დასაქმება საქართველოს რეგიონებში: შესაძლებლობები და პრობლემები

საქართველოში სამუშაო ძალის დიდი ნაწილი დედაქალაქშია თავმოყრილი, რეალობას თუ თვალს გავუსწორებთ, ფაქტია, რომ თბილისში სამსახურების ბევრად მრავალფეროვანი არჩევანია. ძირეული პრობლემა, რაც არამხოლოდ დასაქმების საკითხზე მოქმედებს, არამედ უფრო გლობალური - რეგიონული განვითარების საკითხია.

ამ ეტაპისთვის რეგიონებში დასაქმების ორი ძირითადი ალტერნატივა ბანკები და მომსახურების სფეროა. მომსახურების სფეროც ყველა რეგიონზე არ ვრცელდება, სტუმარ-მასპინძლობის სფერო უფრო ტურისტულ ლოკაციებზეა აქტუალური და ისიც - სეზონურად. დანარჩენი კი ქსელური სუპერმარკეტების ან ადგილობრივი მაღაზიების კონსულტანტობის ალტერნატივაა. შესაბამისად, განათლების მისაღებად დედაქალაქში წამოსული ახალგაზრდები, უმაღლესი სასწავლებლების დასრულების შემდეგ უკან პერსპექტივის არარსებობის გამო აღარ ბრუნდებიან.

რეგიონებში დასაქმება პროფესიით საკმაოდ რთულია. ბევრ ორგანიზაციას, თუ ის გიგანტური კორპორაცია არ არის, ფილიალები არ აქვს საქართველოს მასშტაბით. განსაკუთრებით რთულია მაღალმთიან რაიონებში დასაქმება. მოთხოვნა-მიწოდებაზეც ბევრი რამ არის დამოკიდებული. არის ლოკაციები, სადაც შემოსავლის წყარო მხოლოდ სასოფლო სამეურნეო საქმიანობით მიღებული ანაზღაურებებია, შესაბამისად, მაგალითად საერთაშორისო ურთიერთობების დიპლომით გარკვეულ რეგიონებში საკუთარი პროფესიით ვერ დასაქმდებით.

რეგიონებში დასაქმების ხელშესაწყობად არსებობს მცირე სახელმწიფო პროგრამები, მაგალითად განათლების ხელშესაწყობად, განათლების სამინისტრომ დანერგა პროგრამა „ასწავლე საქართველოსთვის“, რომლის ფარგლებშიც მასწავლებელ-კონსულტანტები მიავლინა მაღალმთიან რეგიონებში. თუმცა აქ კიდევ ერთი პრობლემა დაცლილი სოფლები და სკოლებში ბავშვების მინიმალური რაოდენობაა.

გვერდს ვერ ავუვლით ეკონომიკის საკითხსაც, ხელფასების დონე რეგიონებში თბილისთან შედარებით საკმაოდ დაბალია. ახალი სამუშაო ადგილების გაჩენა, ახალი პროექტების წამოწყება და რეგიონის „გამოცოცხლება“ დიდწილად ენთუზიაზმის საკითხია. იმ ადამიანებს, რომლებიც არ დაიშურებენ ძალისხმევას რეგიონის განვითარებისთვის, შეუძლიათ თავად შექმნან ახალი სამუშაო ადგილები, დააარსონ ორგანიზაციები, თუნდაც არასამთავრობო სექტორში, იმუშაონ სოციალურ საკითხებზე და ა.შ. თუმცა საგულისხმოა, რომ თავდაპირველად დიდი ფინანსური თუ დროითი რესურსის ჩადება მოუწევთ.

გამოსავალი და არსებული პრობლემების გადაჭრის გზები დიდწილად ასევე სახელმწიფომაც უნდა შესთავაზოს დასაქმების მსურველებს. რაც უფრო მეტი არჩევანი და ალტერნატივა იქნება რეგიონებში დასაქმებისთვის, შესაბამისი ანაზღაურებით, მით მეტი მსურველი იქნება თავის რეგიონში დარჩენის, მუშაობის დაწყების და რეგიონის განვითარებაში წვლილის შეტანის. შესაძლებელია რეგიონებში გაიხსნას საწარმოები, მაგალითად ადგილობრივად მოხდეს ისეთი პროდუქტების წარმოება, რისი იმპორტიც ხდება ამჟამად, თუმცა ქვეყანაში წარმოების საშუალება არსებობს.

ss.ge-ს დასაქმების რუბრიკა მომხმარებელს სთავაზობს, რომ სასურველი სფეროს არჩევის შემდეგ საძიებო ველში აარჩიოს სასურველი ქალაქი, სადაც დასაქმებას გეგმავს და შესაბამისი ვაკანსიები მოიძიოს საცხოვრებელ არეალში.