ყველაზე მოთხოვნადი ვაკანსიები და დასაქმების ბაზრის ტენდენციები

ბოლო წლებში სერვისის სფეროში გაზრდილმა სამუშაო როტაციამ დასაქმების ბაზარს გარკვეული კრიზისი შეუქმნა.

წელს ჩვენს ვებგვერდზე განთავსებული ვაკანსიები მოწმობს, რომ ყველაზე ხშირად სწორედ სერვისის მიმწოდებლები ეძებენ ახალ თანამშრომლებს და მუდმივ რეჟიმში აახლებენ განცხადებებს. მეორე მხრივ კი ვაკანსიების ყველაზე ხშირი მაძიებლებიც სწორედ სერვისის სფეროთი ინტერესდებიან.

აღნიშნული ტენდენციის მთავარი მიზეზები: 

• მაღალი მოთხოვნის ფონზე თანამშრომლების სწრაფი გადინება;

• იზრდება სერვისის მიმწოდებელი ბიზნეს ობიექტების რაოდენობა;

• სერვისის წილის ზრდა ეკონომიკაში;

• სერვისში დასაქმებულთა საჭიროება მაღალია და მათი ტექნოლოგიებით ჩანაცვლება შეუძლებელი;

• სერვისის სფეროში დასაქმება შედარებით მარტივია.

სურათის კიდევ უფრო უკეთ აღსაქმელად, წარმოგიდგენთ 2025 წლის ოქტომბერში 

 2025 წლის ოქტომბერში  ჩვენს ვებგვერდზე ყველაზე დიდი რაოდენობით განთავსებულ 10 ვაკანსიას:

1. მზარეული, მცხობელი, დამხმარე;

2. გამყიდველი, მოლარე, კონსულტანტი;

3. დასუფთავება;

4. გაყიდვები, მარკეტინგი;

5. დაცვა, უსაფრთხოება;

6. მძღოლი, კურიერი;

7. რემონტი, მშენებლობა;

8. ხელოსანი, შეკეთება, მონტაჟი;

9. ძიძა, მომვლელი, დამხმარე;

10. მუშა, მტვირთავი.

• სამუშაო ძალა და უმუშევრობის დონე ქვეყანაში

საქსტატის მონაცემების თანახმად, 2025 წლის III კვარტალში საქართველოში უმუშევრობის დონე წინა წლის შესაბამის პერიოდთან შედარებით 0.5 პროცენტული პუნქტით შემცირდა და 13.3% შეადგინა.

როგორც საქსტატის მიერ გავრცელებულ ინფორმაციაშია ნათქვამი, 2025 წლის III კვარტალში წინა წლის შესაბამის პერიოდთან შედარებით დაქირავებულთა რიცხოვნობა გაიზარდა 0.9 ათასი კაცით (0.1%) და 975.3 ათასს მიაღწია, ხოლო თვითდასაქმებულთა რიცხოვნობა 14.3 ათასით შემცირდა (3.3%) და 418.4 ათასი შეადგინა.

რაც შეეხება სამუშაო ძალას, ოფიციალური მონაცემებით მიმდინარე წლის III კვარტალში ის 1 609 000-ს შეადგენდა. უმუშევრობის დონე კი 2025 წლის პირველ ორ კვარტალთან შედარებით შემცირებულია. აღნიშნული საკითხი წლებია, ჩვენი ქვეყნის შრომის ბაზრის ერთ-ერთი მთავარი გამოწვევაა, თუმცა პანდემიის შემდეგ ვითარება შედარებით დასტაბილურდა, რასაც საქსტატის კვლევებიც ადასტურებს:

2025 წლის III კვარტალში უმუშევართა რაოდენობა შემცირდა 12.1 ათასით (5.4%) და 213.7 ათასი შეადგინა.

საინტერესოა ეკონომიკისა და მდგრადი სამინისტროს მიგნება ახალგაზრდებში უმუშევრობის მიზეზებთან დაკავშირებით, რაც გარკვეულწილად ხსნის სერვისში დასაქმებულთა მაღალ რაოდენობას:

სამინისტროს 2024 წლის ანგარიშის თანახმად, ახალგაზრდებში უმუშევრობის მაღალი დონე განპირობებულია იმით, რომ „ახალგაზრდები უმეტესწილად ეუფლებიან უმაღლეს განათლებას და სწავლის დასრულების შემდეგ აწყდებიან იმ რეალობას, რომ ერთი მხრივ შრომის ბაზარზე არ არის მოთხოვნა მათ მიერ დაუფლებულ პროფესიებზე; მეორე მხრივ, მათი კვალიფიკაცია და სამუშაო გამოცდილება ვერ აკმაყოფილებს შრომის ბაზრის მოთხოვნებს. ასევე გასათვალისწინებელია ისიც, რომ ახალგაზრდებს სხვადასხვა ფაქტორის გათვალისწინებით სჭირდებათ მეტი დრო სასურველი სამუშაოს მოსაძიებლად“.

