როგორ დავიცვათ კომპანია ტოქსიკური ლიდერშიპისგან?

ტოქსიკურ ლიდერშიპს კატასტროფული გავლენა აქვს გუნდსა და ორგანიზაციაზე. ასეთი ლიდერები ხშირად, აფერხებენ თანამშრომლებს სამუშაო ადგილზე შესაძლებლობების მაქსიმუმის გამოვლენისას. აქედან გამომდინარე, HR პროფესიონალებმა უნდა დააიდენტიფიცირონ მსგავსი შემთხვევების მიზეზი და სამუშაო გარემო დაიცვან ტოქსიკურობისგან.

რა არის ტოქსიკური ლიდერშიპი?

კარგ ლიდერებს, ნებისმიერ დონეზე შეუძლიათ მხარი დაუჭირონ საკუთარ გუნდს, წაახალისონ, საჭირო ცოდნითა და უნარებით აღჭურვონ და თანამშრომლების მიერ მოტანილი წარმატებებით გუნდი და ორგანიზაცია გააძლიერონ. ლიდერები ტოქსიკურები ხდებიან მაშინ, როცა თავიანთ დავალებებს იძულებად აქცევენ. მათ შესაძლოა დააბულინგონ სხვები, იყვნენ აგრესიულები, აროგანტულები, იქცეოდნენ დიქტატორებივით ან მანიპულატორებივით. ტოქსიკურ ლიდერებს ასევე ახასიათებთ არაეფექტური კომუნიკაცია, მიკრომენეჯმენტი და ემპათიის ნაკლებობა. მათ, შესაძლოა, უსამართლოდ განსაჯონ თანამშრომელი, თავს დაესხან ემოციურად, დაადანაშაულონ ან სხვების თვალწინ შეარცხვინონ. ამით კი ეცადონ, რომ საკუთარი ძალების დემონსტრირება მოახდინონ და პოზიციები გაიმყარონ. მათ ასევე შეიძლება სხვების იდეები და ინიციატივები დაბლოკონ.

ტოქსიკური ლიდერშიპის შედეგები

ორგანიზაციაში ტოქსიკური მართვისას სხვადასხვანაირი შედეგები შეიძლება დადგეს, მაგალითად:

·       ტოქსიკურმა ლიდერებმა შესაძლოა იმდენად არასასურველი სამუშაო გარემო შექმნან, რომ გააქრონ გუნდის მოტივაცია, ენერგია და ინოვაციების შემოტანის სურვილი;

·       ქმნიან სიცრუეზე აგებულ სამყაროს, სადაც რეალური სამყაროსგან იზოლირებულები არიან და მხოლოდ ლიდერის სუსტ გადაწყვეტილებებს მისდევენ. გუნდის წევრები კი თავს იკავებენ ხმის ამოღებისგან, რადგან ეს მაინც უშედეგოა და საბოლოოდ, ინფორმაციას და რეალურ დამოკიდებულებებს მალავენ უფროსისგან;

·       ტოქსიკური ლიდერები ცუდ მაგალითს აძლევენ სხვებს, კოლექტივის სხვა წევრებისთვის, რომლებიც შედარებით ახალგაზრდები და გამოუცდელები არიან, ეს ლიდერები შესაძლოა ეტალონები აღმოჩნდნენ, მენეჯერობის დროს გადააკოპირონ მათი ქცევები და შედეგად ტოქსიკური ლიდერშიპით მთელი მენეჯერული რგოლები „დაინფიცირდნენ“;

·       კარგი თანამშრომლები მათ გამო ტოვებენ სამუშაო ადგილს, ტოქსიკური ლიდერები არ აღიარებენ და არ აფასებენ მოტივირებულ და დიდი რესურსისა და პოტენციალის მონე თანამშრომლებს, შესაბამისად, ისინიც მიდიან იქ, სადაც თავს დაფასებულად იგრძნობენ.

როგორ შევაჩეროთ ტოქსიკური ქცევები

HR გუნდის მისია ტოქსიკური ქცევების შესაჩერებლად მენეჯერების დატრენინგებაა. HR-ებმა უნდა უზრუნველყონ მაღალი რგოლის მენეჯერებისათვის ინტერპერსონალური კომუნიკაციების დახვეწა, იმუშაონ მათთან, რომ გამოიმუშაონ უკუკავშირის კულტურა, ასწავლონ, თუ როგორ მისცენ მოტივაცია სხვებს. ახალბედა მენეჯერებმა კი უნდა ისწავლონ, თუ როგორ მოარგონ მიდგომა გარემოებას, როგორ დააფასონ თითოეული თანამშრომლის წვლილი და დაინახონ მათი ღირსება და არა ბრალეულობა.

HR სპეციალისტებმა ასევე, უნდა აწარმოონ მუდმივი მონიტორინგი და თუკი ტოქსიკური ქცევა გამოვლინდება მცირე დოზით მაინც, დაუყოვნებლივ ჩაერთონ მის აღმოფხვრაში. მენეჯერების დახვეწა და მათ ემოციური ინტელექტის ამაღლება ნამდვილად ერთერთი სწორი ინსტრუმენტია კარგ ლიდერად ჩამოყალიბებისათვის. HR პროფესიონალებმა ასევე უნდა ჩამოაყალიბონ ნდობა ლიდერებს, გუნდსა და მომხმარებელს შორის. მაღალი ნდობის კულტურის მქონე ორგანიზაციებში კი თანამშრომლები მეტად ლოიალურები და ინიციატივიანები ხდებიან.