უძრავი ქონების ანალიზი კრიზისულ პერიოდში
2546
21.04.2020 18:21:04


თბილისში, ბოლო ერთი თვის განმავლობაში, უძრავი ქონების შეძენის მსურველთა რაოდენობა 33%-ით შემცირდა. მიზეზი, რა თქმა უნდა, კორონა ვირუსის ეპიდემიაა.


მიუხედავად იმისა, რომ უძრავი ქონების ფასები, ამ ეტაპისთვის სტაბილურია, ss.ge-ს ანალიტიკოსების აზრით, მაისში ფასი კლებას დაიწყებს და უძრავ ქონებაში ინვესტიციის კაპიტალი ყველაზე ხელსაყრელი და გამართლებული სწორედ ამ პერიოდში იქნება.


„დოლარის დანაზოგის დროზე ადრე დახარჯვა არ ღირს, რადგან ზაფხულისთვის მოსახლეობის გადახდისუნარიანობა საკმაოდ დაბალი იქნება. შესაბამისად, მოსალოდნელია ფასებმა დაიკლოს. სწორედ ამ დროს უძრავ ქონებაში ფულის ჩადება უფრო გამართლებული იქნება. თუმცა, ის ადამიანები, ვისაც ქონების შეძენა სურდათ კორონა ვირუსის ეპიდემიის კრიზისამდე, უძრავ ქონებას ss.ge-ზე ახლაც აქტიურად ეძებენ“, - ამბობენ ss.ge-ში.


მათივე პროგნოზით, ახლო მომავალში ასვევე მომგებიანი იქნება კომერციული ქონების შეძენაც: „კრიზისის გამო, მისი ფასი ეცემა, ხოლო ყოველი კრიზისისა და სტაგნაციის შემდეგ განვითარების პერიოდი იწყება. უძრავი ქონების შეძენისათვის, კრიზისის პერიოდი ყველაზე ხელსაყრელ დროდ ითვლება. უძრავი ქონების ბაზარი, დროდადრო, კარანტინის პირობებში ფუნქციონირებასაც მოერგება“, - აცხადებენ ss.ge-ში.


ცნობისათვის, SS.ge-ს კვლევის თანახმად, 23 თებერვლიდან 23 მარტის ჩათვლით, თბილისში უძრავი ქონების შეძენის მსურველთა რაოდენობა 33%-ით შემცირდა.


აღსანიშნავია, რომ მომხმარებელები აგრძელებენ უძრავი ქონების შესახებ ინფორმაციის მოძიებას და სიახლეების მიღებას ვებ-გვერდის დახმარებით. ss.ge-ს გუნდი კი აგრძელებს ჩვეულ რეჟიმში მუშაობას და უზრუნველყოფს როგორც უძრავი ქონების მაძიებლების, ასევე განმთავსებლებისათვის კომფორტული და ადაპტირებული გარემო შექმნას.


სტატიის ავტორია ss.ge