საქსტატის ზოგადი სტატისტიკის თანახმად, უმუშევრობის დონე ახალგაზრდებშიც შემცირებულია, თუმცა საკუთარი პროფესიით დასაქმება მაინც გამოწვევად რჩება. 

• რა სფეროებში საქმდებიან ყველაზე ხშირად საქართველოში?

საქსტატს მიმდინარე წლის ჯამური მონაცემები ჯერ არ გაუვრცელებია, თუმცა 2024 წლის სტატისტიკაზე დაყრნობით, შეგვიძლია, გარკვეული სურათი დავინახოთ. 

2024 წელს ტოპ 5 პოზიცია, რაზეც სამუშაო ძალა იყო დასაქმებული, შემდეგია: 

• მომსახურებებისა და გაყიდვების სფეროებში დასაქმებული პირები; 

• სპეციალისტი-პროფესიონალები; 

• სოფლის, სატყეო და თევზის მეურნეობის კვალიფიციური მუშაკები;

• არაკვალიფიციური მუშაკები;

• ხელოსნები და მონათესავე სფეროების მუშები.

როგორც საქსტატის მონაცემებიდან იკვეთება, გასულ წელს სოფლის მეურნეობა და სერვისი წამყვანი დასაქმების სფეროები იყო. 

საერთო დასაქმებულთა რაოდენობაში ყველაზე დაბალ წილს კი ოფისის დამხმარე პერსონალი და მენეჯერები იკავებდნენ. 

გასულ წელს გაიზარდა სამუშაო ძალის მიწოდებაც, რის შესახებაც ეკონომიკისა და მდგრადი განვითარების სამინისტროს 2024 წლის შრომის ბაზრის ანგარიშშია აღნიშნული. უწყების შეფასებით, აღნიშნული ტენდენცია განსაკუთრებით საყურადღებოა იმ ფონზე, როდესაც 2015-2020 წლებში, დაბალი ბუნებრივი მატებისა და გაზრდილი მიგრაციული ნაკადის შედეგად, შრომისუნარიანი მოსახლეობის რაოდენობა და აქტიურობის დონე კლებადობით ხასიათდებოდა.

რა ვაკანსიებს ეძებდნენ ყველაზე ხშირად 2025 და 2024 წლების აგვისტოში, სექტემბერსა და ოქტომბერში?

ჩვენს ვებგვერდზე განთავსებულ ვაკანსიებზე დაყრდნობით, ყველაზე ხშირად ვაკანსიებს სწორედ სერვისის სფეროში ეძებდნენ. მათ შორის მძღოლის, კურიერის, დაცვის, უსაფრთხოების, გამყიდველის, მოლარის, ძიძის, მომვლელის, მზარეულის, მცხობელის, სასტუმროს თანამშრომლის პოზიციებზე. 

2025 წელს 2024 წელთან შედარებით მნიშვნელოვნად არის გაზრდილი საზღვარგარეთ სამუშაოს მაძიებელთა რაოდენობა. ამასთან, მოიმატა მედიცინის სექტორში დასაქმების მსურველთა რაოდენობამაც, თუმცა სერვისთან შედარებით აღნიშნულ სფეროში შედარებით ნაკლები ვაკანსია თავსდება. 

მიმდინარე მდგომარეობით (2025 წლის ნოემბერი), ვაკანსიები ყველაზე მცირე რაოდენობით ქვეყნდება იურიდიულ და ინჟინერიის სფეროებში. მიუხედავად იმისა, რომ ჩვენს ქვეყანაში იურისტთა რაოდენობა მაღალია და აღნიშნული პროფესია საკმაოდ პოპულარული, ვაკანტური პოზიციები  შეზღუდულია, რასაც რეალურ დროში განთავსებული განცხადებებიც  ადასტურებს. 

რომ შევაჯამოთ, მოსალოდნელია, რომ სერვისში ვაკანსიების რაოდენობის მზარდი ტენდენცია შენარჩუნდება, გადინება კი კვლავ მაღალ ნიშნულზე დარჩება. ამავდროულად, გაიზრდება ანაზღაურებასა და მოქნილ სამუშაო პირობებზე მოთხოვნები დასაქმებულთა მხრიდან. 

ყველა ვაკანსიის სანახავად ეწვიეთ - jobs.ss.ge -ის.