ADHD და სამუშაო გარემოს მართვა — როგორ შევინარჩუნოთ პროდუქტიულობა

ყოველი სამუშაო დღე წინასწარ დაგეგმე

თუ დავალებებზე კონცენტრირება და მათი დროულად შესრულება შენთვის ერთ-ერთი მთავარი პრობლემაა, საქმეების ორგანიზება აუცილებლად გჭირდება. იმისათვის, რომ სამუშაო დღე დილიდანვე ქაოსით და სტრესით არ დაიწყო, წინა საღამოს შეგიძლია მთელი დღის გეგმა ჩამოწერო და თითოეულ დავალებას სავარაუდო შესრულების დროც მიუთითო. ამ მეთოდით შეძლებ, რომ პრიორიტეტები მარტივად განსაზღვრო და დროის მენეჯმენტი გააუმჯობესო, რაც სირთულეებს და სტრესს თავიდან აგაცილებს. თუ დიდ და რთულ დავალებებთან გამკლავება დაწყებამდეც კი დისკომფორტს გიქმნის, პატარ-პატარა ნაწილებად დაყავი და ისე შეეჭიდე. ამასთანავე, დღის გეგმაში არ მცირე შესვენებების ჩანიშვნა დაგავიწყდეს, რათა პერიოდულად გონების დასვენება შეძლო და მოტივაციაც შეინარჩუნო.

მინიმუმამდე დაიყვანე ყურადღების გაფანტვის ფაქტორები

ADHD-ს ერთ-ერთი გავრცელებული სიმპტომი ყურადღების მარტივად გაფანტვაა, ამიტომ სამუშაო გარემო თავიდანვე ისე უნდა მოაწყო, რომ კონცენტრაციის შენარჩუნება მაქსიმალურად შეძლო. თუ ხმაური და ადამიანებთან ინტერაქცია გონებას მარტივად გიფანტავს, სთხოვე თანამშრომლებს, რომ მობილიზაციაში ხელი შეგიწყონ. ასევე, შეგიძლია საქმის პარალელურად მუსიკას მოუსმინო, თუ ეს აზროვნებასა და კონცენტრაციაში გეხმარება. ხოლო ვინც სახლიდან მუშაობს, სამუშაო სივრცის გამოყოფა და მოწყობა შეუძლია, რაც ყურადღების გაფანტვის რისკებს ამცირებს. ამასთანავე, მუშაობის პროცესში ყველა იმ აპლიკაციის გამოყენება უნდა შეზღუდო ან შეტყობინების ხმა გაუთიშო, რომლებიც საქმისთვის არ გჭირდება, რაც დროსაც დაგაზოგვინებს და დაგეხმარება, რომ აუცილებელ დავალებებზე მაქსიმალურად ფოკუსირდე.

ესაუბრე თანამშრომლებს შენს საჭიროებებზე

თანამშრომლებთან კომუნიკაცია და ურთიერთობები დიდწილად განსაზღვრას იმას, თუ რამდენად კომფორტულია ჩვენი სამუშაო გარემო. ADHD-ის შემთხვევაში კი, თანამშრომლების როლი და შენს სამუშაო პროცესში მათი ჩართულობა კიდევ უფრო მნიშვნელოვანია. პირველ რიგში, თანამშრომლებთან არ უნდა მოგერიდოს იმ საჭიროებებსა და სირთულეებზე საუბარი, რომლებიც ADHD-ს უკავშირდება. მაგალითად, თანამშრომელს შეგიძლია სთხოვო, რომ მნიშვნელოვანი დედლაინები შეგახსენოს ხოლმე, რასაც საბოლო ჯამში, კომპანიის წარმატებაზეც სასიკეთო გავლენა ექნება. ასევე, შეგიძლია უკუკავშირი ხშირად მოითხოვო, რათა უფრო მარტივად განსაზღვრო, რა გიშლის ხელს პროდუქტიულობაში და როგორ გახდე უკეთესი თანამშრომელი. ჯგუფურ შეხვედრებში მონაწილეობა კი დაგეხმარება, რომ კონკრეტულ საკითხზე სხვებთან ერთად უკეთ ფოკუსირდე და შენი იდეებიც გააზიარო.

გამოიყენე მეგობრული აპლიკაციები

ზოგჯერ დავალებებთან შეჭიდება უფრო გვიმარტივდება, თუ პრიორიტეტები, მათ შესასრულებლად გამოყოფილი დრო და სხვა ფაქტორები ვიზუალურად თვალსაჩინოა. ამისთვის კი სხვადასხვა პლატფორმის გამოყენება შეგიძლია როგორებიცაა Trello, Asana, Monday, ClickUp და ასე შემდეგ, რომლებიც დავალებების ორგანიზებას ამარტივებს. აპლიკაციების გარდა ყველაზე მარტივი ხერხი წამმზომის ან ხმოვანი სიგნალის დაყენებაა, რათა განსაზღვრო, რაში რა დრო გეხარჯება და თავს მნიშვნელოვანი დავალებებიც შეახსენო. ჩამოთვლილ აპლიკაციებში კი დავალებების გაწერა, მათთვის დედლაინების მინიჭება, დარჩენილი დროის ნახვა, ფერების მიხედვით პრიორიტეტების გამოყოფა და ბევრი სხვა რამ შეგიძლია. ამასთანავე, აპლიკაციები შესაძლებლობას გაძლევს, რომ კონკრეტულ დავალებაზე შენთან ერთად მომუშავე თანამშრომელიც ჩართო პროცესებში და დროის მენეჯმენტში ისიც დაიხმარო.

ნუ იქნები თვითკრიტიკული

ყველა ადამიანი განსხვავებულია და შესაბამისად, მათი მუშაობის სტილი და მიდგომებიც უნიკალურია. მხოლოდ იმიტომ, რომ მობილიზაციისა და დავალებებზე ფოკუსირებისთვის სხვებთან შედარებით მეტი ენერგია გჭირდება, ეს თვითკრიტიკულობის მიზეზი არ უნდა გახდეს. პირველ რიგში, უნდა გააცნობიერო, რომ ADHD არ არის სისუსტე, არამედ განსხვავებული მახასიათებელია, რაც იმასაც გულისხმობს, რომ სამყაროს განსხვავებულად აღიქვამ, ეს კი კრეატიულობის ერთ-ერთი მნიშვნელოვანი წყაროა. ამასთანავე, გახსოვდეს, რომ შენი უნარები და უნიკალურობა სამუშაოსთვის ღირებულია და სწორედ ამიტომ ხარ კონკრეტულ პოზიციაზე, გუნდსა თუ კომპანიაში. სამუშაო გარემოში კი სხვადასხვა სტრატეგია, მიდგომები და რაც მთავარია, მოტივაცია დაგეხმარება, რომ შენი საქმის ნამდვილი პროფესიონალი იყო!