რა უნდა იცოდე ბახმაროს შესახებ?

ბახმარო მთის კურორტია გურიაში, ჩოხატაურის მუნიციპალიტეტში, რომელიც ზღვის დონიდან 2050 მეტრზე მდებარეობს. მისი უნიკალურობა იმაშია, რომ აქ ზღვისა და მთის ჰაერი ერთმანეთს ერწყმის და სხვადასხვა სახის დაავადებისთვის, შესანიშნავ სამკურნალო გარემოს ქმნის.

ნაძვნარით და სუფთა ჰაერით მდიდარი ბახმაროს უნიკალური, სამკურნალო თვისებები, პირველად 1890-იან წლებში, ოზურგეთის ექიმმა არტემ დავიდიანცმა აღმოაჩინა. ის ოზურგეთში 1875 წლიდან მსახურობდა და ციებითა და ტუბერკულოზით დაავადებული მრავალი პაციენტი ჰყავდა. დავიდიანცი თავადაც დაავადებული იყო ტუბერკულოზით. ექიმი, პაციენტებს სამკურნალოდ აგზავნიდა აბასთუმანში, სურამში და სხვა კურორტებზე მანამ, სანამ ნაცნობი მწყემსებისგან არ გაიგო, რომ მათ ციებისგან აჭარა-გურიის მთებზე ზაფხულის საძოვრებზე არსებული ჰავა იცავდა. არტემ დავიდიანცი თავიდან, მხოლოდ ქრონიკული ციებით დაავადებულ პაციენტებს აგზავნიდა აჭარა-გურიის მთებში, შემდეგ კი უფრო მძიმე დიაგნოზის ავადმყოფებიც გაგზავნა, ვისაც ციებასთან ერთად ტუბერკულოზიც ჰქონდა. ექიმმა აღმოაჩინა, რომ პაციენტების მდგომარეობა უმჯობესდებოდა და ის, თავადაც ამ გზით გამოჯანმრთელდა.  

არტემ დავიდიანცმა ბახმაროში თავისთვის პატარა სახლი აიშენა და გურულებს ურჩია, რომ ბახმარო უბნებად დაეყოთ და იქ სააგარაკო სახლები მათაც აეშენებინათ. 1895 წელს 100-მდე მოაგარაკე ეწვია ბახმაროს. ძირითადად ეს იყო გურიის ინტელიგენცია. 1896 წელს ბახმაროში იმყოფებოდა ასევე, ქართველი ეთნოგრაფი თედო სახოკია. მისი აღწერით იმ დროს ბახმაროში სულ რამდენიმე სახლი იდგა. მისასვლელად, კი გამოიყენებოდა ბილიკები ვანისქედიდან, მეწიეთიდან, ვაკიჯვრიდან და ხევიდან. ამავე პერიოდიდან ბახმარო და მისი მიწები სახაზინო საკუთრებაში გადავიდა და კურორტს ბახმაროს კოოპერატიული საზოგადოების გამგეობა მართავდა.

ბახმარო სახელმწიფო მნიშვნელობის კურორტად 1923 წელს გამოცხადდა. დაიწყო მისი სამეცნიერო შესწავლა და პოპულარიზაცია. ბახმაროს კურორტად გამოცხადებაში დიდი როლი შეიტანა ექიმმა ა. ინგოროყვამ, რომელიც მის მიერ შეგროვებული სამედიცინო ცნობების საფუძველზე ცდილობდა დაემტკიცებინა ბახმაროს სამკურნალო თვისებები და გაეგზავნა სამეცნიერო ექსპედიციები.

·      გასაქირავებელი აგარაკები ბახმაროში

იხილეთ ბმული:https://bit.ly/3r8xGSq

ბახმაროში, ძირითადად ძველი აშენებული ხის სახლებია წარმოდგენილი და ასევე, შეხვდებით ახალ კოტეჯებსაც, მაქსიმალური კომფორტით. განვითარების საწყის ეტაპზე, ბახმაროს მთებში არც ელექტროენერგია იყო, არც წყალგაყვანილობა და კანალიზაცია, არც ბუნებრივი აირი, ფასებიც შესაბამისად, დაბალბიუჯეტური იყო. საავტომობილო გზა ბახმაროს მიმართულებით 1980-იან წლებში მოეწყო. 1997 წელს აშენდა ეკლესია. 2012 წელს აშენდა სასტუმრო და კინოთეატრის შენობა. 2017 წელს დამტკიცდა ახალი გენერალური გეგმა. 2019 წელს მიენიჭა დაბის სტატუსი. 2019-2021 წლებში, კი აშენდა ახალი ელექტრომომარაგების სისტემა. დღეს სიტუაცია სრულიად გამოსწორებული და შეცვლილია, მოეწყო ყველანაირი სახის კომუნიკაციები, რაც დამსვენებლებისთვის გარკვეულ კომფორტს და კარგ პირობებს ქმნის. კურორტის შესახებ ცნობადობა უფრო და უფრო გაიზარდა და მოიმატა მოთხოვნამ მიწის ნაკვეთებზე - როგორც დეველოპერული კომპანიების მხრიდან, ასევე კერძო პირების მხრიდან.

·      გასაყიდი მიწის ნაკვეთები ბახმაროში.

იხილეთ ბმული:https://bit.ly/436rgAx

ბახმაროში, ზაფხულის საკურორტო სეზონი მხოლოდ სამი თვის განმავლობაში გრძელდება. კლიმატი ზომიერად გრილია და საშუალო ტემპერატურა 14 გრადუსია. ზოგადი სტატისტიკის მიხედვით, დამსვენებლების 90% ქართველებია, ხოლო 10% კი უცხოელები, ძირითადად ევროპის ქვეყნებიდან შემოსული ტურისტები არიან. მოთხოვნა, ყოველწლიურად იმდენად მაღალია, რომ ჯავშნების მიღება გაზაფხულიდან იწყება და უკვე, ივნისის დასაწყისში, სექტემბრის ჩათვლით თითქმის ყოველთვის ივსება.