ქალები უძრავი ქონების სექტორში: გამოწვევები, შესაძლებლობები და გზა წარმატებისკენ — ინტერვიუ ნინო მესაბლიშვილთან

"საიდან დავიწყო, არც ვიცი, რადგან უკვე 20 წელი გავიდა, რაც ვმუშაობ და ამ ხნის განმავლობაში ძალიან დიდი და საინტერესო გზა გავიარე. ამ გზაზე უდიდესი გამოცდილება მივიღე "თეგეტა მოტორსში", სადაც ყველაზე მეტი ცოდნა შევიძინე, განსაკუთრებით სხვადასხვა ადამიანებთან ურთიერთობის, ასევე პროფესიულადაც გავიზარდე. შემდეგ იყო "ჰილტონი", სადაც საერთაშორისო ბრენდის სტანდარტებს გავეცანი და ძალიან დიდი პროფესიული ნახტომი გავაკეთე, როცა HR-დან გავხდი სასტუმროს საოპერაციო დირექტორი და შემდეგ კი სასტუმროს გენერალური მენეჯერი. თუმცა პანდემიის დროს დავრჩი უმუშევარი და გადავწყვიტე, რომ სფერო შემეცვალა, 2021 წლის ბოლოს "სიემსიში" დავიწყე მუშაობა. "სიემსიში"  ამჟამად ვმუშაობ ბიზნესისა და ორგანიზაციული განვითარების დირექტორის პოზიციაზე. ვხელმძღვანელობ გაყიდვებს, მარკეტინგსა და ტენდერებს, პარალელურად ვმუშაობ შიდა ორგანიზაციულ პროექტებსა და ახალი პროდუქტების განვითარებაზე.  "სიემსი" სამშენებლო პროექტების მართვის პირველი კომპანიაა საქართველოში, და პირველად აღმოვჩნდი უძრავი ქონების და მშენებლობის სექტორში. ეს სფერო ძალიან დინამიური, მზარდი და საინტერესო აღმოჩნდა, და ვფიქრობ, რომ ეს მიმართულება ერთ-ერთი მოწინავეა საქართველოში განვითარების თვალსაზრისით.

ჩემიყველაზედიდიმოტივატორი — უპირველესყოვლისა — ჩემიშვილებია! რაც შეეხება პროფესიულ მოტივატორებს, ძალიან მიყვარს სტერეოტიპების დანგრევა, ალბათ ამიტომაც ხშირად ვიცვლი სფეროებს. მიყვარს ახალ და გამოწვევებით სავსე ინდუსტრიაში მუშაობა და ნულიდან დაწყება, რათა შევისწავლო ახალი სფეროს სპეციფიკა და გავიცნო ამ სფეროში მოღვაწე საინტერესო და საჭირო ადამიანები. განსაკუთრებით კი, თუ ეს სფერო მამაკაცებით დომინირებული სფეროა, რადგან ეს ორმაგად ამძაფრებს გამოწვევას".

ქალების ჩართულობა უძრავი ქონების სექტორში

"2022 წლის მონაცემებით უძრავ ქონებაში (საერთაშორისო მაშტაბით) 45% ქალია დასაქმებული. (https://www.statista.com/)
რაც შეეხება საქართველოს, ამ სექტორში 43% ქალები მუშაობენ, ხოლო 57% მამაკაცები (საქართველოს სტატისტიკის ეროვნული სამსახურის სტატისტიკური პუბლიკაცია, 2023). არც ჩვენი კომპანია ჩამორჩება ტენდენციას და ამ ეტაპზე დასაქმებულთა 40% ქალია, სხვადასხვა მენეჯერულ თუ ადმინისტრაციულ პოზიციებზე მომუშავე. სტატისტიკის მიხედვით, ქალების როლი ამ სექტორში ყოველწლიურად მატულობს, რაც გვაძლევს იმის ვარაუდის შესაძლებლობას, რომ უახლოეს 3-5 წელიწადში გენდერული ბალანსი საუკეთესო მაჩვენებელს — 50-50%-ს მიაღწევს. რაც შეეხება საქართველოს, ვფიქრობ, უძრავი ქონების სფეროში ქალები ყველაზე მეტად გვხვდებიან ძირითადად გაყიდვებსა და მარკეტინგში, და ასევე საკმაოდ ხშირია  ადმინისტრაციულ პოზიციებზე (*HR, ბუღალტერი და ა.შ.). მამაკაცებს უფრო ტექნიკური და ინჟინრული როლი დარჩათ მათი ტექნიკური უნარებისა თუ ფინანსური ანალიტიკის გათვალისწინებით, ამიტომ ისინი დიდწილად ტოპ მენეჯმენტში არიან".

