როგორ მოვითხოვოთ ხელფასის ზრდა თავაზიანად?

ხელფასის ზრდაზე მენეჯერთან საუბარი შესაძლოა ერთი შეხედვით საკმაოდ შფოთვის მომგვრელი იყოს, თუმცა სწორად არჩეული კომუნიკაციის ფორმა და დრო დაგეხმარებათ, რომ ადეკვატურად და თავაზიანად ისაუბროთ თქვენ მიერ გაწეული სამუშაოს შესაბამისი ანაზღაურების თაობაზე.

ხელფასის ზრდის თხოვნა შესაძლოა საუკეთესო გზა იყოს იმისთვის, რომ დამსახურებული კომპენსაცია მოითხოვოთ, თუკი თქვენი მოვალეობები და პასუხისმგბელობები მნიშვნელოვნად იზრდება. მთავარია კომუნიკაცია შედგეს შესაფერის დროს, მაგალითად არა მაშინ, როცა იცით, რომ კომპანია ფინანსურ კრიზისს განიცდის და ამის გამო თუნდაც ცოტა ხნის წინ თანამშრომლები შეამცირა. თუკი თქვენი კომპანია ყოველწლიურად ხელფასების პოლიტიკის გადახედვას არ ახდენს და თქვენი წახალისება მხოლოდ პოზიციური დაწინაურებით ვერ ხერხდება, ასეთ დროს შესაძლოა მოლაპარაკება ხელფასის ცვლილების თაობაზე, ერთადერთი გზა იყოს. მიუხედავად იმისა, რომ შესაძლოა თავდაპირველად საკმაოდ შემაშინებელი იყოს აღნიშნული საუბრის წამოწყება, თუკი თქვენს უფროსს კარგად იცნობთ და ამავდროულად, გაქვთ არგუმენტები და ფაქტები, რომელიც თქვენს კარგად მუშაობაზე მეტყველებს, უფრო თავდაჯერებულადაც კი იგრძნობთ თავს ამ დიალოგის წამოსაწყებად.

ხელფასის ზრდის მიზეზი

რატომ გსურთ ხელფასის ზრდა? ეს ის კრიტიკული შეკითხვაა, რომელზეც პასუხი აუცილებლად საჭიროა. გააკეთეთ იმ მიზეზების ჩამონათვალი, რის გამოც პირადად თქვენ იმსახურებთ ხელფასის ზრდას. არ მოითხოვოთ მაღალი ხელფასი იმის გამო, რომ ქირა გაგიძვირდათ; არ შეადაროთ საკუთარი თავი თქვენს რომელიმე კოლეგას, რომელიც თქვენზე ნაკლებს მუშაობს და თქვენზე მაღალი ხელფასი აქვს. არამედ, როდესაც აკეთებთ ანაზღაურების ცვლილების მოთხოვნას, თქვენი მიზეზები თქვენს პერფორმანსზე დაყრდნობით უნდა იყოს აქტუალური, კარგად უნდა ჩამოაყალიბოთ და აჩვენოთ რა ღირებულებები გაქვთ გუნდისთვის და ორგანიზაციისთვის.

ხელფასის ზრდის ოდენობა

საერთაშორისო კომპანიებში საშუალო ზრდა 3%-ია, ხელფასის ზრდის კარგ მაჩვენებლად ითვლება 5%, ხოლო მის ზემოთ ნებისმიერი ოდენობა უკვე არაჩვეულებრივია. თქვენი მოთხოვნის ოდენობა დამოკიდებულია იმაზე, თუ როდის გაგეზარდათ ბოლოს ხელფასი და რა ოდენობით. რაც უფრო მეტ ზრდას ითხოვთ, მით უფრო მყარი უნდა იყოს თქვენი არგუმენტები. მაგალითად, თუკი თავდაპირველი შეთანხმება განსხვავდება თქვენი აქტუალური სამუშაოსგან და დავუშვათ, მივლინებების ოდენობა შეთანხმებულ ოდენობას ბევრად აჭარბებს, შეგიძლიათ თამამად მოითხოვოთ ხელფასის მაღალი პროცენტით ზრდა, რადგან თქვენი მოვალეობები მკვეთრად შეიცვალა.

შესაფერისი დრო მოლაპარაკებისთვის

ზოგიერთი ადამიანი ფიქრობს, რომ ხელფასის ზრდაზე სალაპარაკოდ კარგი დრო არასდროსაა, თუმცა ჯობს გავყვეთ ჯანსაღ აზრს. არ მოითხოვოთ ხელფასის ზრდა ისეთ სენსიტიურ დროს, თუ კომპანიამ მკვეთრი ზარალი განიცადა ან ფინანსური კრიზისის გამო თანამშრომლების შემცირების გადაწყვეტილება მიიღო, ან უბრალოდ თუ თქვენი მენეჯერი ცუდ ხასიათზეა თუნდაც პირადული მიზეზების გამო.

