რა უნარები სჭირდება საუკეთესო ძიძას?

ძიძა ის ნდობით აღჭურვილი პირია, რომელსაც მშობლები თავიანთ ყველაზე ძვირფას განძს- შვილს უტოვებენ მაშინ, როცა ისინი სამსახურში იმყოფებიან. ძიძა მშობლის შემდეგ ყველაზე ახლობელი ადამიანი ხდება ბავშვისთვის, რადგან ყველაზე ხშირად ბავშვის პირველი გამოცდილებების მოწმე, სწორედ ის ხდება. მშობლის არყოფნის დროს, ძიძაა პასუხისმგებელი ბავშვის სწორად აღზრდაზე, მისი საბაზისო მოთხოვნილებების დაკმაყოფილების უზრუნველყოფაზე და რაც ყველაზე მთავარია, სწორედ ძიძა გარდაიქმნება მომვლელიდან ბავშვის პირველ უფროს მეგობრად. ძიძები ძირითად შემთხვევაში ის ადამიანები არიან, ვინც სისხლით ნათესავები არ არიან მათი აღსაზრდელებისთვის, თუმცა ვინაიდან წლების განმავლობაში, ფაქტობრივად, ოჯახის წევრად მოიაზრებიან, საკმაოდ მნიშვნელოვან ემოციურ ბმას გრძნობენ ბავშვების მიმართ. იქიდან გამომდინარე, რომ მშობლების სამსახურში ყოფნის დროს უმეტესად ბავშვი და ძიძა ატარებენ დროს ერთმანეთთან, აუცილებელია, რომ სწორად იქნას შერჩეული ის ადამიანი, რომელიც ჩვენს შვილებს მეურვეობას გაუწევს.

ძიძის შერჩევისას ოჯახები ძირითად შემთხვევაში, რეკომენდაციებს მიმართავენ. სვამენ კითხვებს ახლობელ ოჯახებთან, რომელთა შვილებიც უკვე დიდები არიან და სთხოვენ რჩევებს თავიანთი ძიძების თაობაზე. ასევე, მიმართავენ განცხადებების ვებგვერდს, სადაც თავიანთ პირობებს აქვეყნებენ და ეძებენ ძიძას. ასევე, შესაძლებელია აღმზრდელებმა თავად განათავსონ განცხადება იმის თაობაზე, რომ სამსახურს ეძებენ და მოკლედ მიუთითონ თავიანთი გამოცდილებებისა და პირობების შესახებ.

განცხადებების ნახვა შესაძლებელია ss.ge-ს შესაბამის კატეგორიაში.

 ბავშვის აღმზრდელად მუშაობა ძალიან საპასუხისმგებლო საქმეა, რადგან როგორც ზემოთ აღვნიშნეთ, მშობლების ყველაზე ძვირფას განძზე და პატარა ადამიანზე პასუხისმგებლობის აღებას ნიშნავს და სწორედ ძიძას მიუძღვის მნიშვნელოვანი წვლილი იმაში, თუ როგორი ღირებულებების მქონე პიროვნებად ჩამოყალიბდება ზრდასრულობაში მისი აღსაზრდელი. მიუხედავად იმისა, რომ ბაღში და შემდეგ უკვე სკოლაში შესვლის ასაკიდან ბავშვის სოციუმი ფართოვდება და თანატოლებთან ურთიერთობას სწავლობს, პირველ ნაბიჯებს ურთიერთობებში და ემოციების გაზიარებაში სწორედ ძიძასთან დგამს. მშობლებისთვის საკმაოდ რთული გადასაწყვეტია ხოლმე, თუ ვის ანდობენ ამ დიდ პასუხისმგებლობას. შიში და მღელვარება სრულიად ბუნებრივია, მით უმეტეს, როდესაც ვხვდებით არაერთ ვიდეოს, რომელიც ინტერნეტში ვრცელდება და ძიძის მიერ ბავშის მიმართ სასტიკ მოპყრობას ასახავს. ბავშვის აღსაზრდელის შერჩევისას ყველა ოჯახს თავისი კრიტერიუმები და მოთხოვნები აქვს, რაც დაკავშირებულია როგორც ძიძის მოვალეობებთან, ასევე მოლოდინებთან მისი გამოცდილებისა და მიდგომების შესახებ. გარდა ინდივიდუალური კრიტერიუმებისა, არსებობს საბაზისო ასპექტები, რომელსაც ყველა ის ადამიანი აუცილებლად უნდა აკმაყოფილებდეს, ვინც გადაწყვეტს რომ ამ რთულ და საპასუხისმგებლო საქმეს მოჰკიდოს ხელი, რაც ამავდროულად ძალიან სასიამოვნო და საიტერესოცაა.

