კარიერა დეკრეტული შვებულების შემდეგ: რჩევები დედებისთვის

დეკრეტული შვებულების შემდეგ სამსახურში დაბრუნება საკმაოდ რთული ამოცანაა, რადგან დეკრეტში ყოფნა არის ისეთი შვებულება, რომელშიც დასვენებას ვერ ახერხებ, ყოველი დღე სიახლეებით სავსეა და უძილო ღამეების ფონზე თენდება. დაბრუნების შემდეგ კი ფაქტობრივად ახალი ადამიანი ხარ სამუშაო ადგილზე, მშობლის სტატუსით და განსხვავებული პრიორიტეტებით. ბოლო რამდენიმე წელია საქართველოში დეკრეტული შვებულებით სარგებლობის საშუალება მამაკაცებსაც აქვთ, თუმცა სულ რამდენიმე პრეცედენტი დაფიქსირდა მისით სარგებლობის და ძირითადად, დეკრეტულ შვებულებაში გამსვლელი მშობლების უმრავლესობას ისევ დედები შეადგენენ. განსაკუთრებით რთულია სამსახურში დაბრუნების პირველი რამდენიმე კვირა. ამას რამდენიმე მიზეზი აქვს, მაგალითად ფიქრებით ისევ თქვენს პატარასთან ხართ, მიჩვეული ხართ თქვენს დღიურ რუტინას მასთან ერთად და გადაჩვეული ხართ ოფისს.

გაგიზიარებთ რჩევებს და პრაქტიკებს, როგორ დაბრუნდეთ ოფისში და გააგრძელოთ თქვენი კარიერა დეკრეტული შვებულების შემდეგ.

არ გადაიტვირთოთ თავი

დეკრეტული შვებულების შემდეგ სამუშაო ადგილზე ფაქტობრივად დაღლილი ბრუნდებით, ეს პერიოდი არ ჰგავს ზაფხულის შვებულებას, რომელსაც ზღვის პირა ან მთის კურორტებზე ატარებდით და ახალი ძალებით უბრუნდებოდით ხოლმე სამსახურს. თუმცა ამის მიუხედავად, თქვენი რუტინა სრულიად შეცვლილია და სამსახურეობრივი ამოცანებიდან და დედლაინებიდან ამოვარდნილი ხართ. ამიტომ, ერთიანად რომ გადაეშვათ საქმიანობაში, აუცილებლად საბოლოო შედეგად გადაწვამდე მიხვალთ. სასურველია, ნელ-ნელა მიაჩვიოთ საკუთარი გონება და ორგანიზმი, რომ გადაეწყოთ სხვა გრაფიკზე და ნაკლები სტრესი შეიხვედროთ. ბევრი ადამიანი ნებდება და დეკრეტული შვებულების შემდეგ სამსახურს ტოვებს ან უიმედობაში ეშვება, რომ ვეღარ დაეწევა სიახლეებს და მანამდე დაგროვილი სამუშაო გამოცდილება წყალში ეყრება. ეს ასე არაა, ცოტაოდენი ძალისხმევა, რა თქმა უნდა, საჭიროა, რომ რეჟიმს დაუბრუნდეთ და გამოტოვებული დროც დააკომპენსიროთ, თუმცა საკუთარ თავს ნუ განსჯით იმის გამო, რომ რამეს „ჩამორჩით“. ყველა პროცესის დაწევა და ახალ პროცედურებში გარკვევა სრულიად შესაძლებელია, ყველაფერს თავისი დრო სჭირდება.

ისწავლეთ ყოველდღე რაღაც ახალი

იმისთვის, რომ თქვენი თვითშეფასება მყარად შენარჩუნდეს და არ გაგიჩნდეთ განცდა, რომ თქვენი არყოფნის პერიოდში თქვენმა კოლეგებმა კარიერულ კიბეზე რამდენიმე საფეხურით აგასწრეს, ეცადეთ მუდმივად იზრუნოთ თვითგანვითარებაზე. ახლავე გეტყვით, რომ ნაკლებსავარაუდოა, ეს მოახერხოთ სახლის პირობებში, რადგან ბავშვს ძალიან ბევრი დრო სჭირდება და პატარების მშობლებს ძალიან ცოტა დრო რჩებათ ხოლმე საკუთარი თავისთვის. ამიტომ სამსახურში ყოფნისას ჰკითხეთ კოლეგებს რჩევები, სთხოვეთ გამოცდილების გაზიარება სიახლეებზე, დააკვირდით პრაქტიკაში მათ მუშაობას და არ მოგერიდოთ დახმარების თხოვნა საჭიროების შემთხვევაში. სწავლა კეთებით (learning by doing) არის საკმაოდ მყარი საფუძველი იმისა, რომ შეძლოთ პრაქტიკის დახმარებით შეისწავლოთ ყველაფერი ხარისხიანად. გარდა ამისა, სთხოვეთ თქვენს ხელმძღვანელს, რომ ხელი შეგიწყოთ განვითარებაში ტრენინგების დახმარებით. შესაძლოა თქვენს ორგანიზაციას ჰქონდეს საკუთარი ტრენინგცენტრი, ან თქვენით შეარჩიოთ შესაბამისი ტრენინგი და შესთავაზოთ მენეჯერს, დაფინანსებით ან თანადაფინანსებით მოგცეთ საშუალება, რომ პროცესებში უკეთ გაერკვეთ. ეს გარდა იმისა, რომ თქვენ დაგეხმარებათ, თქვენს დამსაქმებელსაც დაანახებს, რომ მოტივირებული და განვითარებაზე ორიენტირებული ხართ. თქვენი სფეროდან გამომდინარე თუ ტრენინგების საჭიროება გაქვთ, მისი არჩევა ss.ge-ს ტრენინგების განყოფილებიდანაც შეგიძლიათ.

მიეცით სხვებს მაგალითი

ეცადეთ მონაწილეობა მიიღოთ იმ სტერეოტიპის დამსხვრევაში, რომელიც დედებს ეუბნება, რომ დეკრეტული შვებულების შემდეგ შეუძლებელია ძველებურად სასურველი კანდიდატი იყოთ სამსახურისთვის ან აუცილებლად არჩევანის გაკეთება მოგიწევთ სამსახურსა და ოჯახს შორის. სწორად დაგეგმილი და გადანაწილებული საქმის საფუძველზე, როცა ბავშვის აღზრდაში და საჭიროებების სისრულეში მოყვანაში ორივე მშობელი თანაბრად ჩართულია, ან დამხმარე გყავთ, რომლის ხელშიც ბავშვი სანდოდ არის დატოვებული, აბსოლუტურად შესაძლებელია, რომ კარიერაზე კონცენტრირდეთ და სამაგალითო „დასაქმებული დედა“ იყოთ. თქვენი კარიერული წინსვლა დეკრეტული შვებულების დასრულების შემდეგ, მაგალითის მიმცემი იქნება როგორც თქვენი კოლეგებისთვის, ვინც შესაძლოა ზემოთხსენებული სტერეოტიპის მსხვერპლი იყოს, ასევე თქვენი შვილისთვის, რომლისთვისაც საამაყო მშობელი იქნებით, ვინც იზრუნა მის მომავალზე და პასუხისმგებლობით მოეკიდა საკუთარ საქმიანობას.