იპოთეკური სესხი თუ შიდა განვადება? განსხვავებები და უპირატესობები

თუ ბინის შეძენას გეგმავ, თუმცა არ იცი რომელი უფრო მომგებიანია - შიდა უპროცენტო განავდება თუ იპოთეკა, მაშინ ეს ბლოგი დაგეხმარება ინფორმირებული გადაწყვეტილების მიღებაში.

ამ სტატიაში Financer.com-ის პირადი ფინანსების კონსულტანტთან ერთად განვიხილავთ უძრავი ქონების შეძენის ორ ყველაზე გავრცელებული გზას - სამშენებლო კომპანიის შიდა განვადებასა და ბანკის იპოთეკურ სესხს.

ვნახოთ, რა უპირატესობებით გამოირჩევა თითოეული მათგანი და რომელია უფრო ხელსაყრელი გზა თქვენი ფინანსური მდგომარეობის შესაბამისად.

რას ნიშნავს შიდა განვადება?

შიდა განვადება არის სამშენებლო კომპანიების მიერ შემოთავაზებული გადახდის ფორმა ბინის შესაძენად, რომლის დროსაც მყიდველი ბინის საფასურს კომპანიას უხდის არა ერთიანად, არამედ ნაწილობრივ - ყოველთვიური გადახდებით.

რაც მთავარია, კომპანიების უმეტესობა ბინის მყიდველებს სთავაზობს უპროცენტო შიდა განვადებას, რაც განსაკუთრებით მიმზიდველს ხდის ბინის ამ გზით შეძენას.

რა არის იპოთეკური სესხი?

იპოთეკური სესხი კომერციული ბანკების მიერ შემოთავაზებული საკრედიტო პროდუქტია, რომელიც ბინის შეძენას ემსახურება.

იპოთეკური სესხის აღებისას უზრუნველყოფაში იდება უძრავი ქონება (როგორც წესი, თავად შესაძენი ბინა), ხოლო ბანკი გვაძლევს დიდი მოცულობის სესხს კონკრეტული მიზნით - ბინის დასაფინანსებლად.

რომელი უფრო მომგებიანია - იპოთეკა თუ შიდა განვადება?

ამ კითხვაზე ცალსახა პასუხის გაცემა რთულია, რადგან ორივე მეთოდს ინდივიდუალური დადებითი და უარყოფითი მხარეები აქვს. ამასთანავე, არჩევანი დამოკიდებულია მსესხებლის პირად ფინანსურ მდგომარეობასა და არაერთ გარე ფაქტორზე.

იმისთვის, რომ აირჩიოთ ბინის დაფინანსების ოპტიმალური გზა, გამოვყოთ ორივე მეთოდის - იპოთეკისა და შიდა განვადების უპირატესობები.

შიდა განვადების დადებითი და უარყოფითი მხარეები:

●      შიდა უპროცენტო განვადება ბინებზე ხანმოკლე ვადით გამოირჩევა და შეადგენს 1-3 წელს. ვადა, როგორც წესი, დამოკიდებულია მშენებლობის ხანგრძლივობაზე.

●      იპოთეკისგან განსხვავებით, მისი დამტკიცება ბევრად მარტივია, რადგან არ მოითხოვება შემოსავლების დამადასტურებელი დოკუმენტების წარდგენა.

●      ხშირად არის, რომ დეველოპერი კომპანიები გვთავაზობენ 0%-იან შიდა განვადებას, რათა მოკლე ვადაში მარტივად მოიზიდონ მეტი მყიდველი. ეს კიდევ უფრო მიმზიდველს ხდის შიდა განვადებას ბინის შეძენის მსურველთათვის.

●      შიდა განვადების შემთხვევაში წინასწარ შესატანი თანხა უფრო მაღალია, ვიდრე იპოთეკური სესხით სარგებლობისას. იგი შეადგენს ბინის ღირებულების 20-50%-ს 

იპოთეკის უპირატესობები და უარყოფითი მხარეები:

●      იპოთეკა გრძელვადიანია, რომელიც შეგვიძლია 10 წელზე მეტი ვადითაც კი გადავანაწილოთ.

●      იპოთეკური სესხით სარგებლობისას გიწევს საპროცენტო ხარჯების გადახდა, შიდა განვადების უმეტესობა კი 0%-იანია, სწორედ ეს წარმოადგენს შიდა განვადების უდიდეს უპირატესობას.

●      ბანკი ითხოვს უზრუნველყოფაში ჩავდოთ ჩვენი ბინა. შესაბამისად, თუ სესხის გადახდა გაპრობლემდება და ვეღარ შევძლებთ მის დაფარვას, ვდგებით ბინის დაკარგვის რისკის წინაშე - ჩვენი ბინა დარჩება ბანკს და გადავა მის საკუთრებაში.

●      იპოთეკური სესხის დროს მოითხოვება წინასწარი შენატანი და თანამონაწილეობა. სხვაგვარად რომ ვთქვათ, ბანკი დააფინანსებს ბინის ღირებულების მხოლოდ 80-85%-ს, დანარჩენი ღირებულება კი ჩვენ უნდა დავფაროთ.

რომ შევაჯამოთ..

ბინის დასაფინანსებლად რომელ გზას აირჩევთ, თქვენი ფინანსური მდგომარეობიდან გამომდინარე უნდა შეირჩეს.

იპოთეკური სესხის მთავარი უპირატესობა დაფარვის ხანგრძლივი ვადაა, ხოლო შიდა განვადების მთავარი დადებითი მხარეა - ბინის შეძენა ზედმეტი ხარჯების (საკომისიოებისა და საპროცენტო ხარჯების) გარეშე.

გარდა ამისა, იპოთეკის აღების დროს ბანკი შეამოწმებს თქვენს გადახდისუნარიანობას და მოგთხოვთ შემოსავლების დადასტურებას, ხოლო შიდა განვადების დროს დეველოპერული კომპანია შედარებით მარტივი პროცედურით მოგყიდით ბინას.

თუ თვლით, რომ გაქვთ საკმარისი შემოსავლები და 2-3 წელში შეძლებ ბინის ხარჯების სრულად დაფარვას, მაშინ 3 წლიანი შიდა უპროცენტო განვადება კარგი ვარიანტი შეიძლება იყოს თქვენთვის. ამ გზით დაზოგავთ უამრავ თანხას.

ხოლო თუ ფინანსური მდგომარეობა ხელს არ გიწყობთ, რომ ყოველთვიურად დიდი შენატანები განახორციელოთ და ბინის თანხის დასაფარად დიდი ვადა გჭირდებათ, მაშინ უფრო ოპტიმალური იქნება იპოთეკურ სესხს მიმართოთ.

ამ გზის არჩევის შემთხვევაში, გაეცანით რჩევებს - როგორ შევიძინოთ ბინა იპოთეკით მომგებიანად. გახსოვდეთ, რომ იპოთეკასაც არაერთი უპირატესობა აქვს და გონივრულად შერჩეული იპოთეკური სესხი გაგიმარტივებს სასურველი ბინის შეძენას.