რას უნდა მიაქციო ყურადღება, როცა ვაკანსიას ეცნობი — მთავარი დეტალები

რა პოზიციაზე ეძებენ ახალ თანამშრომელს?

ყურადღებით წაიკითხე პოზიციის დასახელება და აღწერა — რა მოვალეობების შესრულება მოგიწევს დასაქმების შემთხვევაში. ხშირად პოზიციის დასახელება შესაძლოა ზოგადი ჩანდეს, თუმცა ვალდებულებების ჩამონათვალი უფრო ნათელ წარმოდგენას შეგიქმნის. ამ მთავარი პუნქტის გაცნობის შემდეგ კი აუცილებლად დაფიქრდი, რამდენად შეესაბამება მოთხოვნები შენს უნარებსა და ინტერესებს.

როგორია სამუშაო გრაფიკი?

სამუშაო გრაფიკი ერთ-ერთი გადამწყვეტი ფაქტორია, ამიტომ კარგად დააკვირდი რომელს გთავაზობენ: სრულ განაკვეთს, ნახევარ განაკვეთს თუ მოქნილ გრაფიკს. ზოგ შემთხვევაში, დღეებისა და ცვლების არჩევა თავად შეგიძლია, რაც ვაკანსიის უპირატესობად შეგიძლია ჩათვალო. ასევე, ამ პუნქტში დასვენების დღეების შესახებ ზოგადი ინფორმაციაც ხშირად არის მოცემული.

ტერიტორიულად სად უნდა იმუშაო?

სანამ CV-ის გაგზავნას გადაწყვეტ, სამუშაოს ადგილმდებარეობაც აუცილებლად უნდა განიხილო: რამდენად ახლოსა შენს სახლთან? ტრანსპორტში რა დროის გატარება მოგიწევს? შეგიძლია თუ არა ჰიბრიდულად მუშაობა? ეს დეტალები შენს ყოველდღიურობაზე დიდ გავლენას მოახდენს, ამიტომ გადაწყვეტილების მიღებამდე კარგად დაფიქრდი და თითოეული მათგანი გაითვალისწინე.

საჭიროა თუ არა გამოცდილება?

ზოგი ვაკანსია კონკრეტული მიმართულებით გამოცდილებას ითხოვს, ზოგიც კი დამწყებებს მუშაობის შანსს აძლევს. ყურადღება მიაქციე, ვაკანსიის მოთხოვნების პუნქტში ზუსტად რა არის ჩამოწერილი და გთავაზობს თუ არა კომპანია საქმის ადგილზე შესწავლას. ასე რომ, თუ მრავალწლიანი გამოცდილება არ გაქვს, სამსახურის პოვნა მაინც არ გაგიჭირდება, როცა სიახლეებისთვის მზად ხარ.

როგორ განისაზღვრება ანაზღაურება?

მიუხედავად იმისა, რომ ბევრ ვაკანსიაში ანაზღაურების კონკრეტული რაოდენობა პირდაპირ არ არის მითითებული, სახელფასო დიაპაზონს ან სხვა მინიშნებებს ვხვდებით. ზოგ შემთხვევაში ანაზღაურება დამოკიდებულია გამოცდილებაზე, ასევე, გვაქვს ფიქსირებული ხელფასი ან მოქმედებს საბონუსე სისტემა. ამ დეტალების შესახებ გასაუბრების დროს პოტენციურ დამსაქმებელს კითხვები თავად შეგიძლიათ დაუსვათ.

სად და როდემდე შეგიძლია CV-ის გაგზავნა?

პირველი შთაბეჭდილების მოსახდენად ვადების დაცვა მნიშვნელოვანია, ამიტომ CV-ის გაგზავნა არ დააგვიანო. ვაკანსიის ტექსტში მოცემული იქნება მეილი, რომელზეც CV უნდა გააგზავნო ან შესაძლოა ფორმის შევსება დაგჭირდეს, ასე რომ, ამ დეტალს ყურადღებით დააკვირდი. ასევე, ცუდი ტონია პოტენციურ დამსაქმებელთან დარეკვა თუნდაც იმის საკითხავად, სად უნდა გააგზავნო CV, თუ ეს ვაკანსიაში ისედაც მითითებულია. 

რა უნდა გაითვალისწინო CV-ის შედგენისას?

არ არის სწორი მიდგომა, როცა ყველა ვაკანსიაზე ერთსა და იმავე CV-ის გზავნიან. ყოველ ინდივიდუალურ შემთხვევაში შენი გამოცდილება და უნარები უნდა მოარგო იმ ვაკანსიას, რომელზეც CV-ის აგზავნი. ასე რომ, თითოეულ ჯერზე რელევანტური გამოცდილება შეარჩიე და CV-ში მიუთითე შენი ძლიერი მხარეები, რომლებიც კონკრეტული ვაკანსიის მოთხოვნებს ყველაზე მეტად შეესაბამება.