რეკორდულ თანხაში გაყიდული უძრავი ქონება მსოფლიოში და 2025 წლის ყველაზე ძვირად ღირებული სახლები

04.02.2025 14:06:33

2020 წლის 15 იანვარს დუბაის ონლაინ აუქციონზე უძრავი ქონება 190.623.988.44$-ად გაიყიდა, რაც მსოფლიო რეკორდად შეფასდა და გინესის წიგნშიც შევიდა. დღევანდელი მონაცემებით, ყველაზე ძვირად რეალიზებული უძრავი ქონება სწორედ ეს არის.

რაც შეეხება ყველაზე მაღალ ფასად შეფასებულ სახლებს, მათი ნაწილი წარმოადგენს როგორც კერძო საკუთრებაში არსებულ ისტორიულ მემკვიდრეობას, ისე თანამედროვე და ექსტრავაგანტურ ნაგებობებს, რომლებიც მსოფლიოს სხვადასხვა წერტილში მდებარეობს.

გიზიარებთ 10 ყველაზე ძვირად ღირებულ სახლს მსოფლიოში:

1. ბუკინგემის სასახლე - დიდი ბრიტანეთი

ბუკინგემის სასახლე, რომელიც ბრიტანეთის სამეფო ოჯახს ეკუთვნის, უძრავი ქონების ბაზარზე გასაყიდად არასდროს გამოუტანიათ, თუმცა ასე რომ მომხდარიყო, მისი ღირებულება დაახლოებით 4.9 მილიარდი დოლარი იქნებოდა.

სახლი მოიცავს 244 საძინებელს, საიდანაც 188 თანამშრომლებისთვის, ხოლო 52 სამეფო ოჯახისა და სტუმრებისთვის არის განკუთვნილი. სასახლეში ასევე მოწყობილია ქირურგის კაბინეტი და აუზი. აღსანიშნავია, რომ შენობა დამთვალიერებლებსაც იღებს.

ჯამში ბუკინგემის სასახლეში 775 ოთახია, ეზოში მოწყობილია ულამაზესი ბაღები და მოსასვენებელი ადგილები. სასახლე და მისი შემოგარენი ჯამში 77,000 კვ.მ-ს მოიცავს.

2. მუკეშ ამბანის სახლი, ინდოეთი

მსოფლიოს ყველაზე ძვირად ღირებული კერძო რეზიდენცია ინდოეთის უმდიდრესი ადამიანის, მუკეშ ამბანის სახლია. ეს 37-სართულიანი შენობა განსაკუთრებულ ყურადღებას გამორჩეული დაგეგმარებით იქცევს - თითოეულ სართულს ორი სართულის სიმაღლის ჭერი აქვს. ამგვარი არქიტექტურის მიუხედავად, ის დიდი სიმძლავრის მიწისძვრებზეც არის გათვლილი.

მუმბაიში მდებარე ამბანის რეზიდენცია მოიცავს როგორც ტრადიციულ, ისე თანამედროვე ელემენტებს. შენობის 6 სართული მხოლოდ პარკინგს ეთმობა. მის სახურავზე მოწყობილია 3 ვერტმფრენზე გათვლილი მოედანი, სპა, დახურული აუზები, სამეჯლისო დარბაზი, იოგას სტუდია, კინოთეატრი, ნაყინის ოთახი და სხვა. სახლში მოწყობილია ერთი საინტერესო სივრცეც, რომელსაც თოვლის ოთახს უწოდებენ. აქ ფიფქები იმ შემთხვევაში მოდის, თუ ინდოეთში ტემპერატურა განსაკუთრებით მაღალ ნიშნულს მიაღწევს.

რეზიდენცია 2 მილიარდ დოლარად არის შეფასებული.

3. ვილა ლეოპოლდა, საფრანგეთი

ევროპის ყველაზე ძვირადღირებული კერძო ვილა პრესტიჟულ ადგილზე, ნიცასა და მონაკოს შორის მდებარეობს. ელეგანტური, გემოვნებიანი სასახლე ისტორიული მემკვიდრეობაა და ფრანგული რივიერის ერთ-ერთ ღირსშესანიშნაობას წარმოადგენს. თავდაპირველად, ნაგებობა ბელგიის მეფეს - ლეოპოლდ II-ს ეკუთვნოდა, ვილის სახელწოდებაც სწორედ მისი პირველი მეპატრონისგან მოდის. შემდეგ სასახლემ რამდენიმე მეპატრონე გამოიცვალა, დღეს კი გარდაცვლილი მილიარდერის, ედვარდ საფრას მეუღლეს ეკუთვნის.

სახლში რეჟისორმა ალფრედ ჰიჩკოკმა რომანტიკული ტრილერი „ქურდის დაჭერა“ გადაიღო.

შენობის ეზოში აუზი და რამდენიმე ბაღია, რომელსაც 50 მებაღე უვლის. ტერიტორია ჯამში 80 000 კვ.მ-ს მოიცავს. მისი ღირებულება კი 750 მილიონი დოლარია.

