რას ნიშნავს "მწვანე კარკასი" და შენდება თუ არა ასეთი შენობები საქართველოში

ამას წინათ ნათესავმა მახარა, - ბინა მიშენდება, ზაფხულისთვის "მწვანე კარკასით" ჩამაბარებენო. მწვანე კარკასი რას ნიშნავს ნამდვილად არ ვიცი, მაგრამ ამის მიუხედავად, შენაძენი გულითადად მივულოცე, დავემშვიდობე და უცნობი სამშენებლო ტერმინის გასარკვევად სპეციალისტს დავუკავშირდი. 

ტექნიკურ მეცნიერებათა დოქტორი, ენერგოაუდიტორი ნანი მეფარიშვილი ამბობს, რომ საქართველოში არასწორად ხდება ზოგიერთი უცხოური ტემინების გადმოტანა და დამკვიდრება, რაც ცუდია, რადგან არაქართულ წრეებში მისი გაჟღერებისას, ძალიან არაკომპეტენტურის შთაბეჭდილებას ვტოვებთ. 

"მწვანე მშენებლობა 21-ე საუკუნის ერთ-ერთი ძალიან ძვირადღირებული მშენებლობაა, რომელიც ბუნებრივი მასალებით მიმდინარეობს, ანუ მშენებლობის პროცესში არ უნდა იყოს გამოყენებული ისეთი მასალა, რომელსაც შექმნისთვის გენერირებული ენერგიის მოხმარება დასჭირდება. მწვანე მშენებლობის პროდუქტი ექსპლუტაციაში გაშვების შემდეგ, უნდა ფუნქციონირებდეს ისე, რომ გარემოს ზიანი არ მიაყენოს, ანუ ნაკლებად უნდა გამოიყენოს გენერირებული ენერგია, როგორიცაა: გაზი, ელექტროენერგია ა.შ. უნდა იყოს 0, ან 0-თან მიახლოებული ენერგომოხმარების შენობა, რომელიც გამოიყენებს განახლებად ენერგიას - მზეს, ქარს და ა.შ. ასეთ შენობას ენიჭება მწვანე სერთიფიკატი. ასე რომ მწვანე მშენებლობა ძვირადღირებული სიამოვნებაა"

- თუმცა, ქართულ რეალობაშიც ხშირად გვსმენია, რომ შენობა ბარდება "მწვანე კარკასის" მდგომარეობით...
- როგორც კი რეკლამა გამოჩნდა და გაისმა - მწვანე კარკასით ჩაგაბარებთ ბინებსო, მაშინვე მივწერე მის მშენებლებს, რას გულისხმობდნენ მწვანე კარკასში. პასუხმა არ დააყოვნა და განმიმარტეს: მწვანე კარკასში ვგულისხმობთ, სუფთა გალესილ კედლებს, ელექტრო გაყვანილობას და გათბობის სისტემას (რომელიც მუშაობს ელექტრო ენერგიითა და ბუნებრივი აირით).

- ცენტრალური გათბობის სისტემას?
- ამ ტერმინთანაც პრობლემა გვაქვს, იმიტომ რომ ცენტრალური გათბობის სისტემა საბჭოთა წყობის შემდეგ აღარ გვქონია. გათბობის ინდივიდუალურ ქვაბებს აყენებენ, რომლის მაგვარიც დღეს ბევრს გვიყენია და რომლის გამონაბოლქვითაც ყოველი ქვედა მეზობელი ზედას ვწამლავთ.

მოკლედ, მწვანე კარკასის ქართულმა განმარტებამ აღმაშფოთა. ბედნიერებაა, რომ სტუდენტები, რომლებსაც დღეს ვზრდით სწორად არიან ინფორმირებულნი და იციან ამ და სხვა ტერმინების ზუსტი მნიშვნელობა. რეკლამები კი გათვლილია გაუთვითცნობიერებელ მომხმარებელზე. უცხოეთში თუ იტყვი: "ეს შენობა მწვანეა!" - ეს ნიშნავს, რომ ის ძალიან მაღალი კლასისაა. ბევრ განვითარებულ ქვეყანაში შექმნეს მწვანე დასახლებები, რომლებიც ეკოლოგიურად სუფთაა. ამ დასახლებებში არ უშვებენ ისეთ ავტომანქანას, რომლებიც საწვავს მოიხმარს, მხოლოდ ელექტრომობილებით გადაადგილდებიან და ჯანმრთელადაც გრძნობენ თავს. სტატისტიკაც არსებობს, რომელიც ასეთი უბნების მაცხოვრებელთა მაღალი სიცოცხლის უნარიანობას ადასტურებს. ასეთ საბავშვო ბაღებში ბავშვები ნაკლებად ავადდებიან ვირუსული დაავადებებით. ასეთ სკოლებში ბავშვების მოსწრების დონე გაცილებით მაღალია... მწვანე უბანში ცხოვრება ძალიან პრესტიჟულია.

