როგორ გავექცეთ ყოველდღიურ გადაღლას — ტექნიკები

პარკინსონის წესი

ერთ-ერთი საინტერესო და ეფექტური ტექნიკა პარკინსონის წესის სახელითაა ცნობილი. წესის თანახმად, ნებისმიერ დავალებას იმდენი დრო სჭირდება შესასრულებლად, რამდენსაც მას მივანიჭებთ. ამ წესის ავტორი ბრიტანელი ისტორიკოსი და მწერალი ნორთკოტ პარკინსონია, რომელმაც ეს დაკვირვება თავდაპირველად 1955 წელს The Economist-ში გამოქვეყნებულ ესეში აღწერა.  პარკინსონის პრინციპი პრაქტიკაში შემდეგნაირად მუშაობს: თუ კონკრეტული დავალების შესრულებას 2 საათს მივანიჭებთ, ჩვენი გონება ისე გადაეწყობა, რომ 2 საათი დახარჯოს, როცა შესაძლებელია, რომ რეალურად მხოლოდ ნახევარი საათი იყოს საჭირო. ასევე, თუ ერთ დავალებას 2 საათი მივანიჭეთ და რეალურად მეტი დროა საჭირო, ამ 2 საათის განმავლობაში გარკვეულ პროგრესს მაინც მივაღწევთ და იმასაც შევძლებთ, რომ მეორე დავალებაზე გადავიდეთ, პირველს კი საჭიროებისამებრ დავუბრუნდეთ. უფრო ზოგადად, თითოეული დავალება უნდა დააპრიორიტეტო და მათ შესრულებას გარკვეული დრო მიანიჭო. დროდადრო გონება ეჩვევა, რომ კონკრეტულ საქმეს კონკრეტულ დროს ანიჭებ, რომლის განმავლობაშიც მობილიზებული, ეფექტური და შედეგზე ორიენტირებული გახდები.

სასარგებლო ლიტერატურა

წარმატებული კარიერის საიდუმლო მუდმივი პროფესიული და პიროვნული განვითარებაა. მართალია, საქმიანობაში ბევრი რამ გამოცდილებაზეა დამოკიდებული, თუმცა მეტი პროგრესისთვის ყოველთვის შეგიძლია შენთვის სასარგებლო ლიტერატურა იპოვო, სადაც თეორიულთან ერთად ბევრ პრაქტიკულ რჩევასაც ამოიკითხავ. იმისთვის, რომ დრო მართო და არა პირიქით — დრომ თავად გმართოს, შემდეგ ლიტერატურას შეგიძლია გაეცნო: "ცხოვრების 12 წესი: ქაოსის ანტიდოტი" (ავტორი: ჯორდან პიტერსონი) იმ ტექნიკებს გვასწავლის, რომლებიც ქაოსსა და წესრიგს შორის ბალანსს გვაპოვნინებს როგორც საქმეში, ისე საკუთარ თავში. დროის მენეჯმენტისა და ეფექტურობის თემაზე კიდევ ერთი ცნობილი წიგნია "შეჭამე ბაყაყი" (ავტორი: ბრაიან თრეისი), რომელიც რთულ დავალებებთან გამკლავებას გვასწავლის და გვაძლევს რჩევებს, თუ როგორ ვიყოთ უფრო პროდუქტიულები. ასე რომ, საჭირო რჩევებს შესაბამის ლიტერატურაში ყოველთვის იპოვი. თუ კითხვას ვერ ახერხებ, არ დაგავიწყდეს, რომ ტრანსპორტში, ძილის წინ თუ სხვა ნებისმიერ დროს აუდიოწიგნებს შეგიძლია მოუსმინო.

