როგორ დავაბანდოთ უძრავ ქონებაში თანხა და რა შემოსავლის მიღება შეგვიძლია

თითოეული ადამიანი, რომელსაც თავისუფალი თანხა უჩნდება, იწყებს ფიქრს, სად აჯობებს ამ სახსრების დაბანდება, რათა მომავალში გარანტირებული შემოსავალი მიიღოს. ერთ-ერთ პირველ ვერსიად, ყოველთვის უძრავი ქონების შეძენა განიხილება. ეს ნამდვილად სწორი მიდგომაა, რამდენადაც უძრავი ქონების ფასი არ განიცდის სწრაფ რყევებს, ის არასდროს გაუფასურდება სრულად და თითქმის გამორიცხულია ფასის კლებაც. პირიქით, უძრავი ქონების ფასი დროთა განმავლობაში იზრდება და თუ მაინც, გარკვეული ფაქტორების ზეგავლენით დაიკლო ღირებულებამ, ეს ხანმოკლე პერიოდს მოიცავს და აუცილებლად დაუბრუნდება, სულ მცირე, საწყის ღირებულებას. გარდა ამისა, გამორიცხულია უძრავ ქონებაზე მოთხოვნის შემცირებაც.  ჩვენ მხოლოდ ის უნდა გავარკვიოთ, როგორ დავაბანდოთ ფული სწორად.

სარფიანი ინვესტიციის განსახორციელებლად, საჭიროა განვსაზღვროთ რა შემოსავალი გვინდა მოგვიტანოს შენაძენმა, რა ტიპის ინვესტიციები არსებობს უძრავი ქონების სექტორში და ინდივიდუალურად ჩვენთვის, რომელი იქნება ყველაზე ხელსაყრელი.

უძრავ ქონებაში ინვესტირებისას ჩვენ ვყიდულობთ მზა ან მშენებარე ობიექტს. რაც ითვალისწინებს, ერთ შემთხვევაში, უძრავი ქონების შემდგომ გაქირავებას - ეს კაპიტალურ ინვესტიციას წარმოადგენს. მეორე შემთხვევაში, შეგვიძლია გადავყიდოთ უძრავი ქონება, რაც ასევე შემოსავალს მოგვიტანს.

ინვესტიცია, შეიძლება რამდენიმე სახის იყოს და ის დამოკიდებულია როგორც საინვესტიციო ობიექტზე, ასევე ჩვენს მიზნებზე, - ეს შეიძლება იყოს საცხოვრებელი სახლის შეძენა, რომელიც, როგორც უკვე ვთქვით, შეგვიძლია გავაქირაოთ ან გადავყიდოთ. ასევე, შეგვიძლია შევიძინოთ კომერციული ფართი - ოფისი, სავაჭრო სივრცე ან საწყობი. კიდევ ერთ-ერთ ვარიანტად განიხილება მშენებარე ობიექტის შეძენა. ეს უკანასკნელიც, საკმაოდ პოპულარულ საინვესტიციო ტიპს წარმოადენს, რა დროსაც, ჩვენ ვყიდულობთ კარკასის მდგომარეობაში მყოფ კომერციულ ან საცხოვრებელ ფართს, ხოლო შემდეგ ბევრად მაღალ ფასად ვყიდით.

გადაყიდვის შემთხვევაში შესაძლოა ვერ მივიღოთ დიდი შემოსავალი და მოგებამ 5-10% შეადგინოს, თუმცა თუ წლის განმავლობაში 2-3, ან უფრო მეტ ფართს შევიძენთ, თუნდაც 4 საცხოვრებელ ან კომერციულ ობიექტს, მოგება შესაბამისად წლიური 20-40% გამოვა, რაც დამეთანხმებით, არც თუ ისე მცირე შემოსავალია.

