როგორ შევქმნათ ეფექტური სამუშაო გარემო — რჩევები ეიჩარებს

ყოველდღიური სამუშაო რუტინა პატარ-პატარა თუ კომპლექსური დავალებების შესრულებას მოიცავს. ყოველ საკითხზე მეილების სათითაოდ გზავნა კი დამღლელი პროცესიცაა და შესაძლოა, ყველაფერი დროულად ვერც მოესწროს. ორგანიზებული სამუშაო გარემოს შექმნაში თანამედროვე პლატფორმები დაგეხმარება, სადაც ერთ სივრცეში დავალებების გაწერა, დედლაინების მითითება და ამ პროცესში ჩართულ თანამშრომლებთან კომუნიკაცია საკმაოდ მარტივია. მაგალითად, Trello როგორც ინდივიდუალური, ისე ჯგუფური დავალებების შესასრულებლად შეგიძლია გამოიყენო, Slack-ის მეშვეობით კი, კომპანიის ყველა თანამშრომელს ერთ სივრცეში ეკონტაქტები. ასე რომ, თანამედროვე პლატფორმების გამოყენება საქმეს ამარტივებს და ეფექტურობასაც ზრდის.

2. დასაქმებულების აზრები ყურადღებით მოისმინე

სამუშაო გარემოს დადებით თუ უარყოფით მხარეებს ყველაზე კარგად ის ადამიანები აფასებენ, რომლებიც ამ პროცესში უშუალოდ არიან ჩართულები. ამიტომ, თუ პროცესების გაუმჯობესება გსურს, პირველ რიგში, აზრი სწორედ მათ უნდა ჰკითხო. ამისთვის კი დასაქმებულებთან როგორც პირდაპირი კომუნიკაცია, ისე გამოკითხვების ჩატარება დაგეხმარება. გულწრფელი პასუხების მისაღებად ანონიმური გამოკითხვებიც შეგიძლია დაგეგმო, რათა აზრის დაფიქსირება თუ შენიშვნების მოცემა ყველამ უფრო თავისუფლად შეძლოს. პრობლემების ადრეულ ეტაპზე იდენტიფიცირება კი მათ სწრაფ მოგვარებასა და უფრო ეფექტური სამუშაო სივრცის შექმნაში დაგეხმარება.

3. ხელი შეუწყვე დასაქმებულთა განვითარებას

ერთ პოზიციაზე ან ერთი მიმართულებით დიდხანს მუშაობა დასაქმებულთა მოტივაციაზე ხშირად უარყოფითად აისახება. ამიტომ, მნიშვნელოვანია ისეთი გარემოს შექმნა, რომელიც დასაქმებულის როგორც პროფესიულ, ისე პიროვნულ განვითარებას ხელს შეუწყობს. ახალი უნარების შეძენა და გამოწვევების გადალახვა კი როგორც დასაქმებულის, ისე მთელი გუნდისა თუ ორგანიზაციის პროდუქტიულობაზე დადებით გავლენას ახდენს. განვითარების ხელშესაწყობად ტრენინგები, კურსები თუ ვორქშოპები დასაქმებულებს თავად შეგიძლია ჩაუტარო ან პროფესიონალებთან გაგზავნო. საინტერესო კურსებსა და ტრენინგებს კი ამ ბმულზე მარტივად იპოვი.

4. წამახალისებელი სისტემები დანერგე

დროდადრო თანამშრომლების წახალისება და იმის ჩვენება, რომ მათი შრომა ფასდება, მოტივაციისა და პროდუქტიულობის გასაზრდელად მნიშვნელოვანი ფაქტორია. თუ დასაქმებული იმაზე უკეთეს შედეგებს აჩვენებს, ვიდრე მოეთხოვება, მისი წახალისების ერთ-ერთი გზა ფინანსური ბონუსია. თუმცა მოტივაციის ასამაღლებლად შეგიძლია უფრო კრეატიული სისტემაც დანერგო. შეგიძლია, ყველაზე წარმატებული თანამშრომლის საზაფხულო შვებულება მოგზაურობად აქციო და გაწეული შრომისთვის სწორედ ასე წაახალისო. გარდა ამისა, შეგიძლია საუკეთესო თანამშრომლების ჰობები და ინტერესები გაითვალისწინო და სხვადასხვა სახის წამახალისებელი საჩუქარი სწორედ ასე შეარჩიო.

5. კორპორატიული კულტურის გაძლიერებაზე იმუშავე

კორპორატიული კულტურა სწორედ ისაა, რაც ამა თუ იმ კომპანიას სხვებისგან გამოარჩევს. იმისთვის, რომ დასაქმებულებმა კომპანიის წევრებად იგრძნონ თავი, საჭიროა საერთო ღირებულებების, მიზნებისა და სტანდარტების განსაზღვრა. როცა ადამიანები საერთო იდეისა თუ ღირებულებების ირგვლივ ერთიანდებიან, ეს გუნდური მუშაობის ხარისხზეც დადებითად აისახება. ამასთანავე, როცა კომპანიას გამოკვეთილი კორპორატიული კულტურა აქვს, ეს ახალი კადრების შერჩევის პროცესშიც დაგეხმარება, რომლებიც არა მხოლოდ პროფესიონალები უნდა იყვნენ, არამედ კომპანიის ღირებულებებსაც უნდა იზიარებდნენ. კორპორატიული კულტურის გაძლიერებას კი კომუნიკაციით, წამახალისებელი ღონისძიებებითა და სხვა აქტივობების დაგეგმვით შეგიძლია ხელი შეუწყო.