სასარგებლო აპლიკაციები

სოციალური ქსელები და გასართობი აპლიკაციები ხშირად ყურადღებას კიდევ უფრო გვიფანტავს, თუმცა თუ ტექნოლოგიებს მიზანმიმართულად გამოვიყენებთ, დავალებების უკეთ ორგანიზებასაც შევძლებთ. სწორი აპლიკაციის გამოყენება ყოველდღიურ საქმიანობას მნიშვნელოვნად ამარტივებს — იქნება ეს სამუშაო გეგმის ჩამოწერა, დავალებებისთვის თვალყურის დევნება, დროის განაწილება და ა.შ. მცირე თუ დიდ გამოწვევებთან გასამკლავებლად შემდეგი აპლიკაციები დაგეხმარება: Todolist საშუალებას გაძლევს, შექმნა დავალებების სიები, მიანიჭო კატეგორიები, მიუთითო საჭირო თარიღები და ასევე, გუნდთანაც ითანამშრომლო. Google Calendar დიდი ხანია, რაც მხოლოდ საქმიანი შეხვედრების განრიგის ჩამონათვალი აღარ არის. პლატფორმა გეხმარება დაგეგმო პირადი დღე და განმეორებადი აქტივობები, არ გამოგრჩეს მნიშვნელოვანი დავალებები და გეგმებს ვიზუალური სახე მისცე. ამ და მსგავს პლატფორმებს მარტივად იპოვი, თუმცა უმჯობესია აირჩიო ის, რომელიც შენს რუტინას ყველაზე კარგად ერგება. რამდენიმე პლატფორმის ერთდროულად გამოყენებისას არსებობს შანსი, რომ მნიშვნელოვანი საქმეები გამორჩეს ან გონება კიდევ უფრო გადაღალო. 

ჟურნალინგი

თუ ბავშვობაში დღიური გიწარმოებია, გემახსოვრება ის შეგრძნება, რომელიც აზრების ფურცელზე გადმოტანას თან ახლავს. 21-ე საუკუნეში ჟურნალინგი ერთ-ერთი წარმატებული პრაქტიკაა, რომელიც შეგიძლია პროფესიული და პიროვნული განვითარებისთვის გამოიყენო. ექსპერტების აზრით, როდესაც ფიქრებს, იდეებსა თუ გეგმებს ქაღალდზე ან თუნდაც ციფრულ ფორმატში გადმოვცემთ, ისინი უფრო ხელშესახები და მარტივად გასაანალიზებელი ხდება. ეს კი მნიშვნელოვანი ნაბიჯია, რათა ჩვენი იდეები ქმედებებად მალევე იქცეს. ჟურნალინგი საშუალებას გაძლევს, როგორც აუცილებელი დავალებების თუ სასურველი აქტივობების სია ჩამოწერო, ასევე მათი შეფასება და თვითრეფლექსია შეძლო. პროფესიულ საქმიანობაში წარმატების მისაღწევად კრეატიულობა ყოველთვის საჭიროა. ხშირად ასეთი კრეატიული იდეები უცბად გაგვიელვებს ხოლმე თავში, ხოლო თუ მათ ჩვენს წიგნაკში დროულად გადავიტანთ, კარგად დაგვამახსოვრდება და განხორციელების შესაძლებლობასაც უფრო მარტივად დავინახავთ. ასე რომ, ჟურნალინგი მხოლოდ ემოციური განტვირთვის ინსტრუმენტი აღარ არის, არამედ ის ხდება პრაქტიკული ხიდი იდეასა და მოქმედებას შორის. 

სტრატეგიული დასვენება

ხშირად დასვენება იმაზე უფრო მეტად ზრდის პროდუქტიულობას, ვიდრე ერთი შეხედვით ჩანს. გქონია შემთხვევა, როცა მარტივ დავალებას თავს ვერ ართმევ, დიდ დროს უთმობ და შედეგს ვერ იღებ? ასეთ დროს გონება უკვე გადაღლილია, საკუთარ თავზე ზეწოლით კი მხოლოდ სტრესი იზრდება. ნაცვლად იმისა, რომ კიდევ უფრო დაიტვირთო, ბევრად ეფექტურია თუნდაც 10-15 წუთით შეისვენო. სტრატეგიული დასვენება უბრალოდ დროის გაყვანას არ გულისხმობს.  ეს არის გააზრებული შესვენება, რომელიც გონების გადატვირთვასა და ენერგიის აღდგენაში გეხმარება. შესაფერისი სტრატეგიის არჩევა კი ინდივიდუალურია: შეგიძლია გაისეირნო, მუსიკას მოუსმინო, რამდენიმე წუთით თვალები დაასვენო ან უბრალოდ ხმაურისგან მოშორებული სივრცე იპოვო.  რაც მთავარია, არ უნდა იფიქრო, რომ დასვენება საქმის დასრულებას აჭიანურებს, პირიქით, ეს დრო გაძლევს რესურსს, რომ უფრო ფოკუსირებული და ენერგიული დაუბრუნდე.