4. ვილა ლე სედრი (Villa Les Cèdres), საფრანგეთი

ვილა ლე სედრი სამხრეთ საფრანგეთში მდებარეობს. ის ბელგიის მეფეს, ლეოპოლდ II-ს ეკუთვნოდა. ეს 1830-იან წლებში აშენებული სასახლე, გარშემორტყმულია ბაღებითა და მაღალი კედრებით, რაც მშვიდ და ჰარმონიულ ატმოსფეროს ქმნის. ვილაში მოწყობილია ოლიმპიური აუზი, შთამბეჭდავი დარბაზი და თავლა ცხენებისთვის.

2019 წლიდან ის უკრაინელ მილიარდერსა და ბიზნესმენს, რინატ ახმეტოვს ეკუთვნის. სახლი 450 მილიონ დოლარად არის შეფასებული.

5. Les Palais Bulles, საფრანგეთი

სასახლე ფრანგული რივიერას ყველაზე ექსტრავაგანტური ნაგებობაა. მისი არქიტექტურა ტრადიციული ძვირადღირებული ვილებისგან რადიკალურად განსხვავდება. ბუშტის ფორმის არქიტექტურა და ტერაკოტას ფერში გადაწყვეტილი ექსტერიერი დაუვიწყარ შთაბეჭდილებას ქმნის. სახლის დიზაინი უნგრელ არქიტექტორს, ანტი ლოვაგს ეკუთვნის. მის დასრულებაში საკუთარი წვლილი რამდენიმე თანამედროვე არტისტმაც შეიტანა.

ეს ზღაპრული სახლი გამორჩეულია გარე ამფითეატრითაც, რომელიც 500 მაყურებელს იტევს. ის 1992 წლამდე დიზაინერ პიერ კარდენს ეკუთვნოდა. მისი გარდაცვალების შემდეგ კი დამსვენებლებზე ქირავდება, თუმცა საჯაროდ ხელმისაწვდომ პლატფორმებზე არა.

ვილა 420 მილიონ დოლარად არის შეფასებული.

6. პენტჰაუსი ოდეონის თაუერში, მონაკო

შეიძლება ითქვას, რომ ეს 330 მილიონ დოლარად შეფასებული მსოფლიოს ყველაზე ძვირადღირებული ბინაა, რომელიც არც ბაღებით გამოირჩევა და ისტორიული მფლობელებით, თუმცა მონაკოს ყველაზე მაღალი ცათამბჯენის ბოლო სართულზე მდებარეობს, საიდანაც საოცარი ხედები იშლება.

ბინა პირდაპირ გადაჰყურებს ხმელთაშუა ზღვას, აქვს კერძო საცურაო აუზი, პარკინგის სივრცე, 5 სამზარეულო, რომელიც სხვადასხვა ნაწილშია განლაგებული და თანამშრომლების ოთახიც კი.

7. ჰოლმი, ინგლისი

სასახლე ლონდონში მდებარეობს და საუდის არაბეთის სამეფო ოჯახის საკუთრებაშია. მისი ღირებულება დაახლოებით 320 მილიონი დოლარია. ჰოლმი ინგლისის ერთ-ერთი ყველაზე პრესტიჟული კერძო საკუთრებაა, რომელსაც გარს აკრავს კერძო ტბა, ჩოგბურთის მოედანი და შთამბეჭდავი ბაღი.

8. შატო ლუი XIV, საფრანგეთი
შატო პარიზთან ახლოს მდებარეობს და ერთ-ერთ მნიშვნელოვან თანამედროვე არქიტექტურულ ნიმუშს წარმოადგენს საფრანგეთისთვის. ამ მე-17 საუკუნის სტილში გადაწყვეტილი სასახლის მშენებლობა 2011 წელს დასრულდა, 2015 წელს კი ის საუდის არაბეთის პრინცზე გაიყიდა. მისი ღირებულება 300 მილიონი დოლარია.

9. აპარტამენტი ლონდონში, ნაითსბრიჯის პრესტიჟულ უბანში
სასახლე ლიბანის ყოფილი პრემიერ-მინისტრის რაფიკ ჰარირისა და საუდის არაბეთის პრინცის სულთან ბინ აბდულაზიზის საკუთრებაში იყო. 2020 წელს კი 210 მილიონ ფუნტად გაიყიდა, სავარაუდოდ ჩინელ მილიარდერზე.
შენობა 62 000 კვ.მ მიწის ნაკვეთზეა აშენებული და მოიცავს 45 ოთახს, მათ შორის მდიდრულ საძინებლებს, ელეგანტურ მისაღებ ოთახსა და დახვეწილი დიზაინის დარბაზს ღონისძიებებისთვის.
სახლში ასევე მოწყობილია აუზი, სპა, კინოთეატრი და გამწვანებული ტერასა, საიდანაც შთამბეჭდავი ხედი იშლება ლონდონის ჰაიდ პარკზე.

10.Four Fairfiled Pond, აშშ
ეს იტალიური რენესანსის სტილში გადაწყვეტილი სახლი მილიარდერ ირა რენერტს ეკუთვნის.
როგორც ბინადრებისთვის, ისე სტუმრებისთვის სახლში უამრავი გასართობია გათვალისწინებული: საცურაო აუზი, კალათბურთის მოედანი, ბოულინგი, 164-ადგილიანი თეატრი, კინო, ბილიარდი, ჩოგბურთის მოედნები და სხვა. სახლი 250 მილიონ დოლარად არის შეფასებული.