ხელფასის საკითხზე  საუბრისთვის შეარჩიეთ ის დრო, სანამ დამტკიცდება წლიური ბიუჯეტი ორგანიზაციაში. მაგალითად, თუკი წლის დასაწყისში მტკიცდება ბიუჯეტი, დაელაპარაკეთ თქვენს უფროსს ნოემბერში ან დეკემბრის პირველ ნახევარში, რათა მასაც ჰქონდეს დრო საკითხი განსახილველად გაიტანოს ზემდგომ პირებთან. თუკი კომპანიაში არ არსებობს სტანდარტული ეტაპობრივი ზრდის პრაქტიკა, შეეცადეთ რომ ამ თემაზე საუბრისთვის კარგი დრო შეარჩიოთ და ასეთ დროდ გამოიყენეთ პერიოდი, როცა თქვენი მუშაობის შედეგებით კმაყოფილია თქვენი ხელმძღვანელი, წარმატებულად ჩაიარეთ კვარტალი ან ისეთი პერიოდი, როცა ირგვლივ ყველა სტრესისგან თავისუფალია.

მენეჯერთან კომუნიკაციის ფორმატი

მიეცით საკუთარ თავს დრო, რომ მოემზადოთ დიალოგისთვის, ასევე დიალოგის შემდეგ მიეცით დრო თქვენს მენეჯერსაც, რომ განიხილოს თქვენი ნათქვამი. პირველ რიგში, ჩანიშნეთ მასთან შეხვედრა მათი კალენდრის მიხედვით. ეს ხაზს უსვამს, რომ მათ დროს პატივს სცემთ. მას შემდეგ, რაც შეხვედრას დააორგანიზებთ, კომუნიკაციისთვის მოემზადეთ სერიოზულად და პასუხისმგებლიანად. მოიკვლიეთ სანდო ინფორმაცია და მნიშვნელოვანი ასპექტები ჩამოთვალეთ საუბრისას. სახელფასო ზრდის მოთხოვნისას უმნიშვნელოვანესია, რომ ჩაატაროთ თქვენი პოზიციის შესაბამისი ბაზრის კვლევა და იცოდეთ თქვენი პოზიციის ღირებულება, შემდეგ კი ეს დამუშავებული ინფორმაცია პროფესიონალურად მიაწოდოთ თქვენს უფროსს. მაგალითისთვის, რამდენიმე გზას შემოგთავაზებთ:

1.      ჩამოთვალეთ გასული 6 თვის, გასული წლის და თქვენი კომპანიაში გატარებული ჯამური პერიოდის მიღწევები ორგანიზაციაში. აღწერეთ, რა პოზიტიური გავლენა მოახდინა ორგანიზაციაზე თქვენმა იქ ყოფნამ და გაწეულმა სამუშაომ, შესაძლებლობის შემთხვევაში მოიშველიეთ ციფრები და სტატისტიკა. რაც უფრო მყარ მონაცემებს მოიყვანთ, მით უფრო მეტად დამსახურებულ სახელფასო ზრდას გამოიმუშავებთ. იმის ჩვენება, თუ რამხელა რესურსს დებთ კომპანიის განვითარებაში, მოახდენს თქვენი ლოიალურობის დემონსტრირებას.

2.      შეისწავლეთ რამდენია თქვენს პოზიციაზე ანაზღაურება კონკურენტულ ორგანიზაციებში. საერთაშორისო ბაზარზე თქვენი ანაზღაურების შესადარებლად შეგიძლიათ უფასო წყაროებში მოიძიოთ თქვენი პოზიციის საშუალო ანაზღაურება. ასევე, შეგიძლიათ ვაკანსიების განცხადებები გადაათვალიეროთ, სადაც ანაზღაურებაა მითითებული. მნიშვნელოვანია, რომ გაითვალისწინოთ თქვენი კომპანიის საქმიანობის სფერო და მასშტაბებიც, ასევე ხელფასის გარდა სხვა ბენეფიტების საკითხიც.

3.      იყავით თავდაჯერებული. მიუხედავად იმ შიშისა, რომელზეც დასაწყისში ვსაუბრობდით და ბუნებრივია, რომ ხელფასის ზრდაზე საუბრის წამოწყებამდე ყველა ადამიანი შფოთავს, ეცადეთ დარჩეთ თავდაჯერებულები. გაიხსენეთ, რომ ამ დიალოგის დაწყებამდე თქვენ გააანალიზეთ თქვენ მიერ გაწეული სამუშაოს ღირებულება და მოიკვლიეთ ფაქტები. ასევე, მზად იყავით იმისთვის, რომ პასუხი შეიძლება უარყოფითიც იყოს. დადებითი პასუხის შემთხვევაში კი კვლავ გააგრძელეთ მუშაობა პასუხისმგებლიანად, რათა დაანახოთ თქვენს მენეჯმენტს, რომ ამ ზრდას ნამდვილად იმსახურებდით.