თორნიკე ცირამუა თავის პროფესიულ გამოცდილებაზე გვიყვება

არ ელოდოთ იდეალურ მომენტს, უბრალოდ დაიწყეთ - ურჩევს წარმატებული ქართული სტარტაპის Biliki.AI-ს დამფუძნებელი თორნიკე ცირამუა მათ, ვისაც თავიანთი ბიზნეს იდეებისთვის ხორცის შესხმა ან მკვეთრი კარიერული ნაბიჯების გადადგმა სურს.

ცვლილებები მხოლოდ მოძრაობით, უწყვეტი განვითარებითა და დაშვებულ შეცდომებზე სწავლით მოდის, შესაბამისად, დაბრკოლებების გამოწვევად მიღება და მათი გადალახვა გამოცდილ პროფესიონალებად გვაქცევს, გვიმაღლებს თავდაჯერებას და გვეხმარება, პიროვნულადაც უკეთესები გავხდეთ. თორნიკე ცირამუას პროფესიული განვითარების პროცესიც გამოწვევებითა და მკვეთრი ცვლილებებით არის აღსავსე. მისი განათლება და პირველი კარიერული გამოცდილება საერთაშორისო ურთიერთობებსა და დიპლომატიას უკავშირდება.  პროფესიული განვითარება სწორედ აღნიშნულ სფეროში დაიწყო, თუმცა როგორც თავად აღნიშნავს, „ცხოვრება ხშირად გვთავაზობს ახალ გზებს“. მისთვის კი  ეს გზა ბიზნესისა და ტექნოლოგიების სამყაროსკენ მიმავალი აღმოჩნდა.

რა რჩევებს მისცემდა მათ, ვინც ახლა დგამს თავის პროფესიაში პირველ ნაბიჯებს, ვისაც ცვლილებებისთვის მოტივაცია სჭირდება ან სტარტაპს იწყებს და რა ასწავლა დაშვებულმა შეცდომებმა, ამის შესახებ თორნიკე ცირამუა SS.ge/jobs-თან ინტერვიუში საუბრობს:

• როგორ ფიქრობთ, რა ფაქტორები განაპირობებს პროფესიულ წარმატებას და რამდენად მნიშვნელოვანია ამ პროცესში უწყვეტი განვითარება?

წარმატება უწყვეტი პროცესია, რომელიც მუდმივად საჭიროებს სწავლას. რამდენად ძლიერიც არ უნდა იყო დღეს, ხვალ ახალი ცოდნა და უნარები დაგჭირდება, რათა განვითარება არ შეწყვიტო. ცნობისმოყვარეობა ამ გზაზე უმნიშვნელოვანეს როლს თამაშობს - ის ადამიანები, რომლებიც მუდმივად კითხულობენ, იკვლევენ და ახალ შესაძლებლობებს ეძებენ, უკეთესად ართმევენ თავს ცვლილებებს და წარმატებასაც აღწევენ. თუმცა, იდეები მხოლოდ მაშინ ფასობს, როცა მათ მოქმედება მოჰყვება. მიზნების რეალობად ქცევისთვის აუცილებელია კონკრეტული ნაბიჯების გადადგმა. ამ ყველაფერთან ერთად, უდიდესი მნიშვნელობა აქვს ადამიანებთან კავშირებს - ხშირად, სწორედ სწორ გარემოცვას შეუძლია კარიერისა და პიროვნული ზრდის დაჩქარება, ახალი შესაძლებლობების აღმოჩენა და გამოწვევების გადალახვაში მხარდაჭერა. მივხვდი, რომ ყველაზე ძვირფასს რასაც შევიძენ ადამიანია. 

• თუ გქონიათ არამენეჯერულ პოზიციაზე მუშაობის გამოცდილება და რა გასწავლათ ამ პერიოდმა? რას ურჩევთ მათ, ვინც ახლა გეგმავს პროფესიისა და სამსახურის შეცვლას? 