გამოწვევები და ბარიერები ქალებისთვის 

"ქალები უძრავი ქონების სექტორში რამდენიმე მნიშვნელოვან დაბრკოლებას აწყდებიან. პირველ რიგში, ეს სფერო ისტორიულადაა უფრო მამაკაცებით დომინირებული, განსაკუთრებით სამშენებლო ნაწილში. ეს ქმნის სირთულეებს, როდესაც ქალებს უწევთ თავი დაამტკიცონ და წარმოაჩინონ. მეორე მხრივ, სამშენებლო სექტორის მოთხოვნები ხშირად ასოცირდება მძიმე ფიზიკურ შრომასთან, რაც ქალებისთვის დამატებით გამოწვევებს ქმნის. გარდა ამისა, ქალებს შესაძლოა ნაკლები მხარდაჭერა ჰქონდეთ კარიერული განვითარების გზაზე, რადგან ხშირად სამომავლო შესაძლებლობები უფრო მცირეა. მუშაობამ გენდერულად არაბალანსირებულ გარემოში შესაძლოა გამოიწვიოს სტრესი და უნდობლობის შეგრძნება. თუმცა ეს დაბრკოლებები შეიძლება გადაილახოს სათანადო მხარდაჭერით, განათლებითა და მენტორინგის პროგრამებით, რომლებიც გენდერულ თანასწორობას და თანაბარ შესაძლებლობებს უწყობს ხელს".

ქალების მხარდაჭერა უძრავი ქონების სექტორში

"ზოგადად, ქალების მხარდასაჭერი ინიციატივები უძრავი ქონების სექტორში უმნიშვნელოვანეს როლს ასრულებს, რაც ხელს უწყობს მათ კარიერულ ზრდას და წარმატებებს. არსებობს, თუმცა არცთუ ისე ხშირია ისეთი პროგრამები, რომლებიც მიზნად ისახავს ქალთა ლიდერობის ხელშეწყობას, ასევე სხვადასხვა ვორკშოპები და ტრენინგები, რომლებიც ქალებს უზრუნველყოფს საჭირო უნარ-ჩვევებით, რათა მეტი კონკურენტუნარიანობა ჰქონდეთ უძრავი ქონებისა და სამშენებლო სექტორებში. ასევე, გარკვეულ ორგანიზაციებში, მათ შორის ჩვენთან, არსებობს მენტორინგის პროგრამები, რომლებიც ქალებს გამოცდილ პირთან მუშაობით საშუალებას აძლევს, განავითარონ თავიანთი პროფესიული უნარ-ჩვევები და საკუთარი კარიერა უფრო მაღალ დონეზე აიყვანონ. ზოგიერთი კომპანია აქტიურად ეწევა გენდერულ თანასწორობას და ქმნის უფრო დახვეწილ გარემოს ქალებისთვის, რათა მათ შეძლონ ზრდა და განვითარება, რაც ასევე გაახლოებს  საერთაშორისო სტანდარტებთან. მსგავსი ინიციატივები კიდევ უფრო უწყობს ხელს იმ ქალებს, რომლებიც ამ სფეროში მუშაობას იწყებენ, რათა ლიდერობისა და მართვის უნარებს დაეუფლონ".

გზა წარმატებისკენ

"იმ კითხვაზე პასუხად, თუ რამდენად რთულია საქართველოში ქალისთვის უძრავი ქონების სფეროში კარიერის დაწყება და განვითარება — უნდა გავიღიმო და ვთქვა: რთულია, მაგრამ შეუძლებელი არაფერია! მთავარია მონდომება, ინტერესი, ჟინი და შედეგებზე ორიენტაცია. ეს ის თვისებებია, რომლებიც გვაძლევს ძალას, რომ დავძლიოთ ყველა დაბრკოლება, შევისწავლოთ ახალი სფერო და გავიკვალოთ გზა წარმატებისკენ!  მესმის, რომ ეს სფერო უფრო მეტად მამაკაცებით არის დომინირებული, განსაკუთრებით სამშენებლო ნაწილში, მაგრამ ეს არ არის დაბრკოლება. პირიქით, ეს უნდა იყოს ორმაგი მოტივაცია, რომ წარმატებას მივაღწიოთ და დავუმტკიცოთ საკუთარ თავს და გარშემომყოფებს, რომ ჩვენც შეგვიძლია ამ სფეროში წარმატებულად მუშაობა და განვითარება.

მთავარია მონდომება და სწავლა — ნებისმიერი ადამიანი შეძლებს განვითარდეს ნებისმიერ სფეროში, თუ მისი სურვილი და მიზანი სწორი იქნება, ამის ღრმად მწამს. კარიერულ გზაზე კი სამ ფრაზას/პრინციპს გამოვყოფდი:

• არ შეუშინდე სტერეოტიპებს, პირიქით, ეცადე დაანგრიო ისინი!

• შეუძლებელი არაფერია, მთავარია მონდომება!

• ქალებს კაცებისგან განსხვავებით კარგი ინტუიცია გვაქვს და კარგად ვცნობთ ადამიანებს, ამიტომ ეცადეთ გამოიყენოთ ჩვენი ყველაზე საჭირო და ხელთარსებული ინსტრუმენტი — ინტუიცია!

მნიშვნელობა არ აქვს არც პროფესიას, არც სქესს და არც განათლებას, თუ გვექნება მოტივაცია და სურვილი, რომ ვიყოთ წარმატებული, მაშინ ვერავინ და ვერაფერი შეგვაჩერებს! Fall down 7 times, get up 8! თუ უკან დახევა მოგიწევს, შემდეგ 2 ნაბიჯი უნდა გადადგა წინ და ამ შემართებით აუცილებლად მიაღწევ სასურველ შედეგს და მიზანს"!