კერძო სახლის აშენება თუ ყიდვა? - თითოეულის უპირატესობები და ფასები

აშენებული სახლის ყიდვის უპირატესობები:

• პროექტი ჩაბარებულია მუნიციპალური ინსპექციისთვის, შესაბამისად, დამატებითი ხარჯების გაღება აღარ გვიწევს;

• გადაფორმებისთანავე შეგვიძლია საცხოვრებლად გადასვლა;

• არ გვიწევს დროის დიდი რესურსის დახარჯვა პროცესის მონიტორინგში, რადგან რეალიზატორთან მოლაპარაკებისა და უძრავი ქონების პროცესმა შეიძლება სულ რამდენიმე დღე გასტანოს. 

გამოწვევები, რომელიც ამ პროცესში გვექნება:

• როგორც წესი, აშენებული სახლის ყიდვა მშენებლობაზე ძვირი ჯდება;

• პროექტი უკვე სხვისი გემოვნებით არის შექმნილი და მის დაგეგმარებაში ცვლილებებს ვეღარ შევიტანთ;

• თუ ნაცხოვრებ სახლს ვყიდულობთ, დიდია ალბათობა იმისა, რომ სარემონტო სამუშაოების ჩატარება მოგვიწევს, რაც დამატებითი ხარჯია;

• არ ვართ დაზღვეულები, რომ მშენებლობისას უსაფრთხოების ნორმები სრულად იყო დაცული (მაგალითად, საძირკველი იმდენად მყარია, რომ მშვიდად შეიძლება ვიყოთ დიდი მაგნიტუდის მიწისძვრის დროს ან საჭიროების შესაბამისად არის ჩატარებული წლების სადრენაჟო სამუშაოები) და სხვა. 

უძრავი ქონების კომპანიებზე დაყრდნობით თვალი გადავავლოთ დედაქალაქში კერძო სახლის მშენებლობის ხარჯებს და ჩვენს ვებგვერდზე განთავსებულ რეალურ განცხადებებზე დაყრდნობით შევადაროთ უკვე აშენებულის ფასს. 

დღევანდელი მდგომარეობით, კერძო სახლის თეთრი კარკასის მდგომარეობამდე მიყვანის ფასი 1 კვ.მ-ზე 450-550 დოლარამდე მერყეობს. რიგ შემთხვევებში შეიძლება ფასი 600$-მდეც გაიზარდოს, რაც დამოკიდებულია პროექტზე, მასშტაბებსა და სამშენებლო მასალებზე. 

სახლის მშენებლობას თან ახლავს მიწის ნაკვეთის მოძიება, რომელთა ფასებიც თბილისის რამდენიმე მოთხოვნად უბანში, რეალური მომხმარებლების განცხადებების მიხედვით 1 კვ.მ.-ზე შემდეგია:

• დიდი დიღომი - 234$

• სოფელი დიღომი - 134$

• დიღომი 1-9 – 406$

• ლისის ტბის ტერიტორია - 194$

• თხინვალი - 180$

• მთაწმინდა - 207$

• ივერთუბანი - 261$

• გლდანულა - 116$

• სოფელი გლდანი - 92$

გასათვალისწინებელია, რომ სახლის მშენებლობის ფასი მიწის ნაკვეთის ადგილმდებარეობის შესაბამისად იცვლება. 

ჩვენს პლატფორმაზე 2025 წლის აგვისტოს მდგომარეობით არსებული განცხადებების საფუძველზე დავთვალეთ სარემონტო კერძო სახლების ფასები ყველაზე მოთხოვნად უბნებში:

• დიდი დიღომი - 513$ 

• მთაწმინდა - 1,004$

• ლისის ტბის ტერიტორია - 540$

• დიღომი 1-9  - 988$ 

*სხვა სასურველ ტერიტორიაზე, მიწის ნაკვეთისა თუ კერძო სახლის ფასების სტატისტიკის დასადგენად, ეწვიეთ ბმულს. 

რომ შევაჯამოთ, უკვე არსებული სახლის შეძენა შეიძლება უფრო ოპტიმალური იყოს, ვიდრე აშენება, თუმცა  როგორც აღვნიშნეთ, ამას ხარისხთან დაკავშირებით გარკვეული რისკები ახლავს, რასაც შეიძლება, რემონტის ხარჯებიც დაემატოს.