ინვესტიციის  განხორციელება ინფრასტრუქტურულად განვითარებულ ქალაქებში აჯობებს, მაგალითად თბილისსა და ბათუმში, სადაც ცხოვრების ხარისხი, სულ მცირე ორჯერ, აღემატება დანარჩენ დასახლებულ პუნქტებს საქართველოში. ისევე, როგორც ყველა დიდ ქალაქში, თბილისში უმჯობესია ფართი შევიძინოთ იმ უბნებში, სადაც ნაკლებად ინტენსიურად მიმდინარეობს მშენებლობა და გაქირავების შემთხვევაში ბევრი კონკურენტი არ გვეყოლება. ასე, ერთხელ გაკეთებული სწორი ინვესტიციით მუდმივად მივიღებთ პასიურ შემოსავალს, ისე, რომ ამისთვის არანაირი ძალისხმევა არ დაგვჭირდება. გარდა ამისა, საჭიროების შემთხვევაში, ყოველთვის შეგვეძლება ქონება ჩვენი საჭიროებისთვის გამოვიყენოთ, ვიცხოვროთ შეძენილ ფართში, გავხსნათ სავაჭრო ობიექტი ან გამოვიყენოთ საოფისედ.

იმ შემთხვევაში თუ არენდაზე შევაჩერებთ არჩევანს, უფრო მომგებიანია ის დღიურად გავაქირაოთ, ვიდრე ყოველთვიურად. ასე ჩვენი ინვესტიცია ბევრად მეტ შემოსავალს მოგვიტანს. თუმცა, ამ ვარიანტს ნაკლიც აქვს და ბევრად მაღალია ქონების დაზიანების რისკი, გარდა ამისა, მას დასჭირდება რეგულარულად დალაგება.

ჩვენ შეგვიძლია განვიხილოთ კიდევ ერთი ვარიანტი, ეს არის ჰოსტელის გახსნა. ამრიგად, ჩვენ ქონების ნაწილში მაინც, მუდმივად გვეყოლება მდგმურები, რაც იმას ნიშნავს, რომ ბევრად მალე გავალთ სუფთა მოგებაზე. აღნიშნული ვარიანტის ნაკლი მხოლოდ ის არის, რომ აუცილებლად დაგვჭირდება დამხმარე, ფართის თანამედროვე ავეჯით მოწყობა და იურიდიული საკითხების მოგვარება.

გარდა თბილისისა და ბათუმისა, უძრავი ქონების შეძენა მომგებიანი იქნება თბილისის შემოგარენშიც. ქალაქგარეთ სახლი შეგვიძლია მთელი წლის განმავლობაში გავაქირაოთ წვეულებებისთვის, ხოლო ზაფხულის განმავლობაში თავად დავისვენოთ. ასეთი ინვესტიციის შემთხვევაში, მნიშვნელოვანია გავითვალისწინოთ რომ სააგარაკე სახლი რეგულარული ტრანსპორტისთვის ხელმისაწვდომი იყოს, ასევე დაგვჭირდება კარგი რემონტი, ავეჯი და საყოფაცხოვრებო ტექნიკა. უფრო მაღალი მოთხოვნით სარგებლობს 50 კვმ-ზე მეტი ფართის კოტეჯები და კერძო სახლები, სულ მცირე ერთი საძინებელი ოთახით.

სულ უფრო პოპულარული ხდება აპარტამენტების შეძენაც. ამას აქვს მნიშვნელოვანი დადებითი მხარეები, კონსიერჟი, რესეფშენი და სასტუმროს სხვა სერვისები, რომლებზეც თავად არ მოგვიწევს ზრუნვა. აქ დაგხვდება მაღალგანვითარებული ინფრასტრუქტურა, მომსახურება და ამასთანავე, ის შეგვიძლია გავაქირაოთ სასტუმროს მმართველობის დახმარებით, რაც თავიდან აგვაცილებს ზედმეტ საზრუნავს. ხოლო, ნაკლი მხოლოდ ის აქვს, რომ ასეთი ფართი, სავარაუდოდ, არ გამოგვადგება მუდმივ საცხოვრებლად, თუ ასეთი საჭიროება წარმოიშვა.

რა ტიპის უძრავი ქონებაც უნდა შევიძინოთ და რა მიზნობრიობითაც, ყველა შემთხვევაში, მნიშვნელოვანია უსაფრთხოება და რისკების შემცირება. გაითვალისწინეთ, რომ შეამოწმოთ დოკუმენტები, ასევე გასათვალისწინებელია მშენებლობის ხარისხი და არ დაგავიწყდეთ, თავადაც ყველაფერი კანონის ფარგლებში მოაქციოთ. ეს ეხება, როგორც შეძენისას, ასევე მისი შემდგომი გამოყენების დროს, რათა თავიდან აიცილოთ იურიდიული გართულებები და ზედმეტი ხარჯები.