როგორ შევარჩიოთ ეკოლოგიურად სუფთა უბანი საცხოვრებლად?

ჩვენს დედაქალაქში ეკოლოგიურად სუფთა ლოკაციის პოვნა დიდი ფუფუნების საგანი გახდა, რადგან მოსახლეობის ზრდისა და დიდი განაშენიანების პირობებში გაიზარდა სამშენებლო მტვრის, ავტომანქანების გამონაბოლქვისა და ხმაურის რაოდენობაც.

კოვიდ-პანდემიის დროს ავტომობილების გადაადგილების აკრძალვის პერიოდში მკვეთრად გაუმჯობესდა ჰაერის ხარისხი, სპეციალისტის ხარისხი არ სჭირდებოდა იმას, რომ გვეგრძნო ჟანგბადი და სუფთა ჰაერი. ამავე პერიოდში ბევრი ადამიანი ქალაქგარეთაც გადავიდა დროებით საცხოვრებლად და ამ დროებით პერიოდში ბევრმა მათგანმა გააანალიზა, რომ ქალაქგარეთ ბევრად ჯანსაღი პირობებია და თბილისის ქაოსის მიღმა სხვა ცხოვრებაც არსებობს. მათ, ვისაც აგარაკი თბილისთან ახლოს აქვთ, გაუმართლათ და პანდემიის დასრულებისა და სამსახურებში დაბრუნების შემდეგაც აგარაკებიდან განაგრძეს სამსახურში სიარული, არასამუშაო დროს კი ბევრად ჯანსაღ გარემოში ატარებენ.

აღნიშნული ტენდენცია, რა თქმა უნდა, არ გამოეპარებოდათ დეველოპერულ კომპანიებსაც და ვინაიდან ნათელია, რომ ეკოლოგია ერთერთ პრიორიტეტად იქცა ბინის მაძიებლებისთვის, სამშენებლო კომპანიებიც აქცენტს სწორედ ამ საკითხზე აკეთებენ. ბევრი მათგანის რეკლამასა თუ საიმიჯო ტექსტებში შეხვდებით, თუ რამდენად მნიშვნელოვანია მათთვის გამწვანება და თუკი ზოგადად უბანი არ იძლევა ამის საშუალებას ფართო მასშტაბით, ყოველ კორპუსს პატარა, ინდივიდუალურ ეკოსისტემას უქმნიან და საკუთარ რეკრეაციულ ზონას ითვალისწინებენ. ასევე, ბაზარზე შემოვიდა ეკომეგობრული, ეკოლოგიურად სუფთა სამშენებლო მასალები, რომელიც ასევე სიჯანსაღის განწყობას ქმნიან.

რიგ სამშენებლო კომპანიებს ეკოლოგიურად მართლაც სუფთა ტერიტორიებზე აქვთ მოპოვებული მშენებლობის უფლება და დედაქალაქის ცენტრიდან არც ისე შორს, მსურველებს სთავაზობენ ბინებს როგორც დასრულებულ, ისე მშენებარე პროექტებში. მაგალითად, ეკოლოგიურად სუფთა უბნებად ითვლება ლისის ტბის დასახლება, მიმდებარე დაბები/სოფლები, ასევე ბაგები, დიღმის მასივის კვარტლები და ა.შ.

ბინის შერჩევისას, მიმდინარე მშენებლობების ტემპის გათვალისწინებით, ალბათ ყურადღება უნდა მიაქციოთ შერჩეული კორპუსის გარშემო ტერიტორიას, თუკი თქვენთვის ხედიც მნიშვნელოვანია, არის ალბათობა, რომ სამომავლოდ ხედზე კიდევ ახალი მშენებლობა დაიწყოს. ამიტომ დიდი საკუთარი ეზოს და რეკრეაციული სივრცის მქონე კორპუსში ბინის შერჩევა ალბათ უფრო რეკომენდირებული იქნებოდა თქვენთვის.

ეკოლოგიური მდგომარეობის გასაუმჯობესებლად ეტაპობრივად ეწყობა ინფრასტრუქტურა და შემოდის რეგულაციები ავტომობილების გამონაბოლქვის კონტროლზეც, მაგალითად ავტომობილების გამართული მდგომარეობა მოწმდება ტექდათვალიერების დახმარებით, ეწყობა ველობილიკები ველოსიპედითა თუ სქროლით გადაადგილების წასახალისებლად, შემოდის ელექტრო მანქანები და ეტაპობრივად მატულობს მათი დატენვის ლოკაციები, რათა შემცირდეს ბენზინის გამონაბოლქვი. თუმცა ასეა თუ ისე, თბილისის ცენტრალური უბნები მაინც შედარებით დატვირთული იქნება, რადგან არამარტო საცხოვრებელი, არამედ საოფისე ლოკაციებიც ძირითადად ცენტრშია განთავსებული და მეტი მოძრაობა და გადაადგილება სწორედ ამ წერტილებში ხდება. საცხოვრებლად კი მაინც უფრო გარეუბნები რჩება შედარებით სუფთა ტერიტორიებად და ახალი კორპუსების რეკრეაციული ზონების გარდა, კერძო დასახლებებში საკუთარი სახლების ეზოების გამწვანებით უზრუნველყოფაც ერთერთი ალტერნატივაა.