რატომ მიდიან თანამშრომლები სამსახურიდან?

თანამშრომელთა გადინება საკმაოდ მტკივნეული თემაა ადამიანური კაპიტალის მენეჯერებისთვის და ზოგადად, კომპანიისთვის. ტალანტების მოზიდვა, ადაპტაცია და მათი შენარჩუნება საკმაოდ შრომატევადი პროცესია და კომპანიებს დიდ ძალისხმევად და ფინანსური რესურსის გაღებად უჯდებათ თანამშრომლების შენარჩუნება. როგორც ერთერთ წინა სტატიაში მიმოვიხილეთ, თაობის ცვლილებასთან ერთად, იცვლება სამსახურის მიმართ დამოკიდებულებაც და დღესდღეობით მარტივად და თამამად დგამენ სამსახურის ცვლილების გადაწყვეტილებას დასაქმებულები. თუმცა საინტერესოა შევაფასოთ ორგანიზაციიდან წასვლის მიზეზები კომპანიის გადმოსახედიდან.

სამუშაო ადგილზე კმაყოფილების კოეფიციენტი ორგანიზაციული კვლევებით იზომება. არსებობს გარკვეული ასპექტები, რომელიც ყველა თანამშრომლისთვის საერთოა და თანაბრად სასურველია მათთვის, თუმცა ასევე, არსებობს ინდივიდუალური სურვილებიც, რომელთა დაკმაყოფილებაც გარკვეული თნამშრომლებისთვის უფრო მეტად მნიშვნელოვანი იქნებოდა სამუშაო ადგილზე.  

ჯანსაღი სამუშაო გარემო

ბევრი ადამიანისგან გავიგებთ, რომ ჯანსაღ სამუშაო გარემოს ეძებს დასაქმებისთვის, ერთი შეხედვით, მარტივად შეიძლება დავახასიათოთ და „გამოვიცნოთ“, თუ რა შეიძლება იგულისხმებოდეს ჯანსაღ სამუშაო გარემოში, თუმცა მნიშვნელოვანია, რომ თავად თანამშრომელსაც ინდივიდუალურად ვკითხოთ თავად რას მოიაზრებს ამ ფრაზის მიღმა. ზოგადად, ჯანსაღია გარემო, სადაც დასაქმებულები არ არიან შიშის ქვეშ, არამედ გააზრებული აქვთ თავიანთი პასუხისმგებლობა, აქვთ საკმარისი შთაგონება, ენდობიან ერთმანეთს, შეუძლიათ გუნდური მუშაობა, ამოძრავებთ საერთო მიზანი და იზიარებენ მსგავს ღირებულებებს. ეს, რა თქმა უნდა, არ გამორიცხავს თანამშრომელთა მრავალფეროვნებას და არ ნიშნავს, რომ მხოლოდ დადგენილ ჩარჩოებში უნდა მოექცნენ, პირიქით, ხაზი უნდა გაესვას ყველა მათგანის უნიკალურობას, ინდივიდუალურობასა და კრეატივისთვის ჰქონდეთ საკმარისი სივრცე. ჯანსაღ სამუშაო გარემოში ადამიანების მოტივაცია ზრდადია და ისინი კომპანიის შიგნით განვითარებაზე ფიქრობენ, აღიქვამენ, რომ დამსაქმებელი აძლევს კარიერული ზრდის და საკუთარი უნარების გამოვლენის შესაძლებლობას. თუკი თქვენი თანამშრომლები განვითარების შესაძლებლობას სხვაგან ეძებენ, დროა დაფიქრდეთ, რა კომპონენტი აკლია თქვენს კომპანიას, რასაც დასაქმებულებს ვერ სთავაზობთ.

ღირსეული პირობები და ანაზღაურება

სამსახურიდან წასვლის მიზეზებს შორის, ხშირად ასახელებენ არასაკმარისი ანაზღაურების ფაქტორს. გასათვალისწინებელია ორგანიზაციის სამუშაო სფეროც, ფიზიკური სამუშაოს შემთხვევაში, აუცილებლად უნდა მიექცეს ყურადღება ფიზიკურ გარემოს, უსაფრთხოებას და ღირსეულ პირობებს. გარემო უნდა აკმაყოფილებდეს შრომით სტანდარტებს და კომფორტული იყოს თანამშრომლისთვის. აძლევდეს საშუალებას, რომ დაიბალანსოს სამსახურეობრივი და პირადი ცხოვრების დრო, რაც იმდენად მნიშვნელოვანია მისთვის, რომ აისახება მუშაობის ხარისხსა და მოტივაციაზე. ანაზღაურების ნაწილი კი ის საბაზისო მოთხოვნილებაა, რაც ყველა თანამშრომელს არსებობისთვის სჭირდება გაწეული სამსახურის სანაცვლოდ და რაც უფრო დიდ რესურსს დებს კომპანიის განვითარებაში და რაც მეტად ხარისხიანად ასრულებს დაკისრებულ მოვალეობას, მით მეტი მოლოდინი აქვს დამსახურებული შრომითი ანაზღაურების მიმართ. ხელფასი კი ერთერთი წამყვანი ფაქტორია ხოლმე სამსახურის ცვლილებისას, გარდა საინტერესოდ შესასრულებელი ამოცანებისა, ყველა ადამიანისთვის მნიშვნელოვანია ფინანსური სარგებლის მიღება და სწორედ ამიტომ ანიჭებენ უპირატესობას კონკურენტულ ხელფასს.

