ კითხვები ეხებოდეს კომპანიის კულტურას, სამუშაო გარემოსა და განვითარების შესაძლებლობებს. ამასთან ერთად, ანაზღაურების საკითხის განხილვაც მნიშვნელოვანია, თუმცა მისი წინასწარ დაწერა რეზიუმეში ან მეილში, არ არის ყოველთვის აუცილებელი. როდესაც კანდიდატს სთხოვენ, რომ დაასახელოს სასურველი ხელფასი, მას შეუძლია დაასახელოს დიაპაზონი, რომელიც ერგება მის გამოცდილებასა და საბაზრო პირობებს.  მიზანშეწონილია ინტერვიუ დასრულდეს თავაზიანი ტონით, კანდიდატს შეუძლია დამსაქმებელს დაეკითხოს მომავალი ნაბიჯებისა და გადაწყვეტილების მიღების პროცესზე".

რა როლს თამაშობს სწორად შედგენილი რეზიუმე

"იმისათვის, რომ უფრო მეტი უკუკავშირი მიიღოთ და გასაუბრებები ჩაგენიშნოთ, მნიშვნელოვანია სწორად მორგებული რეზიუმეს გაგზავნა კონკრეტულ ვაკანსიაზე. კანდიდატები კარგად უნდა დააკვირდნენ თავიანთ გამოცდილებას და გაფილტრონ ინფორმაცია, რათა რეზიუმეში მხოლოდ ის ნაწილი მოხვდეს, რომელიც ყველაზე რელევანტურია კონკრეტული პოზიციისთვის. ყველაფრის ჩაწერა აუცილებელი არ არის. მეტიც, რეზიუმემ, რომელიც ზედმეტად გადატვირთულია სხვადასხვა გამოცდილებით, შესაძლოა, დამსაქმებელს მთავარ უნარებსა და მიღწევებზე ყურადღების გამახვილების საშუალება არ მისცეს. ფოკუსირება უნდა გაკეთდეს იმ გამოცდილებაზე, რომელიც უშუალოდ შეესაბამება ვაკანსიას".

როგორ შეგიძლიათ გაზარდოთ დასაქმების შანსები

"კანდიდატებისთვის მნიშვნელოვანია, რომ ინტერვიუსთვის სრული სერიოზულობით მოემზადონ. მათი წარმატების ერთ-ერთი გასაღებია წინასწარ შესწავლილი ინფორმაცია კომპანიის შესახებ და კონკრეტული მაგალითების მოფიქრება, რაც აჩვენებს მათ პროფესიონალიზმსა და უნარებს. საბოლოოდ, გაითვალისწინეთ, რომ რეზიუმე, LinkedIn პროფილი და გასაუბრება თქვენი პირადი ბრენდის ერთგვარი სახეა. მკაფიოდ და მიზანმიმართულად შექმნილი დოკუმენტები, რომლებიც თქვენს უნარებსა და გამოცდილებას სწორად წარმოაჩენს, ზრდის შანსს, რომ დამსაქმებელმა თქვენთან თანამშრომლობა სერიოზულად განიხილოს. პოზიტიური დამოკიდებულება, გამჭრიახობა და მოქნილობა გასაუბრების პროცესში დაგეხმარებათ არა მხოლოდ წარმოაჩინოთ თქვენი საუკეთესო მხარე, არამედ დაამყაროთ გრძელვადიანი კავშირები. თქვენი მომზადება და კომუნიკაცია საბოლოოდ განსაზღვრავს წარმატებას — ასე რომ, იყავით თავდაჯერებული და ყურადღებიანი".