როგორ უპასუხოს რეკრუტერმა კითხვას ხელფასის შესახებ?

ხელფასის შესახებ საუბარი ჯერ კიდევ დელიკატურ თემად ითვლება და კანდიდატებს უხერხულად მიაჩნიათ გასაუბრებაზე ანაზღაურების შესახებ კითხვის დასმა, არადა ხელფასი ერთერთი ყველაზე მნიშვნელოვანი და, რიგ შემთხვევებში, გადამწყვეტი ფაქტორია ხოლმე დასაქმების მომენტში. კანდიდატები ხშირად გამოთქვამენ უკმაყოფილებას, რომ ვაკანსიის ტექსტში ხელფასი არ არის დაკონკრეტებული და ზოგჯერ არ უღირთ რეზიუმეს გაგზავნა მსგავს განცხადებებზე, რათა ტყუილად არ დაკარგონ დრო.

სამსახურის მაძიებლებს თავისი არგუმენტები და მიზეზები აქვთ, ხოლო რეკრუტერებს - თავისი. ვაკანსიის ტექსტში ხელფასის არდაწერის მიზეზი რამდენიმე შეიძლება იყოს, მაგალითად კომპანია კონფიდენციალურად ტოვებდეს ინფორმაციას თავისი სახელფასო დიაპაზონისა და ბიუჯეტის შესახებ და არ ჰქონდეს მარტივად ხელმისაწვდომი ეს ინფორმაცია თუნდაც კონკურენტებისთვის, მეორე მიზეზი შესაძლოა ინდივიდუალური შეთანხმება იყოს კანდიდატთან მისი კვალიფიკაციისა და გამოცდილების მიხედვით. არის შემთხვევები, როცა ბაზარზე იცვლება კონკრეტული პოზიციის სახელფასო ანაზღაურება და ამ კუთხით, რეკრუტერებს უწევთ მუდმივად ბაზრის კვლევა.

აუცილებლად უნდა აღინიშნოს, რომ კონკრეტულ პოზიციაზე ხელფასის განსაზღვრა რეკრუტერის ძალებს აღემატება, რადგან კომპანიებს კონკრეტული ბიუჯეტი აქვთ და სწორედ ესაა გადამწყვეტი ფაქტორი. რეკრუტერის მოვალეობა ამ თვალსაზრისით ისაა, რომ მოიკვლიოს კონკრეტულ პოზიციაზე სად რა ხელფასებია და კონკურენტუნარიანობის გაზრდის მიზნით, ხელმძღვანელობასთან და გადაწყვეტილების მიმღებ პირთან ინფორმაცია და რეკომენდაცია მიიტანონს. არის შემთხვევები, როდესაც პირველადი გასაუბრება სატელეფონო კომუნიკაციით სრულდება, იმისთვის, რომ ადგილზე გასაუბრებისთვის ტყუილუბრალოდ არ დაიკარგოს არცერთი მხარის დროითი რესურსი, რეკრუტერი კანდიდატს სახელფასო მინიმუმის შესახებ კითხვას უსვამს. ეს ერთგვარი თავის დაზღვევაა, რომ მოლოდინები ერთმანეთს არ ასცდეს. ზოგიერთ კანდიდატს თავად აქვს განსაზღვრული ის თანხა, რომელიც სახელფასო მინიმუმს წარმოადგენს და საქმის კეთება არ უღირს ამაზე ნაკლები ანაზღაურების სანაცვლოდ. თუკი კანდიდატი გეკითხებათ ინფორმაციას ხელფასის შესახებ, თქვენ კი კონკრეტულ თანხას ვერ უსახელებთ, შეგიძლიათ დიაპაზონი დაუსახელოთ ან ანაზღაურების ფორმასა და ბენეფიტებზე გაუმახვილოთ ყურადღება. არსებობს სხვადასხვა ტიპის სახელფასო სქემაც, რისი ცოდნაც ასევე კანდიდატის სრული უფლებაა, რათა თავისი პასუხისმგებლობებისა და შესასრულებელი საქმიანობის მიხედვით, გათვალოს, რამდენად მისაღებია მისთვის ეს სქემა. მაგალითად, ფიქსირებულ თანხას პლუს ბონუსი. ბონუსიც შეიძლება იყოს ყოველთვიური, კვარტლური ან წლიური. რეკრუტერმა ნათლად უნდა აუხსნას კანდიდატს ბონუსის შემთხვევაში რაზეა დამოკიდებული მისი ოდენობა, თუ არსებობს ზედა ზღვარი, როგორია ზოგადი პრაქტიკა საშუალოდ გამომუშავებულ ბონუსის ოდენობასთან დაკავშირებით და ა.შ.

პირველ რიგში, კანდიდატებმა უნდა დაძლიონ ემოციური წინასწარი განწყობა ხელფასის თაობაზე კითხვის დასმის შესახებ, თამამად იკითხონ პირობები ანაზღაურების ჩათვლით, ხოლო რეკრუტერებმა მაქსიმალურად დეტალურად და სწორად მიაწოდონ ინფორმაცია სახელფასო სქემის შესახებ.