უპირველეს ყოვლისა, ძიძას უნდა ჰქონდეს შესაბამისი განათლება და თვისებები, რაც ბავშვთან ურთიერთობას საინტერესოს, მარტივს და ნაყოფიერს გახდის. პატარა ბავშვები, მას შემდეგ, რაც საუბარს იწყებენ, ძალიან ბევრ კითხვას სვამენ, აინტერესებთ ყველაფერი და ეძებენ პასუხებს. ძიძა მზად უნდა იყოს უამრავ კითხვაზე პასუხის გაცემისთვის, მან არ უნდა მოიგერიოს ბავშვის ინტერესი და ყოველთვის უნდა ჰქონდეს მზაობა იმისთვის, რომ დააკმაყოფილოს პატარას ცნობისმოყვარეობა. ამისთვის საჭიროა, რომ გათვითცნობიერებული იყოს ბავშვთა ფსიქოლოგიაში, ერკვეოდეს იმ სწორ მიდგომებში, რაც ასაკობრივი კატეგორიის მიხედვით შეესაბამება ბავშვს. გამოიჩინოს მოთმინება და თავშეკავებულობა იმ შემთხვევაშიც, თუ ბავშვი ერთსა და იმავე კითხვას სვამს, უბრალოდ განსხვავებული სიტყვათა წყობით. ძიძისთვის, ასევე, არსებითად მნიშვნელოვანია, რომ პიროვნულად იყოს ყურადღებიანი და მზრუნველი ტიპაჟი, შეეძლოს მცირე დეტალების შემჩნევა და იმ შემთხვევაში, თუკი ბავშვი ძალიან პატარაა და ჯერ საუბარი არ შეუძლია, ასაკის შესაბამისი მინიშნებებით ამოიცნოს მისი საჭიროებები ან გასაჭირი. მიუხედავად იმისა, რომ ძიძობა ანაზღაურებადი სამსახურია, აღმზრდელის მიდგომა იმაზე მეტად პასუხისმგებლიანი უნდა იყოს ბავშვის მიმართ, ვიდრე ოფისში შესასრულებელი საქმის მიმართ, რადგან ძიძას ჩაბარებული ჰყავს ცოცხალი ადამიანი, პატარა ბავშვი, რომლის პიროვნებად ჩამოყალიბებაშიც დიდი წვლილი შეაქვს. ამ ყველაფერს კი უნდა შეხედოს როგორც დიდ პასუხისმგებლობას და არა როგორც უბრალოდ სამსახურს.

ასევე, ძალიან მნიშვნელოვანი და გასათვალისწინებელი ფაქტორია ისიც, რომ არამხოლოდ ძიძას, არამედ ბავშვსაც უყალიბდება ემოციური მიჯაჭვულობა ამ ადამიანზე, რადგან ხშირ შემთხვევაში ყველაზე მეტ დროს მასთან ერთად ატარებს და ცხოვრების ადრეულ ეტაპზე მისაღები პატარ-პატარა გადაწყვეტილებები თუ გასაკეთებელი არჩევანი სწორედ ძიძასთან ერთად უწევს. ძიძა ხდება მოწმე და თანამონაწილე მისი პატარა სიხარულებისა თუ გაბრაზებების, პირველი გამოცდილებების. ამიტომ საუკეთესო ძიძა საუკეთესო უფროს მეგობარსა და მრჩეველს უდრის. ეს ის ადამიანია, რომელიც პატარა ბავშვს ფუნქციონირებაში ეხმარება და ასწავლის, თუ როგორ იყოს დამოუკიდებელი. შეიძლება ითქვას, რომ მშობლის მაგივრობას სწევს მისი არყოფნის პირობებში, თუმცა აუცილებლად ფრთხილი ზღვარი უნდა დააწესოს ამ შემთხვევაში, რომ ბავშვს არ ჰქონდეს მატრამვირებელი გამოცდილება მშობლისა და აღმზრდელის ერთმანეთისგან გარჩევის თვალსაზრისით.

საუკეთესო ძიძა არის სანდო, პასუხისმგებლიანი, გამოცდილი და მზრუნველი ადამიანი, რომელსაც ამავდროულად აქვს ენერგია და შესაძლებლობა, არამხოლოდ გაზარდოს, არამედ აღზარდოს ბავშვი სწორი ღირებულებებით და იზრუნოს მის შემოქმედებით განვითარებაზე.

ამავე რუბრიკის სხვა სტატიები განსხვავებულ პროფესიებზე, შეგიძლიათ ნახოთ აქ:

რა უნარებია საჭირო გაყიდვების მენეჯერისთვის

რა უნარებია საჭირო იმისთვის, რომ ბუღალტერი იყო