პრაქტიკული რჩევები ონლაინ გასაუბრებისთვის
540
03.04.2020 13:55:58


ტექნოლოგიურ საუკუნეში ცხოვრება, გულისხმობს გლობალური ტექნოლოგიებისა და სერვისების იმდენად სწრაფ განვითარებას, რომ ჩვენთვის უჩვეულო და გასაკვირი, თითქმის, აღარაფერია. მათ შორის, არც ონლაინ გასაუბრება, რომელიც დამსაქმებელს საშუალებას აძლევს, მისთვის სასურველი კადრი, რაც შეიძლება ნაკლებ დროში და მარტივად შეარჩიოს.

ამ სტატიაში ვისაუბრებთ, როგორ უნდა მოვემზადოთ ონლაინ გასაუბრებისთვის, რომ პოტენციურ დამსაქმებელს ჩვენი, როგორც მომავალი თანამშრომლის მიმართ, დადებითი განწყობა შევუქმნათ. შეიძლება ითქვას, რომ ონლაინ გასაუბრება, ბევრად მეტი დეტალის გათვალისწინებასაც ითხოვს, ვიდრე ეს სტანდარტულ შემთხვევებში ხდება. წარმატების გასაღებიც სწორედ დეტალებზე ორიენტირებულობაა.

 ონლაინ გასაუბრების ყველაზე გავცელებული ფორმა ვიდეო ზარია. დამსაქმებელი გიკავშირდებათ ვიდეო ზარით და იწყებს სტანდარტულ კომუნიკაციას: გისვამთ შეკითხვებს, ისმენს თქვენს აზრს და ა.შ.

დისტანციური გასაუბრების დროს, პირველ რიგში, აუცილებლად შეამოწმეთ მოწყობილობა, რომლის საშუალებითაც ვიდეო ზარი უნდა განახორციელოთ. გაეცანით აღჭურვილობის პროგრამულ ნაწილს, შესამოწმებლად განახორციელეთ სატესტო ვიდეო ზარი მეგობართან ან ოჯახის წევრთან, რათა დაადგინოთ, რამდენად კარგია ინტერნეტ კავშირი, მაღალი ხარისხის ვიდეო ზარის განსახორციელებლად. დარწმუნდით, რომ სისტემას უკავშირდებით იმ ექაუნთით, რომელიც ვაკანსიაში გაქვთ მითითებული.

მაგალითისთვის, შეგიძლიათ დაურეკოთ თქვენს მეგობარს ვიდეო ზარით, რომელიც იმიტირებული ონლაინ გასაუბრების ჩატარებაში დაგეხმარებათ, დაგისვამთ გასაუბრებისთვის დამახასიათებელ კითხვებს- ამ კითხვებს ნელი და თავდაჯერებული პასუხები გაეცით.

შეარჩიეთ მოხერხებული კუთხე თქვენს საცხოვრებელ სახლში ან ადგილას, საიდანაც ვიდეო ზარით უნდა ჩაერთოთ. სასურველია, არ იყოს ხმაური, იყოს შესაბამისი განათება და მოწესრიგებული გარემო. ყველაფერი, რაც თქვენს ირგვლივ ხდება გასაუბრების დროს, დამსაქმებელს თქვენს სერიოზულ დამოკიდებულებასა და კომპეტენციზე მიანიშნებს.

მოამზადეთ საკუთარი კითხვები - არ არის აუცილებელი კითხვები მხოლოდ დამსაქმებელმა დაგისვათ. გასაუბრება უნდა წარიმართოს დიალოგის რეჟიმში, თქვენ კი უნდა დასვათ ყველა კორექტული კითხვა, რომელიც თქვენს მომავალ საქმიანობას უკავშირდება.

წარმატებული გასაუბრების ერთ-ერთი ნაწილი, ვიზუალური მზაობაა.  შესაძლოა, პოტენციურ დამსაქმებელ კომპანიას, გააჩნდეს კონკრეტული ჩაცმის სტილი. შეეცადეთ, მოერგოთ ამ სტილს.

აუცილებელია დაამყაროთ თვალებით კონტაქტი. თვალებით კონტაქტის დამყარება ვიდეო ზარის დროს ბევრად უფორ რთულია. ამ დროს თქვენ უნდა უყუროთ კამერას და არა თქვენს დამსაქმებელს. თვალებით კონტაქტი მიუთითებს თქვენს სიმტკიცესა და თავდაჯერებულობაზე.

იმუშავეთ სხეულის ენაზე, რომელიც გამსაუბრებელს მიახვედრებს, რომ საკუთარ თავში თავდაჯერებული ხართ.

განწყობა- უნდა იყოს მშვიდი. ნერვიულობამ, შესაძლოა,  ბევრი რამე გააფუჭოს. ყოველთვის გქონდეთ გეგმა „ბ“, რადგან ტექნოლოგიების გამართულობის წინასწარ სრულად განჭვრეტა შეუძლებელია.

ინტერვიუს დასრულების შემდეგ, დამსაქმებელს აუცილებლად გაუგზავნეთ მადლობის წერილი, სიტუაციის შესაბამისად, თქვენთვის დროის დათმობისთვის. თუ გასაუბრებიდან რამდენიმე დღის შემდეგ არ დაგიკავშირდებიან, შეგიძლიათ თავად დაუკავშირდეთ და ჰკითხოთ, დაიწყო თუ არა აპლიკანტების განხილვის პროცესი. კორექტულად დასმული კითხვა, უხერხულობას ნამდვილად არ წარმოქმნის.


სტატიის ავტორია SS.GE/JOBS