ისტორიები უბნებზე - პლეხანოვი, თბილისი

კულტურული ძეგლებით მდიდარი რაიონი, ასწლოვანი შენობა-ნაგებობებით, ძველი თბილისური ეზოებითა და ისტორიული სადარბაზოებით, თბილისის ერთ-ერთი ღირსშესანიშნაობაა. კულტურული მემკვიდრეობის 550-მდე ძეგლი სწორედ პლეხანოვზე, ჩუღურეთის რაიონში მდებარეობს, რაც თბილისში არსებულ კულტურული მემკვიდრეობის ძეგლების საერთო რაოდენობის მესამედს შეადგენს.

„პლეხანოვზე“, დღეს უკვე დავით აღმაშენებლის გამზირის ტერიტორიაზე XVIII საუკუნეში კუკიის ტყე იყო. კეთილმოწყობილ ტერიტორიად ის XIX საუკუნის 40-იანი წლებიდან იქცა. 1817 წლიდან კუკიის ჩრდილოეთ ნაწილში გერმანელი კოლონისტები დასახლდნენ. მათ უდიდესი წვლილი შეიტანეს "ახალი კუკიის" ფორმირებაში და სათავე დაუდეს ახალი რაიონის მშენებლობას.

1844-1854 წლებში, როდესაც თბილისს კავკასიის მეფისნაცვალი მიხეილ ვორონცოვი მართავდა, სოფელი კუკია თბილისის ნაწილად იქცა. აღმაშენებლის გამზირის მშენებლობაც ამ პერიოდშიც დაიწყო. თავიდან ქუჩას კავკასიის მეფისნაცვლის, დიდი მთავრის მიხეილ ნიკოლოზის ძე რომანოვის პატივსაცემად მიხეილის გამზირი ერქვა. მიხეილის რაიონში 32 ქუჩა გაიყვანეს, დარგეს ჭადრები და დააგეს ტროტუარი.

რაიონის განვითარების ეტაპები კარგად ჩანს მე-19 საუკუნის ბოლოსა და მეოცე საუკუნის დასაწყისის რუკებზე. 1844 წლის რუკაზე კუკიას რაიონი ჯერ კიდევ ფორმირების პროცესშია, 1867 წელს უკვე ფორმირებულია, ხოლო 1902 წლის რუკაზე არსებული ქუჩების ქსელი, დღევანდელს შეესაბამება.

1918 წელს რუსი მარქსისტის გიორგი პლეხანოვის გარდაცვალებასთან დაკავშირებით, გამზირს პლეხანოვის გამზირი ეწოდა. 1990 წელს გამზირმა ახალი სახელი შეიძინა და დავით აღმაშენებლის გამზირი ეწოდა.

2010 წლის იანვარში აღმაშენებლის გამზირზე სარესტავრაციო სამუშაოები დაიწყო, აღადგინეს შენობები, ასევე დამონტაჟდა თანამედროვე საკომუნიკაციო სისტემები და ქუჩის განათება. 2011 წლის ნოემბერში კი გამზირი საზეიმოდ გაიხსნა.

2018 წელს, მსოფლიოს ერთ-ერთმა გავლენიანმა გამოცემა Forbse-ის მიერ დასახელებულ, მსოფლიოს 12 ყველაზე მიმზიდველ უბანს შორის, "პლეხანოვიც" დასახელდა. სტატიის ავტორი წერს, რომ "პლეხანოვი", თბილისი ყოფილი საბჭოთა ქალაქიდან, ერთ-ერთ ყველაზე მოდურ და მიმზიდველ ადგილად იქცა. ამასთან, "პლეხანოვი" ის ადგილია, სადაც ძველი შენობების რენოვაცია მოხდა და რომელიც თბილისელების თავშეყრის საყვარელ ადგილად იქცა.

"განახლებული აღმაშენებლის გამზირი განსაკუთრებით პოპულარული მას შემდეგ გახდა, რაც იქ  "ფაბრიკა" გაიხსნა. ადგილი, სადაც საბჭოთა კავშირის დროს სამკერვალო ფაბრიკა იყო განთავსებული დღეს სასტუმროს, ბარებსა და კაფეებს აერთიანებს. ეს არის კრეატიული ახალგაზრდებისა და ტურისტების თავშეყრის ადგილი, სადაც ხშირად იმართება მუსიკალური კონცერტები" - ნათქვამია სტატიაში.

მაღალი ტურისტული ნაკადის გამო, დღეს აღმაშენებლის გამზირზე მაღალი მოთხოვნაა უძრავ ქონებაზე. მაღალია მოთხოვნა, როგორც საოფისე და სავაჭრო, ასევე საცხოვრებელ უძრავი ქონებაზე, საინვესტიციო მიზნებისთვის.