- ევრორემონტის მნიშვნელობაც განგვიმარტეთ.

- არ ვიცით ამ სიტყვის ზუსტი მნიშვნელობა, მივედით იქამდე, რომ ესაა თეთრად შეღებილი კელდები, ხარვეზების გარეშე შესრულებული რემონტი. საქართველოს გარდა ტერმინი ევრორემონტი არსად არსებობს. ევროპაში სულ არ იციან რა არის ევრორემონტი. სამაგიეროდ იციან, რომ უნდა გაკეთდეს მაღალი ხარისხის რემონტი.

- თეთრი კარკასი რას გულისხმობს?
- თეთრი კარკასია, როდესაც ბინაში ტიხრები აშენებული, კელდები გალესილი გვხდება, იატაკი მოჭიმული და კარ-ფანჯარა ჩადგმული. შავ კარკასზე კი კედლები გვხდება გაულესავი, ტიხრები ასაშენებელი და იატაკის მოჭიმვაც არ არის შესრულებული. უცხოეთში ბინები არცერთი ფერის კარკასით არ ბარდება. იქ ყოველი ბინის რემონტი დასრულებული სახით გადაეცემა მფლობელს, მშენებლობა სულ სხვა კრიტერიუმების შესაბამისად ბარდებათ - პირველ რიგში ენერგო-პასპორტით.

- ენერგო პასპორტი რას ნიშნავს?

- კიდევ ერთი ჩვენებული სარეკლამო ხრიკია, როდესაც გაისმის: ჩვენი შენობა ენერგო-ეფექტურია. რას ნიშნავს?! რასთან შეადარეთ, იმის დასასკვნელად რომ ის უფრო ენერგოეფექტურია, ვიდრე - სხვა?! სინამდვილეში ენერგო-ეფექტურობას თავისი კლასიფიკაცია აქვს. მაცივარს რომ ვყიდულობთ, ხომ არსებობს A, B და C კლასის, თვითოეულზე მითითებულია დანახარჯის ოდენობა - A-ზე ამდენი და ა.შ. წესით, შენობებსაც ასეთივე კლასიფიკაცია აქვთ. როდესაც შენობის შეძენისას გეუბნებიან, რომ ის ენერგო-ეფექტურია, მაშინ უნდა გვამცნონ, დაახლოებით რამდენ ენერგიას დავხარჯავთ მასში ცხოვრებით - ვთქვათ, გათბობისათვის რამდენი ენერგია დაგვჭირდება, ეს მაჩვენებელი უნდა გვქონდეს, როგორც მაცივარს მოჰყვება პასპორტში დეტალურად გაწერილი. ეს მომცემს საშუალებას, რომ შენობის ენერგო-ეფექტურობის მაჩვენებელი შევადარო მეორე გასაყიდ შენობას და ისე გავაკეთო არჩევანი.

შეიძლება ჩვეულებრივ შენობაზე გვითხრან, რომ ენერგო-ეფექტურია და ვერაფრით მივხვდებით სინამდვილეში ასეა თუ არა. როგორ განვსაზღვრავთ ენერგო ეფექტურობას? - მშენებლებს რომ ვეკითხებით, გპასუხობენ - 20 კი არა, - 25 სანტიმეტრი სისქის ბლოკით მაქვს აგებულიო. ბლოკის სისქე არააა არგუმენტი. კედლის სისქით შენობის ენერგოეფექტურობა არ განისაზღრება. შეიძლება 10 სანტიმეტრი სისქის ბლოკი უფრო ენერგოეფექტური იყოს, ისეთი მასალისგან იყოს შექმნილი. ასე რომ, შენაძენის გაკეთებამდე, თუ რომელიმე სარეკლამო ფრაზის მნიშვნელობა გაუგებარი აღმოჩნდა თქვენთვის, გადაამოწმეთ სპეციალისტთან.