რა ტიპის უსაფრთხოების ზომების მიღებაა საჭირო სამუშაო ადგილზე?

როდესაც ვსაუბრობთ უსაფრთხო სამუშაო გარემოზე, პირველი რასაც წარმოვიდგენთ, შრომის უსაფრთხოების ნორმების დაცვა და სამუშაო ადგილზე ზედმეტი შფოთვის გარეშე, თავისუფლად ყოფნაა. ფიზიკური უსაფრთხოება და თანამშრომლის სიცოცხლისა და ჯანმრთელობის ხელშეუხებლობა ნამდვილად პირველი და უმნიშვნელოვანესია. ამასთანავე, არსებობს სხვადასხვა ტიპის უსაფრთხოებასთან დაკავშირებული პროცედურები, რომლებიც ერთიანობაში ჯანსაღ სამუშაო სივრცეს ქმნის და თითოეულ მათგანს განვიხილავთ სტატიაში.

1)    ფიზიკურად უსაფრთხო სამუშაო სივრცე

ყველა კომპანია პირველ რიგში უნდა აკმაყოფილებდეს იმ მინიმალურ პირობებს, რაც ღირსეული სამუშაო გარემოს შექმნის წინაპირობაა ორგანიზაციაში. საუბარია ისეთ ელემენტარულ საკითხებზე, როგორიცაა შენობის მდგრადობა, გამართული ელექტროგაყვანილობა და წყლის სისტემა, გათბობა-გაგრილების უზრუნველყოფა და გამართული ინტერნეტი შეუფერხებელი მუშაობისთვის. ვიზუალური მხარე ყველა საკითხში პირველი ეფექტის განმსაზღვრელია და შენობის ვიზუალი ხშირად გარდამტეხია ხოლმე ორგანიზაციაში მუშაობის სურვილის გასაჩენად.

2)    შრომის უსაფრთხოება

კანონი შრომის უსაფრთხოების შესახებ საქართველოს პარლამენტმა 2019 წელს მიიღო და მისი მიზანია „პრევენციული ღონისძიებების ზოგადი პრინციპის განსაზღვრება, რომლებიც უკავშირდება არსებულ და მოსალოდნელ საფრთხეებს, უბედური შემთხვევებისა და პროფესიული დაავადებების თავიდან აცილებას, დასაქმებულთა სწავლებას, კონსულტაციების გაწევას და შრომის უსაფრთხოებისა და ჯანმრთელობის დაცვის საკითხებში დასაქმებულთა თანაბარ მონაწილეობას.“ აღნიშნული კანონის გათვალისწინებით, კომპანიები ვალდებულები არიან ჰქონდეთ შრომის უსაფრთხოების ოფიცრის საშტატო ერთეული, რომლის რაოდენობაც განისაზღვრება კომპანიაში თანამშრომლების რაოდენობის მიხედვით, შრომის უსაფრთხოების ფარგლებში რეგულირდება სამუშაო გარემო მავნე და საშიშპირობებიან შემთხვევებში, იზომება ყველა ის მაჩვენებელი, რაც შეიძლება თანამშრომლის ჯანმრთელობას პოტენციური რისკის ქვეშ აყენებდეს. ამასთანავე, პერიოდულად შრომის უსაფრთხოების ფარგლებში ხდება თანამშრომელთა დატრენინგება, მაგალითად როგორ უნდა მოიქცნენ სახანძრო განგაშის ან სტიქიური უბედურებისას ევაკუაციის დროს.

3)    კიბერუსაფრთხოება

ჩვენს დროში აქტუალური საკითხია კიბერუსაფრთხოება. ციფრულ არხებში შეტევები შეიძლება კომპანიისთვისაც და ინდივიდისთვისაც დიდი ზიანის მომტანი იყოს. კიბერუსაფრთხოებას კომპანიაში უზრუნველყოფს ინფორმაციული უსაფრთხოების სამსახური, თუმცა გარდა იმისა, რომ ისინი დაცვის სისტემებს იყენებენ, ძალიან მნიშვნელოვანია თანამშრომლების ინფორმირებულობა, თუ როგორ უნდა დაიცვან თავი კიბერშეტევებისგან - მაგალითად არ შეიყვანონ პაროლი საეჭვო პლატფორმებზე, არ გახსნან უცხო მისამართიდან შემოსული მეილების ბმულები და ა.შ. ციფრულ ეპოქაში სწორედ კიბერუსაფრთხოების საკითხია ძალზე აქტუალური.

4)    ჯანსაღი სამუშაო გარემო

გარდა ფიზიკური და კიბერუსაფრთხოებისა, არანაკლები მნიშვნელობა აქვს იმას, რომ თანამშრომელი თავს დაცულად გრძნობდეს სამუშაო ადგილზე მენტალურადაც. კერძოდ, აღმოფხვრილი იყოს ბულინგი, სექსუალური შევიწროვების ფაქტები ან ნებისმიერი ნიშნით დისკრიმინაცია და დისკომფორტის შექმნა თანამშრომლებისთვის. ადგილი სადაც ფიზიკური და მენტალური უსაფრთხოება გარანტირებული აქვთ თანამშრომლებს, ნამდვილად ყველა მათგანისთვის საოცნებო სამუშაო ადგილად იქცევა.