ბენეფიტები და დაფასება

გარდა ფიქსირებული ანაზღაურებისა, რამდენად მაღალი ხელფასიც არ უნდა შესთავაზოთ თანამშრომლებს, მათთვის ძალიან მნიშვნელოვანია დაფასების ფაქტორი თანხის მიღმა. როდესაც განსაკუთრებულ და მნიშვნელოვან ადამიანად გრძნობენ თავს კომპანიაში, ხედავენ, როგორ ფასდება ორგანიზაციაში მათ მიერ შეტანილი წვლილი მენეჯმენტის მხრიდან, აქვთ მზაობა გააკეთონ იმაზე მეტი, ვიდრე მოეთხოვებათ. ხოლო იმ შემთხვევაში, თუ თანამშრომელი ვერასდროს გრძნობს ორგანიზაციის მხარდაჭერას, არასდროს ხარჯავს კომპანია რესურსს მისი განვითარებისთვის, არ არის დაკავებული დასაქმებულების შექება-წახალისებით მათი წარმატების დროს, ეს ყველაფერი პირველ ეტაპზე იწვევს თანამშრომლის დემოტივაციას, შემდეგ ისინი უკვე იწყებენ ახალი სამსახურის ძიებას და სამუშაო დროის დიდ ნაწილს ვაკანსიების დათვალიერებაში ხარჯავენ, რაც საბოლოოდ უარყოფითად ისახება თანამშრომლის პერფორმანსზეც არსებულ სამსახურში და კომპანიის შედეგებზეც.

თავიდან რომ ავიცილოთ დემოტივირებული თანამშრომლები, აუცილებელია კომპანიებმა იზრუნონ მათ განვითარებაზე, დაანახონ რომ თითოეული მათგანი ძალიან ღირებულია კომპანიისთვის და მათ საჭიროებებს მაქსიმალურად ითვალისწინებენ. ბენეფიტი შეიძლება იყოს როგორც ჯანმრთელობის დაზღვევის (მათ შორის, ოჯახის წევრების) კარგი პაკეტი, ასევე საგანმანათლებლო ტრენინგ-კურსების დაფინანსება მათი სამუშაო სპეციფიკიდან და ინტერესებიდან გამომდინარე, დამატებითი დეი-ოფის ჩუქება ისეთი თანამშრომლებისთვის, ვინც ზეგანაკვეთურად მუშაობს თავისი სურვილით, კომპანიის საკეთილდღეოდ; ასევე შესაძლოა მცირე დაჯილდოებების გამართვა თვის, კვარტლის ან წლის თანამშრომლის გამოვლენით, რასაც ექნება სამოტივაციო სახე ყველა თანამშრომლისთვის, რათა ჯანსაღი კონკურენციის პირობებში ჰქონდეთ საუკეთესოობის ამბიცია და სიმბოლური პრიზებით დასაჩუქრდნენ.

აუცილებლად უნდა აღვნიშნოთ, რომ გარდა ზემოთ ჩამოთვლილი მიზეზებისა, რაც ძირითად შემთხვევაში, კომპანიის შეცდომებზეა აგებული, საიდანაც თანამშრომლები მიდიან, შესაძლოა სამსახურის დატოვების მიზეზი იყოს არა გარეგანი, არამედ შინაგანი, ანუ მომდინარეობდეს თავად თანამშრომლისგან. კერძოდ, თავად აღმოაჩინოს, რომ მისთვის საინტერესო სფეროში არ არის და სფეროს შეცვლა გადაწყვიტოს, სცადოს თავისი შესაძლებლობები განსხვავებულ სამუშაო კულტურაში, ეძებდეს განვითარების მრავალფეროვან პერსპექტივებს ან ამოწუროს თავი კონკრეტულ კომპანიაში და სიახლეებისკენ სწრაფვა ამოძრავებდეს.