რა სტანდარტებს უნდა აკმაყოფილებდეს დასრულებული ბინა

მშენებარე კორპუსში ბინის შეძენისას წინასწარ უნდა ვიცოდეთ ინფორმაცია იმ სტანდარტების შესახებ, რომელსაც უნდა აკმაყოფილებდეს ბინა, რომ მშენებლობა დასრულებულად და ჩაბარებულად ჩაითვალოს. დასრულებული კორპუსის ბინების მდგომარეობა განსხვავებულია იმის მიხედვით, თუ როგორი კარკასის ჩაბარებას დაგვპირდა თავიდანვე დეველოპერული კომპანია - შავის, თეთრის თუ მწვანე კარკასის. თითოეული მათგანი განსხვავდება ერთმანეთისგან თავისი კონდიციის მიხედვით და მისი ჩაბარების შემდეგ მფლობელს შესაბამისი სამუშაოების დამოუკიდებლად ჩატარება უწევს.

შავი კარკასი

შავი კარკასი ის მდგომარეობაა, როდესაც ბინაში მეტი ლავირების საშუალება აქვს მფლობელს და დამოუკიდებლად შეუძლია შეარჩიოს და გადაწყვიტოს რემონტის დეტალები. შავი კარკასის უპირატესობა იმაში მდგომარეობს, რომ ჩაბარებისას ნაკლებ ფასს იხდი, თუმცა გასათვალისწინებელია, რომ პირველად გადასახადში დაზოგილი თანხა შესაძლოა სარემონტო მასალებმა და სამუშაოებმა გადაფაროს, რადგან შავი კარკასი გულისხმობს მხოლოდ კარამდე მიყვანილ კომუნიკაციებს, რკინის კარსა და მეტალო-პლასტმასის კარ-ფანჯრებს. სხვა დანარჩენი კი მეპატრონემ თავად უნდა უზრუნველყოს. აღსანიშნავია, რომ კლიენტთა კმაყოფილებისა და კომფორტის მიზნით, დეველოპერულ კომპანიათა უმრავლესობა თითქმის აღარ სთავაზობს მომხმარებელს შავ კარკასს და ძირითადად თეთრ, ან მწვანე კარკასებზეა ორიენტირებული.

თეთრი კარკასი

თეთრი კარკასი მოიცავს მეტ დასრულებულ პროცესს და ის შედარებით უფრო მოთხოვნადი ფორმაა ბინის მეპატრონეებისგან. თეთრი კარკასით ჩაბარებული ბინისთვის მხოლოდ კოსმეტიკური რემონტი და ხელის შევლებაა საჭირო, რაც ბინის მფლობელის გემოვნების საკითხია. ასეთ ბინები, შავი კარკასის მსგავსად, მზად არის მეტალო-პლასტმასის კარ-ფანჯრები და შესასვლელი რკინის კარი, თუმცა დამატებით ბინაში შეყვანილია კომუნიკაციები, გადატიხრულია ოთახები და კედლები შელესილია, იატაკი მოჭიმულია და ზოგ შემთხვევაში ცენტრალური გათბობის მილებიც გაყვანილია.

მწვანე კარკასი

მწვანე და თეთრ კარკასს შორის განსხვავება ასე თუ ისე რთულია, რადგან ერთმანეთს საკმაოდ ჰგავს ორივე მდგომარეობა. შესაძლოა მწვანე კარკასის უპირატესობად ნაკლები დანახარჯის ფონზე ეკოლოგიურად სუფთა და ენერგოეფექტური მასალები და გარემოზე მავნე ზეგავლენის შემცირება მივიჩნიოთ. მწვანე კარკასი გულისხმობს საბაზისო დანამატებს თეთრ კარკასზე, რომლის შემდეგაც ბინაში მხოლოდ კოსმეტიკური რემონტი რჩება გასაკეთებელი მის მფლობელს. მწვანე ფერი ასევე, ასოცირდება ეკოლოგიასთან, რაც მოიაზრებს სწორედ ეკოლოგიურად სუფთა მასალების და მწვანე ტექნოლოგიების გამოყენებას.

კორპუსის ექსპლუატაციაში მიღება

იმისთვის, რომ კორპუსი ექსპლუატაციაში იქნას მიღებული საჭიროა ფართების საკუთრებად რეგისტრაცია, რაც კომპანიისთვის გარკვეულ საგადასახადო ვალდებულებებს წარმოშობს. ამის გამო, ზოგჯერ დეველოპერული კომპანიები აჭიანურებენ ამ პროცესს და შესახლება იწყება ჩაუბარებელ ბინებში. თუკი ექსპლუატაციაში არ არის მიღებული ბინა, მისი სტატუსი ჯერ კიდევ მშენებარედ მოიაზრება, იმ შემთხვევაში, თუ მშენებლობის უსაფრთხოების ზომები დაცულია, მასში ცხოვრება საფრთხეს და დისკომფორტს არ წარმოადგენს, თუმცა თუკი მფლობელი მოისურვებს სარეკონსტრუქციო სამუშაოები დაიწყოს, ამაზე ნებართვის მიღებას მშენებარე სტატუსის მატარებელი ბინის მესაკუთრე დამოუკიდებლად ვერ შეძლებს.

სასურველია ბინა შეიძინოთ დასრულებულ და ჩაბარებულ კორპუსში, მისი მდგომარეობა კი გადაამოწმოთ მერიის შესაბამის სამსახურსა და მშენებლობის მაკონტროლებელ ორგანოებთან.