სტარტაპის დაწყებამდე ორი წელი საჯარო სამსახურში ვიმუშავე, სადაც საერთაშორისო პროექტებს ვმართავდი და დონორ ორგანიზაციებთან ვთანამშრომლობდი. ამ გამოცდილებამ მასწავლა, როგორ დავამყარო კონტაქტები, ვაწარმოო მოლაპარაკებები და გავუმკლავდე ბიუროკრატიულ პროცესებს.

არამენეჯერულ პოზიციაზე მუშაობა განსაკუთრებით ღირებული იყო – პირველ რიგში, ის მასწავლა, როგორ მოვაგვარო პრობლემები ორგანიზაციულ დონეზე, როგორ ვიმუშაო გუნდთან და როგორ დავინახო ფართო სურათი. საჯარო სექტორში მუშაობა გამოწვევებით სავსე იყო, თუმცა მან შემძინა უნარები, რომლებიც შემდეგ სტარტაპის მართვაში გამომადგა.

მათ, ვინც ახალ პროფესიას ეუფლება ან ახალ სამსახურში გადადის, ვურჩევ, მოთმინება იქონიონ და ღია იყვნენ სწავლისთვის. ბევრი რამ, რაც თავიდან გაუგებარი ჩანს, დროთა განმავლობაში ბუნებრივად ჩამოყალიბდება. ასევე, მნიშვნელოვანია ახალი კავშირების შექმნა – ხშირად საუკეთესო შესაძლებლობები ნაცნობების რეკომენდაციით ჩნდება. რაც არ უნდა იყოს თქვენი ამჟამინდელი პოზიცია, ის შეიძლება თქვენი კარიერული წინსვლის მნიშვნელოვანი ნაწილი გახდეს, თუ მას სწორი დამოკიდებულებით შეხედავთ.

• ასევე, რა რჩევებს მისცემდით მათ, ვინც ახლა იწყებს კარიერულ განვითარებას ან თუნდაც სტარტაპს? შეიძლება თუ არა შეცდომები იყოს ერთგვარი მასწავლებელი როგორც პროფესიული, ისე ბიზნესის კუთხით?

ყველაზე მნიშვნელოვანი რჩევაა – არასდროს შეგეშინდეთ შეცდომების დაშვების.

ახლის შექმნის პროცესში ყოველთვის იქნება გამოწვევები და შეცდომები. მთავარია, ისინი განვიხილოთ როგორც გაკვეთილები და გამოვიყენოთ განვითარებისთვის.

• დაიწყეთ სწრაფად – არ ელოდოთ იდეალურ მომენტს, უბრალოდ დაიწყეთ.

• ფოკუსირდით მომხმარებელზე – რაც შეიძლება მეტი კომუნიკაცია გქონდეთ მათთან.

• იყავით მოქნილი – თუ საჭიროა პივოტი (მიმართულების შეცვლა), გააკეთეთ დროულად.

• გააზიარეთ თქვენი გამოცდილება – რაც უფრო მეტს აზიარებთ, მით უფრო მეტს სწავლობთ.

სწორი მიდგომა არის პრობლემაზე ფოკუსირება, სწრაფი ტესტირება და ბაზრის საჭიროებებთან ადაპტაცია. ჩემი მრწამსი ასეთია: 

ვსწავლობთ, ან ვიმარჯვებთ. სტარტაპების შექმნამ ეს მენტალიტეტი ჩამომიყალიბა და დღეს ნებისმიერ გამოწვევას სწორედ ამ პერსპექტივით ვუყურებ.

• თქვენ უკვე მრავალფეროვანი გამოცდილება გაქვთ მიღებული ბიზნესისა და ტექნოლოგიების სფეროში. საინტერესოა, როგორ რა პროცესებმა მოახდინა ზეგავლენა თქვენს განვითარებაზე აღნიშნული მიმართულებით?